U-ISAYA 1 - IsiNdebele 2012 Translation

¹ Lo, mbono owabonwa ngu-Isaya umsa ka-Amotsi ngoJuda neJerusalema, ngeenkhathi zokubusa kwaka-Uziya, uJotamu, u-Arhazi noHezekhiya amakhosi wakwaJuda.

Ukuhlubuka kwesizwe sakaSomnini nokuhlunguphazwa kwaso

² Lalelani nina mazulu! Ubeke indlebe nawe phasi ngombana uSomnini ukhulumile wathi: “Ngikhulise abantwana ngabondla, kodwana bangihlubukile.

³ Ikomo iyamazi umniniyo, nodumbana igebhezi lomnikazalo, kodwana u-Israyeli akazi ilitho, abantu bami abazwisisi.

⁴ Sizazizwa isizwe esonako, abantu abadisibezwa licala, inzalo yeenkhohlakali, abantwana bokonakala! Bamtjhiyile uSomnini; badelele oCwengileko ka-Israyeli, bamfulathela.

⁵ Khona nisazakubethwa kuphi nje? Nisaragela phambili ngokuhlubuka, khisibe yoke ihloko ilimele ihliziywenu idanile.

⁶ Kusukela efokothweni ukuya ezwanini akasenabubono, kunalokho maduma, manceba nemivuvu kwaphela ekungazange kukghanywe, kubotjhwe bekuthanjiswe ngamafutha.

⁷ Inarhenu idududu, amadorobhenu aqothuliwe, amasimenu adliwa miqhamuka niqalile; iye, inarhenu ayisenalitho ibhujiswe miqhamuka.

⁸ Indodakazi yeZiyoni seyisele njengomtlhatlhana esidiribeni, njengehlahla lomtlhatlhana esimini yamakomukomu nanjengedorobho elivinjezelweko.

⁹ Ukube uSomnini uMninimandlawoke akhange asitjhiyele abambalwa abaphunyurhileko besizokuba njengeSodoma, sifane neGomora.

Ukulunga kungcono kunemihlabelo

¹⁰ Yizwani amezwi kaSomnini, nina babusi beSodoma; nilalele ifundiso kaZimenu, nina bantu beGomora!”

¹¹ USomnini uthi: “Ubunengi bemihlabelwenu buyini kimi na? Ngidinekile ngemihlabelo yokutjhiswa yamaqama namafutha weembandana! Angithokozi ngeengazi zeenkunzi, zeemvana nezeempongo!

¹² Lokha naningena ebukhoneni bami iinlwana zenu zigidizela ngesirhodlweni sami. Ngubani obawe lokho ezandleni zenu?

¹³ Ningasayilethi iminikelo engazisiko! Ukutjhiswa kwetjhwalo kusinyenyiso kimi! Angeze ngisamukela imikhosenu nakube kunokonakala, iye, ukwethwasa kwenyanga, amaSabatha kanye nemihlanganwenu.

¹⁴ Ngiyayizonda imigidenu yokuthwasa kwenyanga neminyanyenu yeenkhathi enizijamisileko. Kumthwalo phezu kwami begodu sengidiniwe kuyithwala.

¹⁵ Lokha nanelula izandla zenu nithandaza, Ngizokuvala amehlwami kini nanyana ningenza imithandazo eminengi kangangani angekhe ngiyilalele. Izandla zenu zizele iingazi.

¹⁶ Hlambani, nizihlambulule! Susani izenzo zenu ezimbi phambi kwamehlwami! Lisani okumbi!

¹⁷ Nifunde ukwenza okulungileko; funani ukulunga, nikhuthaze abagandelelweko, jamelani indaba yeentandani, nivikele abahlolokazi.

¹⁸ “Seningeza-ke, sikhulumisane”, kutjho uSomnini, “Nanyana izono zenu zitlerebede, zizaba mhlophe njengesithwathwa, nanyana zibomvu be, zizakuba mhlophe twa.

¹⁹ Nakube niyavuma begodu niyalalela, nizakudla okuhle kwenarha,

²⁰ kodwana naninghanghabalako nihlubuka, nizakudliwa yisabula.” Iye, umlomo kaSomnini ukhulumile.

Isililo ngeJerusalema

²¹ Maye, idorobho ebelithembekile selibe yingwadla! Beligcwele ubulungiswa nokulunga bekungaphakathi kwalo, kodwana kwanjesi, ligcwele ababulali!

²² Isiliva lakho, Jerusalema, seliphenduke amanyela, utjwala bakho sebuqarhwe ngamanzi.

²³ Ababusi bakho bamahlubuka begodu babangani bamasela. Omunye nomunye uthanda ukufunjathiswa, ugijima ngemva kwezipho. Abasajameli iintandani nendaba yabahlolokazi ayisafiki kibo.

²⁴ Yeke, isigwebo sakaSomnini uMninimandlawoke, ongonamandla ka-Israyeli ngilesi: “Maye kibo! Ngizozanelisa ngezitha zami; ngizibuyiselele emanabenami.

²⁵ Ngizokuphendulela isandla sami kuwe, Jerusalema; ngicwengise amanyelakho kube njengesoda bengisuse loke ibibi lakho.

²⁶ Ngizakubuyisela abagwebi bakho kube njengemihleni yaphambilini, abeluleki bakho njengekuthomeni. Emva kwalokho uzakubizwa bona ulidorobho lokulunga, iye, idorobho elithembekileko.

²⁷ IZiyoni lizakuhlengwa ngokufanelekileko nabaphendukako balo ngokulunga,

²⁸ kodwana abahlubukako nezoni bazakwephulwa bokanyana njalo nalabo abafulathela uSomnini bazakubhubha.

²⁹ Bazakuba neenhloni ngebanga lemithi yama-owuku egade senizithabise ngayo. Nizakudana ngebanga leemvande enizikhethileko.

³⁰ Nizakufana ne-owuku elitjhwabelwe makari nanjengesivande esinganamanzi.

³¹ Onamandla uzakuba njengamaqobetjhwana nomsebenzakhe ube ngowehlasi; iye, uzakutjha ndawonye nomsebenzakhe kungabi nomcimi.”