U-EZRA 7 - IsiNdebele 2012 Translation

Ukufika kwaka-Ezra eJerusalema

¹ Emva kwalokho, emihleni yokubusa kwaka-Aritarhitjhasta ikosi yePheresiya, u-Ezra wathoma umsebenzakhe. Yena gade amsa kaSeraya omsa ka-Azariya, umsa kaRhilikhiya

² omsa kaTjhalumu, umsa kaTsadokhi omsa ka-Arhithubi,

³ umsa ka-Amariya omsa ka-Azariya, umsa kaMerayothi

⁴ omsa kaZerarhiya, umsa ka-Uzi omsa kaBhukhi,

⁵ umsa ka-Abitjhuwa omsa kaFiniyasi, umsa ka-Elazara omsa ka-Aroni umphristi wokuthoma.

⁶ U-Ezra loyo wakhuphuka asuka eBhabheli. Yena bekamtloli osisazi somthetho kaMosi, okumthetho owanikelwa nguSomnini uZimu wakwa-Israyeli. Ikosi yePheresiya beyimnikele koke agade akubawile ngombana isandla sakaSomnini uZimakhe besiphezu kwakhe.

⁷ Godu kwathi ngomnyaka wekhomba wokubusa kwaka-Aritarhitjhasta ikosi, kwakhuphuka eJerusalema abanye bama-Israyeli nabanye babaphristi nebamaLevi, abavumi nabalindisango kanye neensebenzi zethempeli.

⁸ U-Ezra wafika eJerusalema ngenyanga yesihlanu, okumnyaka wekhomba wokubusa kwekosi.

⁹ Lokha inyanga yokuthoma nayinelanga linye wasungula ikhambo lakhe asuka eBhabheli. Kwathi ngelanga lokuthoma enyangeni yesihlanu walibhada eJerusalema. Mbala isandla esihle sakaZimakhe besiphezu kwakhe.

¹⁰ U-Ezra lo bekabeke ihliziywakhe ekufundeni umthetho kaSomnini uZimu nokobana awenze begodu bekazimisele ukufundisa iimiso nemiyalwayo kwa-Israyeli.

¹¹ Naku-ke umkhuphelo wencwadi ikosi u-Aritarhitjhasta awunikela u-Ezra umphristi nomtloli osisazi semiyalo kaSomnini neemiso zakhe mayelana no-Israyeli, uthi:

¹² Incwadi le iphuma ku-Aritarhitjhasta ikosi yamakhosi, iya ku-Ezra umphristi nomfundisi omkhulu womthetho kaZimu wezulwini. Akwande! Nje-ke

¹³ ngikhupha umyalo bona nanyana ngubani wabantu bakwa-Israyeli kungaba baphristi babo namkha amaLevabo embuswenami ofuna ukukhamba aye eJerusalema, angakhamba nawe.

¹⁴ Wena uthunywe yikosi nabeluleki bayo abalikhomba bonyana uyokuhlolisisa kwaJuda neJerusalema bona abantu balandela umthetho wakaZimakho owuphethe esandleni sakho na.

¹⁵ Begodu uthunywe bonyana ukhambise isiliva negolide enikelwe ngesihle yikosi nabeluleki bayo kuZimu wakwa-Israyeli ohlala eJerusalema.

¹⁶ Ukhambe godu nesiliva negolide ozalifunyana kiso soke isifunda seBhabheli kanye neminikelo yoke yesihle enikelwe babantu nabaphristi ngehliziyo etjhaphulukileko mayelana nethempeli lakaZimabo eJerusalema.

¹⁷ Ngesilivelo uthenge ngokuyelela iinkunzana, amaqama neemvana kanye neminikelo yakhona yeenthoro neyokuselwako ukuze unikele ngakho e-aldarini lethempeli lakaZimakho ngeJerusalema.

¹⁸ Nanyana yini ebonakala ilungile kuwe nakubafowenu enithanda ukuyenza ngesiliva negolide eseleko, ningayenza, ikani nje nakungokwentando kaZimenu.

¹⁹ Izitja ezinikelwe wena mayelana nomsebenzi wethempeli lakaZimakho, ufese uzethule eJerusalema.

²⁰ Okunye okudingako mayelana nethempeli lakaZimakho, ongahle uthande ukukusebenzisa nakwenzeka, uzakufunyana esikhwameni sesigodlo.

²¹ Nje-ke mina Aritarhitjhasta ikosi, ngiyala boke abaphathi bezomnotho esifundeni sangetjingalanga yomlambo iYufrathe bonyana nanyana yini u-Ezra umphristi osisazi somthetho kaZimu wezulwini azayidinga kini, anikelwe yona ngaphandle kokuriyada.

²² Kufuze banikele kufikela lapha kuba makhilogremu aziinkulungwana ezintathu namakhulu amane wesiliva, amakhilogremu aziinkulungwana ezilitjhumi nasithandathu namakhulu amahlanu wekoroyi, iinkulungwana ezimbili namakhulu amabili wamalitha wamafutha we-oliva kanye netswayi elingalinganisekiko ngobunengi.

²³ Nanyana yini uZimu wezulwini ayala ngayo, ayenziwe ngokupheleleko mayelana nethempeli lakaZimu wezulwini loyo ukuze ilaka lakhe lingavuthi phezu kombuso wekosi namadodanayo.

²⁴ Godu naziswa bonyana akukavumeleki ukubeka imithelo, iimbiko namkha imali yendlela phezu kwananyana ngiwuphi wabaphristi, amaLevi, abavumi, abalindisango, iinsebenzi zethempeli nanyana ngisiphi isisebenzi sethempeli lakaZimu.

²⁵ Nje-ke wena Ezra, ngokuhlakanipha onakho owakuphiwa nguZimakho, beka abakhokheli nabagwebi abazi imithetho kaZimakho ukuze bagwebe boke abantu ngesifundeni sangetjingalanga yomlambo iYufrathe. Labo abangayaziko imithetho leyo, ubafundise yona.

²⁶ Loyo ongekhe alalele umthetho kaZimakho nomthetho wekosi, akahlunguphazwe khulu, kungaba ngesigwebo sokubulawa, ngokudingiswa, ngokumukwa ipahlakhe namkha ngokubotjhwa.

²⁷ Akudunyiswe uSomnini uZimu wabobaba obeke into enjengale ehliziyweni yekosi bonyana kuhlotjiswe ithempeli lakaSomnini eJerusalema,

²⁸ nowengezelele kimi umusa wakhe ongapheliko phambi kwekosi nebelulekini bayo kanye naphambi kweenkhulu zoke ezinamandla zekosi leyo. Ngiqine idolo ngombana isandla sakaSomnini uZimami besiphezu kwami, nje-ke ngibuthelele amadoda abarholi kwa-Israyeli bonyana akhuphuke kanye nami.