U-EZRA 8 - IsiNdebele 2012 Translation

Irhelo leenhloko zemindeni eyabuya no-Ezra ekuthunjweni

¹ Lezi ziinhloko zemindeni kanye nerhelo leenzukulwana zalabo abenyuka nami Ezra ukusuka eBhabheli, emihleni yokubusa kwaka-Aritarhitjhasta ikosi:

² BekunguGeritjhomu eenzukulwaneni zakaFiniyasi, uDanyela eenzukulwaneni zaka-Itamara, uRhathutjhi womndeni kaDavida

³ eenzukulwaneni zakaTjhekaniya. KunguZakariya eenzukulwaneni zakaParotjhi ogade atloliswe namadoda alikhulu namatjhumi amahlanu,

⁴ u-Eliyowenayi umsa kaZerarhiya eenzukulwaneni zakaParhathi-Mowabi anamadoda amakhulu amabili,

⁵ uZathu umsa kaJarhaziyeli eenzukulwaneni zakaTjhekaniya anamadoda amakhulu amathathu,

⁶ u-Ebede umsa kaJonathani eenzukulwaneni zaka-Adini anamadoda amatjhumi amahlanu,

⁷ uJosaya umsa ka-Ataliya eenzukulwaneni zaka-Elamu anamadoda amatjhumi alikhomba,

⁸ uZebadiya umsa kaMikayeli eenzukulwaneni zakaTjhefathiya anamadoda amatjhumi abunane,

⁹ u-Obadiya umsa kaJerhiyeli eenzukulwaneni zakaJowabi anamadoda amakhulu amabili netjhumi nabunane,

¹⁰ uTjhelomothi umsa kaJosifiya eenzukulwaneni zakaBhani anamadoda alikhulu namatjhumi asithandathu,

¹¹ uZakariya umsa kaBebayi eenzukulwaneni zakaBebayi anamadoda amatjhumi amabili nabunane,

¹² uJorhanani umsa kaHakhathani eenzukulwaneni zaka-Azigadi anamadoda alikhulu netjhumi,

¹³ u-Elifelethi, uJewuyeli noTjhemaya eenzukulwaneni zaka-Adonikhamu banamadoda amatjhumi asithandathu, (labo-ke bafika muva),

¹⁴ u-Utayi noZakuri eenzukulwaneni zakaBhigivayi banamadoda amatjhumi alikhomba.

¹⁵ Ngababutha sahlangana emseleni ogelezela e-Ahava, lapha safese sahloma khona amatende amalanga amathathu. Kwathi lokha nangihlolisisa abantu nabaphristi, ngafunyana bonyana gade kungekho noyedwa wamaLevi lapho.

¹⁶ Nje-ke ngabiza u-Eliyezeri, u-Ariyeli, uTjhemaya, u-Elinatana, uJaribu, u-Elinatani, uNatani, uZakariya noMetjhulamu okumadoda abarholi anoJoyaribu no-Elinatana amadoda anelwazi.

¹⁷ Ngawathumela ku-Ido okuyindoda emrholi endaweni ecwengileko yeKasifiya. Ngabatjela bona bafese bathini ku-Ido nabafowabo, okuziinsebenzi zethempeli leKasifiya ukuze basithumelele iinsebenzi zendlu kaZimethu.

¹⁸ Kwathi ngesandla esihle sakaZimethu phezu kwethu, basilethela indoda enelihlo, okungeyeenzukulwana zakaMarhili, umsa kaLevi omsa ka-Israyeli. Indoda leyo bekunguTjherebiya akhambisana namadodanakhe kanye namadoda alitjhumi nabunane ekubafowabo.

¹⁹ Godu bekunoRhatjhibiya akhambisana noJosaya weenzukulwana zakaMerari kanye nabafowabo namadodanabo amatjhumi amabili.

²⁰ Babuya baletha amakhulu amabili namatjhumi amabili weensebenzi zethempeli. Lezi bekuziinsebenzi uDavida kanye neenkhulu zakhe ebegade bazahlukanisele ukusiza amaLevi. Boke bebatloliswe ngamabizwabo.

