U-ISAYA 16 - IsiNdebele 2012 Translation

¹ Thumelani amaqamana njengesibiko kumbusi wenarha yakwaJuda ukusukela eSela ukuqamula erhalawumbeni, ukuya entabeni yeZiyoni nomlayezo othi:

² “Njengeenyoni ezizulazulako, lokha naziqotjhwe eenhlakaneni zazo, anjalo namadodakazi wakwaMowabi, emazibukweni we-Arinoni.

³ Nje-ke, yiza neqhinga, wenze isiqunto; sigubuzesa ngomthunzakho njengobusuku lokha ilanga nalisefokothweni; ufihle abahlakazekileko, ungembuli abaphalali.

⁴ Vumela abahlakazekileko bethu bakhosele kuwe, ube siphephelo sakaMowabi kiloyo ofuna ukubarhayila. Ngambala, isifuthefuthe lesi sizakuphela, ukurhayila kukhawuke nabagandeleli banyamalale enarheni.

⁵ Angithi isihlalo sakho sobukhosi sinzinze ekwethembekeni begodu phezu kwaso kuhlezi othembekako! Iye, ngetendeni lakaDavida kunombusi othanda ubulungiswa notjhisakalela okulungileko.”

⁶ Sizwile ngokuziphakamisa kwakaMowabi. Uzikhukhumeza khulu! Ukuzigqaja, ukuziphakamisa, ukuzitjhaya nekulumakhe emumoya kulilize lakolize.

⁷ Kodwana nje uMowabi sewuyazilila. Boke abantu bakhona bayalila ngebanga lamakwapa wamadiribe weKhiri-Rharesethi. Iye, niyahumuza ngombana nibhujiswe nya.

⁸ Ngambala amasimu weRhetjhibhoni atjhwabile, iye, neendiribe zeSibhima. Amakhosi wezizwe arhadla amadiribayo akhethekileko ebekafikelela ngitjho neJazeri, anabele erhalawumbeni; amahlumelawo gade asabalala ayamele ngaphetjheya kwelwandle.

⁹ Ngalokho ngirhahlawula isililo seJazeri ngebanga leendiribe zeSibhima, ngikuthambisa ngeenyembezi, wena Rhetjhibhoni nawe Eliyale ngombana umkhosi wepi uwele esivunweni seenthelo zakho nesamabelakho.

¹⁰ Itokozo nethabo kususiwe esivandeni seenthelo; eendiribeni akusabhinwa iingoma, akusahlokonywa nomtlhodlhi wewayini akasekho ebutlhodlhelweni. USomnini wathi: “Ngikuthulisile ukuhlokoma!”

¹¹ Ngalokho ihliziywami ilila njengeharibha ngoMowabi, nomphefumulwami utlhuwela iKhiri-Rheresethi.

¹² Godu uSomnini wathi: “Nanyana uMowabi angazibonakalisa namkha azikhathaze endawenakhe ecwengekileko, aye endundumeni kobana ayokuthandaza, akazukuphumelela.”

¹³ Lelo bekulilizwi uSomnini alikhuluma ngoMowabi esikhathini esadlulako.

¹⁴ Gadesi uSomnini uthi: “Eminyakeni emithathu, njengeminyaka yesisebenzi esiqatjhiweko, idumo lakaMowabi lizakuthathelwa phasi phezu kobana anesiqubuthu sabantu. Imisalela izakuba libinzana, ingabi nedumo namandla.”