U-ISAYA 2 - IsiNdebele 2012 Translation

Ilanga lakaSomnini

¹ Ilizwi elembulwa ku-Isaya umsa ka-Amotsi ngoJuda neJerusalema:

² Kuzakuthi emihleni yokuphela intaba yethempeli lakaSomnini inzinziswe esiqongolweni seentaba. Izakuphakanyiswa ngaphezu kwemibundu nezizwe zoke ziwulukele kiyo.

³ Nabantu abanengi bazakuza bathi: “Nambani sikhuphukeleni entabeni kaSomnini, ethempelini lakaZimu kaJakopo ukuze asifundise iindlela zakhe kobana sikhambe ngemizilakhe.” Mbala, umthetho uzakuvela eZiyoni nelizwi lakaSomnini eJerusalema.

⁴ USomnini uzakugweba hlangana nezizwe abe enze kube nokulunga ebantwini abanengi. Bona bazakwenza iinsabula zabo amalembe wokulima nemikhontwabo imikhwa yokuqopha isidiribe. Isizwe angekhe sisaphakamisela esinye iinkhali, iye, ngitjho nokuzibandulela ipi.

⁵ Yewize wena kumba kaJakopo, namba sikhambe ekukhanyeni kwakaSomnini.

⁶ Maye, Somnini! Ulahle abantu bakho, indlu kaJakopo: Bagcwele ukuhlohlozelwa kwepumalanga nokuphengula njengamaFilista ngebanga lokuhlanganisa izandla nabatjhili.

⁷ Inarhabo igcwele isiliva negolide; amagugwabo akapheli. Godu igcwele iinjomani; iinkarana zabo zepi azipheli.

⁸ Inarhabo igcwele abosingazimu; bakhothamela umsebenzi wezandla zabo, lokho okwenziwe miminwabo.

⁹ Ngaleyondlela abantu bayathotjiswa; iye, omunye nomunye wabo arhubutjhwe. Yeke ungabathetheleli Somnini!

¹⁰ Ngenani emipharwini, nizifihle ehlabathini, nibalekele ubukhali bakaSomnini nephazimulo yobukhosi bakhe!

¹¹ Inyazo lomuntu ozikhakhazisako lizakuthotjiswa, ukuziphakamisa kwabantu kuguqiswe, nguSomnini kwaphela ozakuphakanyiswa mhlokho.

¹² USomnini uMninimandlawoke unelanga alijamisele boke abaziphakamisako nabakhukhumeleko, iye, ukuze athobise boke abazitjhayako:

¹³ yoke imisedari yeLibhanoni emide nephakamileko, yoke imithi yama-owuku yeBhatjhani,

¹⁴ zoke iintaba eziphakamileko, yoke imibundu edlhodlhomeleko,

¹⁵ yoke imibhotjhongo emide, yoke imithangala eqinileko,

¹⁶ yoke imikhumbi yokurhweba nazo zoke iinthayamanzi ezithwele amagugu.

¹⁷ Inyazo lomuntu ozikhakhazisako lizakuguqiswa, nokuziphakamisa kwabantu kuthotjiswe; nguSomnini kwaphela ozakuphakanyiswa mhlokho.

¹⁸ Abosingazimu bazakuphela nya.

¹⁹ Abantu bazakugijimela emipharwini nemigodini yehlabathi, babalekele ubukhali bakaSomnini nephazimulo yobukhosi bakhe, lokha nasikimela ukwethusa iphasi.

²⁰ Mhlokho abantu bazakulahlela abosingazimu emakhondlweni nakibonomaphelaphelana; iye, abosingazimu babo besiliva negolide ababenze bona babakhothamele.

²¹ Bazakwenza lokho lokha nabangena emaweni nemipharwini yamadwala, babalekele ubukhali bakaSomnini nephazimulo yobukhosi bakhe, lokha nasikimela ukwethusa iphasi.

²² Lisa ukwethembela emuntwini onomphefumulo kwaphela eempumulweni! Njekhona yini into angiyo?