U-EKSODUSI 9 - IsiNdebele 2012 Translation

Amatshwenyeko kabhubhani wefuyo

¹ USomnini wathi kuMosi: “Khamba uye kuFaro uthi kuye, ‘Nakhu okutjhiwo nguSomnini uZimu wamaHebheru: Tjhaphulula abantu bami ukuze bangilotjhe.

² Nawala bonyana bakhambe uragele phambili ngokubabambezela,

³ isandla sakaSomnini sizokwehlisela ubhubhani phezu kwefuywakho esemrhuleni: iinjomani, abodumbana, amakamela, iinkomo, izimvu neembuzi.

⁴ Kodwana uSomnini uzakwenza umahluko phakathi kwefuyo yama-Israyeli neyamaGibhide ngendlela yokobana akunasilwana sama-Israyeli esizakufa.

⁵ USomnini ubeke isikhathi wathi: Kusasa uSomnini uzakwenza isigesi enarheni.’ ”

⁶ Ngelanga elilandelako uSomnini wenza isigeso: Yoke ifuyo yamaGibhide yafa, kodwana kuma-Israyeli azange kufe ngitjho nayinye ifuyo.

⁷ UFaro wabikelwa bonyana mbala akunafuyo nayinye yama-Israyeli efileko. Kodwana khonapho ihliziywakhe yayilokhu ikhunyalele. Azange atjhaphulule abantu bona bakhambe.

Amatshwenyeko wamathumba

⁸ USomnini wathi kuMosi no-Aroni: “Rhurhulani umule nge-ondweni ekulu nizalise izandla bese uMosi awurhatjhe emmoyeni phambi kwakaFaro.

⁹ Uzakuphenduka ithuli phezu kweGibhide yoke bese kuqubuka amathumba abhibhidlhako ebantwini neenlwaneni enarheni yoke.”

¹⁰ Yeke barhurhula umule, bajama ngaphambi kwakaFaro. UMosi wawurhatjha emmoyeni, kwaqubuka amathumba abhibhidlhako ebantwini neenlwaneni.

¹¹ Abosomlingo babhalelwa kujama phambi kwakaMosi ngebanga lamathumba ebegade aqubuke kibo nemaGibhideni woke.

¹² Kodwana uSomnini waqinisa ihliziyo kaFaro wangalalela uMosi no-Aroni. Kwaba njengombana uSomnini atjho kuMosi.

Amatshwenyeko wesinanja

¹³ USomnini wathi kuMosi: “Vuka ekuseni, ujamelane noFaro uthi kuye, ‘Nakhu okutjhiwo nguSomnini uZimu wamaHebheru: Tjhaphulula abantu bami, bakhambe ukuze bangilotjhe!

¹⁴ Gadesi khona ngizokumadlha neenkhulu zakho kanye nabantu bakho ngamatshwenyekwami anzima. Ngalokho uzakwazi kuhle bonyana akakho ofana nami ephasinapha.

¹⁵ Iye, ngesikhathesi bekusemandlenami kobana ngiphakamise isandla sami ngikumadlhe wena nabantu bakho ngamatshwenyeko uphele nya ephasini.

¹⁶ Kodwana ngikubabalele ngomnqopho wokukukhombisa amandlami nokobana ibizo lami libatjazwe iphasi loke.

¹⁷ Nawusoloko uphatha abantu bami makghwakghwa ngokubalela bona bakhambe,

¹⁸ ngiyakutjela hi, ngesikhathesi kusasa ngizokwehlisa isinanja esikhulu nesingazange khesibe khona eGibhidapha soloko yaba khona bekube gadesi.

¹⁹ Nje-ke thumela bonyana kubuthwe yoke ifuywakho nakho koke kwakho okusemrhuleni kulethwe esidalasini ngombana isinanja sizakwehlela phezu kwawo woke umuntu nakizo zoke iinlwana ezingakakhoseliswa ezisasabalele emrhuleni, zizakufa ngiyakutjela.’ ”

²⁰ Iinkhulu zakaFaro ezesaba ilizwi lakaSomnini zarhaba zaletha amakhobokazo nefuywazo ngesidalasini.

²¹ Kodwana lezo ezabeba ilizwi lakaSomnini zalisa amakhobokazo nefuywazo emrhuleni.

²² USomnini wathi kuMosi: “Lulela isandla sakho emkayini ukuze isinanja sehlele phezu kweGibhide: phezu kwabantu neenlwana naphezu kwaso soke isivuno emasimini wamaGibhide.”

²³ Lokha uMosi naphakamisela idondolo lakhe emkayini, uSomnini wathumela umdumo nesinanja. Umbani wamekezela ehlabathini, isinanja sarhulukela enarheni yeGibhide.

²⁴ Kwaphambana imibani njalo phakathi kwesiwuruwuru sesinanja. Kwaba yinto engazange kheyibe khona emlandweni woke weGibhide.

²⁵ Kiyo yoke iGibhide isinanja sarhayila koke okusemrhuleni, abantu neenlwana. Sarhayila soke isivuno emasimini, sarwadlha nayo yoke imithi esemmangweni.

²⁶ Kodwana lapha bekuhlala khona ama-Israyeli, eGotjheni, azange kube nesinanja.

²⁷ UFaro wathumela ilizwi bona kubizwe uMosi no-Aroni, wathi kibo: “Awa kwanje khona ngonile. USomnini uqinisile, mina nabantu bami sinephoso.

²⁸ Akhese nithandaze nisirabhelele kuSomnini. Sekwanele kwanjesi ngomdumo osabekako nangesinanja esingaka. Ngizanitjhaphulula-ke, ningasahlala.”

²⁹ UMosi wathi: “Ngizakuthi ngingaphuma ngedorobhenapha, ngilule izandla zami ngithandaze kuSomnini. Umdumo uzakuthula begodu kungasaba nesinanja ukuze wazi bonyana iphasi ngelakaSomnini.

³⁰ Kodwana ngiyazi bonyana wena neenkhulu zakho anikabukwesaba uSomnini uZimu.”

³¹ (Isitjalo selineni nebhali kwarhayileka ngombana ibhali besele iphalazile nesitjalo selineni sithuthumbile.

³² Ikoroyi nesakoroyi nokho azange zirhayileke ngombana zona zivuthwa muva.)

³³ UMosi wasuka kuFaro waphumela ngaphandle kwedorobho. Welulela izandla zakhe kuSomnini, umdumo nesinanja zathula nezulu azange lisawulukela enarheni.

³⁴ Kuthe lokha uFaro nabona bonyana izulu lisile, isinanja nomdumo zithulile, wona godu: Yena neenkhulu zakhe bakhunyalalisa iinhliziyo zabo.

³⁵ Ngaleyondlela ihliziyo kaFaro yaqina, azange atjhaphulule ama-Israyeli. Kwaba njengombana uSomnini atjho ngoMosi.