U-ISAYA 10 - IsiNdebele 2012 Translation

¹ UZimu wathi: “Bazazizwa labo abajamisa imithetho emimbi nalabo abatlola iimiso eziyingozi

² ukuze baphambanise amalungelo wabachakileko, bagalaja iimfanelo zabadududu ebantwini bami kobana abahlolokazi babe yipangwabo neentandani zibe bongazimbi babo.

³ Nizokwenzani ngelanga lokuhlunguphazwa, lokha kuza isiwuruwuru sivela kude na? Uzokubalekela kubani mayelana nokusizeka, umnothwenu nizowutjhiya nobani?

⁴ Awa, abantwabo bazakhukhutha hlangana nabathunjwa, bawele hlangana nababuleweko. Kikho koke lokho ubukhali bakaSomnini akhange busuke nesandla sakhe sahlala siphakamile.”

Ama-Asiriya azakuhlunguphazwa

⁵ Godu uZimu wathi: “Azazizwa ama-Asiriya, okuyintonga yobukhali bami, esandleni sawo kunomtjhiza welaka lami.

⁶ Ngiwathumela esizweni esinganaZimu, ngiwayalele ebantwini abangisilingako ukuze athathe ipango, ahluthule ipahla; abe abagadange njengedaka eendledlaneni.

⁷ Kodwana wona bekangakanqophi ukwenza lokho; lokhu bekungekho emkhumbulwenawo! Kunalokho, eenhliziyweni zawo bekunokubhubhisa, iye, ukurhayila izizwe ezinengi.

⁸ Wona athi, ‘Iinduna zethu azisimakhosi zoke na?

⁹ IKalino sayiphatha njengeKarikemitjhi, iRhamathi njenge-Ariphadi neSamariya njengeDamaseku.

¹⁰ Ngezandla zethu sathumba imibuso enabosingazimu neenthombe ezidlula zeJerusalema neSamariya.

¹¹ Lokho esakwenza eSamariya nabosingazimu bayo, sizakwenza eJerusalema nabozinyana bayo.’ ”

¹² Lokha uSomandla sele alungise indabakhe nentabeni yeZiyoni neJerusalema, uzakuthi: “Ngizokuhlunguphaza ikosi ye-Asiriya ngebanga lemisebenzi yokuzikhukhumeza kwehliziywayo nokuzikhakhazisa kwamehlwayo aziphakamisako

¹³ nangebanga lokobana ithe, ‘Ngamandla wesandla sami ngenze lokhu iye, ngokuhlakanipha kwami: Ngisuse imikhawulo yezizwe ngaphanga namagugwazo bengaguqisa abanamandla khulu bezakhamuzi zakhona.

¹⁴ Njengomuntu ofunyana isihlakana senyoni, kunjalo-ke isandla sami sifikelela umnotho wezizwe. Nanjengomuntu obuthelela amaqanda aseleko, nami-ke ngibuthelele iphasi loke. Akhange kube khona ophakuza iphiko namkha ovula umlomo ngokusabisa.’ ”

¹⁵ Izembe vane khelizikhukhumeze phezu kogawula ngalo na? Isarha yona iyazikhakhazisa phezu kosarha ngayo na? Umtjhiza wona uyamjuguja owuphakamisako namkha intonga iphakamise ongasiso isigodo na?

¹⁶ Yeke, uSomandla, uSomnini uMninimandlawoke uzokukhehlisa iimbitjhimbitjhi zekosi ye-Asiriya; iye, uzokuthumela umgomani ovutha njengomlilo hlangana nabahloniphekako bayo.

¹⁷ Umkhanyo ka-Israyeli uzakuba mlilo, iye, oCwengileko wakhe abe malangabi; ngelanga linye nje umlilo lo uzakutjhisa bewuqothule ameva neminga ye-Asiriya.

¹⁸ Uzakubhubhisa ubuhle behlathi nemitjhana yakhona, iye, amatjhwaba nesiqu. I-Asiriya izakuba njengokuqobeka kowako.

¹⁹ Nemithi eseleko yehlathi layo izakuba libinzana ngitjho nomntwana uzayibala abe ayitlole.

²⁰ Mhlokho imisalela yakwa-Israyeli, okutjho abasindileko bendlu kaJakopo bazazeyama ngeqiniso kuSomnini, ongoCwengileko wakwa-Israyeli. Angekhe basazeyama ngaloyo owabamukulako.

²¹ Abasindileko bazakubuya iye, imisalela kaJakopo izakubuyela kuZimu onamandla.

²² Wena Israyeli, nanyana abantu bakho bangangetjhwabatjhwaba yelwandle, kuzakubuya imisalela kwaphela. Ukubhujiswa kwakho sekumenyezelwe, kuzakupheleliswa ngokulunga.

²³ USomandla, uSomnini uMninimandlawoke umemezele waqeda: lokho ukwenze elizweni loke.

²⁴ Ngalokho-ke, nakhu okutjhiwo nguSomandla, uSomnini uMninimandlawoke: “Nina bantu bami enihlala eZiyoni, ningesabi i-Asiriya nayinibetha ngentonga iphakamisela umtjhiza ngakini njengokwenza kweGibhide.

²⁵ Masinyana ukusilingeka kwami kini kuzakuphela nobukhali bami buzakunqotjhiswa ekubhujisweni kwe-Asiriya.”

²⁶ USomnini uMninimandlawoke uzakujuguja isibebhu ngehla kwama-Asiriya kube njengalokha amadlha amaMidiyani edwaleni le-Orebi. Intongakhe izakuba ngehla kwelwandle uzayiphakamisa njengombana ayiphakamisa eGibhide.

²⁷ Mhlokho, umthwalo wekosi ye-Asiriya uzakususwa emahlombenenu nejogi layo entanyenenu lizakwephulwa. Yenyukela phambi kwepango enomnotho,

²⁸ yadlula e-Ayathi, yaya eMigroni yatjhiya ipahlayo eMikimatjhi.

²⁹ Nje-ke ibutho layo lavundla umrhoba laqupha ubusuku eGeba. IRama iyathuthumela, iGibeya yakwaSawula iyabaleka.

³⁰ Rhahlawula wena ndodakazi yeGalimu! Ulalele wena muzi weLayitjha! Phendula wena Anatothi!

³¹ IMadimena ibalekile; izakhamuzi zeGebimu zibuthelela ipahlazo ebubhacweni.

³² Namhlanjesi ikosi leyo izabe ijame eNobi ikhombe ngesandla sayo entabeni yethempeli leZiyoni, embundwini weJerusalema.

³³ Madekhethu! USomandla, uSomnini uMninimandlawoke uzokukghedlha iingala ngamandla amakhulu. Imithi ephakamileko izakugawulwa, iye, emide iwele phasi.

³⁴ Izakurhadla iinthurhana ngezembe; iLibhanoni izokuwa phambi koSomandla.