²¹ Khonapho emseleni we-Ahava ngamemezela ukuzila ukudla kobana sizithobe phambi kwakaZimethu ukuze sizifunele ikhambo elihle thina nabantwabethu kanye nepahlethu.

²² Bengineenhloni zokubawa ikosi bonyana ingiphe amajoni nabakhweli beenjomani wokusivikela esitheni endlelenethu ngombana besikhe satjela ikosi sathi: “Isandla esihle sakaZimethu singesilungileko phezu kwabo boke abamfunako, kodwana amandlakhe okutjho ubukhali bakhe bujamelene nabo boke abamfulathelako.”

²³ Nje-ke sazila safuna uZimethu ngalokhu, wezwa isibawo sethu.

²⁴ Ngakhetha abaphristi abalitjhumi nambili ababarholi: uTjherebiya, uRhatjhabiya nabafowabo abalitjhumi.

²⁵ Ngabalinganisela isiliva negolide kanye nezitja okumnikelo wethempeli lakaZimu owanikelwa yikosi nabeluleki bayo, iinkhulu zayo kanye nama-Israyeli woke agade alapho.

²⁶ Ngalinganisa amakhilogremu aziinkulungwana ezimatjhumi amabili nambili zesiliva, izitja zesiliva ezilikhulu ezinobudisi bamakhilogremu amatjhumi asithandathu nabunane kanye namakhilogremu aziinkulungwana ezintathu namakhulu amane wegolide,

²⁷ abomakupuru begolide abamatjhumi amabili abanobudisi obumakhilogremu abunane nesiquntu kanye nezitja ezimbili zekoporo eziligugu njengegolide.

²⁸ Ngathi kibo: “Nina nicwengile kuSomnini uZimu kanti godu nezitja zicwengile. Isiliva negolide kumnikelo wesihle kuSomnini uZimu waboyihlo.

²⁹ Zigadeni nizilonde izintwezi nize niyozilinganisa eJerusalema phambi kwabaphristi abakhulu namaLevi kanye neenhloko zemindeni yakwa-Israyeli ngelawini lokuhlanganela kwabaphristi ethempelini lakaSomnini.”

³⁰ Nje-ke abaphristi namaLevi bathatha izinto zesilinganiso sesiliva negolide kanye nezitja bona bakulethe eJerusalema ethempelini lakaZimu.

³¹ Sasuka-ke emseleni we-Ahava ngelanga letjhumi nambili lenyanga yokuthoma bona siye eJerusalema. Isandla sakaZimu besiphezu kwethu begodu wasisindisa esandleni sesitha nakilaba abasilalela endleleni.

³² Safika-ke eJerusalema lapha saphumula khona amalanga amathathu.

³³ Kwathi ngelanga lesine, salinganisa ngaphakathi kwethempeli lakaZimethu isiliva negolide kanye nezitja. Sakwethula lokho ezandleni zakaMeremothi umphristi omsa ka-Uriya. Yena gade ano-Elazara umsa kaFiniyasi kanye namaLevi uJozabadi umsa kaJetjhuwa noNowadiya umsa kaBhinuyi.

³⁴ Mhlokho koke kwabalwa, kwalinganiswa. Nje-ke isilinganiso sakho koke satlolwa phasi.

³⁵ Abathunjwa ababuyileko ekuthunjweni banikela imihlabelo yokutjhiswa kuZimu wakwa-Israyeli: iinkunzana ezilitjhumi nambili mayelana nama-Israyeli woke, amaqama amatjhumi alithoba nantandathu, iimvana ezimatjhumi alikhomba nalikhomba kanye neempongo zomhlabelo wehlambululo ezilitjhumi nambili. Koke lokho kwaba njengomhlabelo wokutjhiswa kuSomnini.

³⁶ Godu bethula imiyalo yekosi kubazenda bayo nakubabusi besifunda sangetjingalanga yomlambo iYufrathe. Bona basiza abantu nomsebenzi wethempeli lakaZimu.