U-EZRA 1 - IsiNdebele 2012 Translation

Umyalo kaKoretjhi wokuvuselelwa kwethempeli eJerusalema

¹ Bekungomnyaka wokuthoma wokubusa kwakaKoretjhi ikosi yePheresiya lokha nakuzaliseka ilizwi lakaSomnini elakhulunywa nguJoromiya. Ngesikhatheso uSomnini wavusa ihliziyo kaKoretjhi ikosi yePheresiya bonyana amemezele embusweni wakhe woke begodu akutlole lokho athi:

² “Nakhu okutjhiwo nguKoretjhi, ikosi yePheresiya: USomnini, uZimu wezulwini, unginikele yoke imibuso yephasi begodu ungiyale bona ngimakhele ithempeli eJerusalema, kwaJuda.

³ Kwanga uZimu angaba nananyana ngubani wabantu bakhe ophakathi kwenu, abuyele eJerusalema kwaJuda, ayokwakha ithempeli lakaSomnini uZimu wakwa-Israyeli, okunguZimu oseJerusalema.

⁴ Nje-ke, akuthi boke abaseleko babantu bakwaJuda, nanyana kukuphi lapha bakhonze khona, izakhamuzi zendawo leyo zibasize ngesiliva negolide nangepahla nefuyo. Godu azibasize ngeminikelo yesihle abazayinikela bona ibe ngeyethempeli lakaZimu eliseJerusalema.”

⁵ Iinhloko zemindeni yakwaJuda nezakwaBhenjamini ngokwezindlu zaboyise, abaphristi namaLevi, okutjho boke uZimu avusa ummoyabo, bazilungiselela bonyana bakhuphuke bayokuvuselela ithempeli lakaSomnini eliseJerusalema.

⁶ Nje-ke, boke abomakhelwana babo babasiza ngezinto zesiliva nezegolide, ngepahla, ngefuyo nangezipho ezikhethekileko, sekungasabalwa yoke iminikelo yesihle eyanikelwako.

⁷ Ikosi uKoretjhi yakhupha nezitja zethempeli lakaSomnini egade zithuthwe nguNebukadinetsari eJerusalema bewazifaka ngethempelini labozinyana bakhe.

⁸ UKoretjhi ikosi yePheresiya yazikhupha ngokuyala uMitiredathi, umphathisikhwama, bonyana azibale bese uzinikela uTjhetjhibhatsari ikosana yakwaJuda.

⁹ Nasi-ke isibalo sezitja: amatjhumi amathathu wezitja zegolide, ikulungwana yezitja zesiliva, amatjhumi amabili nethoba wemikhwa,

¹⁰ amatjhumi amathathu wabomakupuru begolide, amakhulu amane netjhumi labomakupuru besiliva, ikulungwana yezitja ezinye.

¹¹ Sezizoke izitja zegolide nezesiliva beziziinkulungwana ezihlanu namakhulu amane. UTjhetjhibhatsari wathatha izitjezo wakhuphuka nazo lokha abathunjwa nabaphuma eBhabheli bakhutjhulelwa eJerusalema.