U-EKSODUSI 8 - IsiNdebele 2012 Translation

Amatshwenyeko weenrhwarhwa

¹ Yeke uSomnini wathi kuMosi: “Khamba uye kuFaro uthi kuye, ‘Nakhu okutjhiwo nguSomnini: Tjhaphulula abantu bami ukuze bangilotjhe.

² Nawala ukubatjhaphulula, ngizakwehlisela inarhakho yoke ngeenrhwarhwa.

³ INayili izakuzala swi ngeenrhwarhwa. Zizakukhuphuka zipharumele ngesigodlweni sakho, zingene ngelawini lakho zimumele umbhedakho, zingene ngeenkumbeni zeenkhulu zakho nebantwini bakho, zizale nangema-ondweni nangezitjeni zakho zokudubela.

⁴ Iinrhwarhwa zizakunamathela wena nabantu bakho kanye neenkhulu zakho zoke.’ ”

⁵ Yeke uSomnini wathi kuMosi: “Tjela u-Aroni elulele isandla sakhe ngedondolo lakhe ngehla kwemilambo yeGibhide okutjho imilanjana yeNayili nemisele bese kuvele iinrhwarhwa zembathe inarha yeGibhide.”

⁶ Nje-ke u-Aroni welulela isandla sakhe ngehla kwamanzi weGibhide. Kwavela iinrhwarhwa zembatha inarha.

⁷ Abosomlingo benza soneso ngemilingwabo. Nabo benza bonyana kube neenrhwarhwa enarheni yeGibhide.

⁸ Yeke uFaro wabiza uMosi no-Aroni wathi kibo: “Ncengani uSomnini bonyana asuse iinrhwarhwakazezi kimapha nebantwini bami, ngizakutjhaphulula ama-Israyeli bonyana ayokuhlabela uSomnini.”

⁹ UMosi wathi kuFaro: “Kukuwe ukubeka isikhathi kobana ngikuncengele neenkhulu zakho kanye nabantu bakho bonyana iinrhwarhwa zinigadunge ngaphandle kwalezo eziphila eNayili.”

¹⁰ UFaro wathi: “Kusasa okusakokhu!” UMosi wathi: “Kuzakuba njengokutjho kwakho ukuze wazi bonyana akakho ofana noSomnini uZimethu.

¹¹ Iinrhwarhwa zizakusuka kuwe, esigodlweni sakho, eenkhulwini nebantwini bakho. Zizakuba seNayili kwaphela.”

¹² Ngemva kobana uMosi no-Aroni basukile kuFaro, uMosi wathandaza kuSomnini malungana neenrhwarhwa azehlisele kuFaro.

¹³ USomnini wenza njengokwesibawo sakaMosi. Iinrhwarhwa ebegade zingeenkumbeni, ngeenrhodlweni nemasimini zafa.

¹⁴ Zabuthelelwa zaba maqubi. Inarha yoke yazala isivunda.

¹⁵ Kodwana uFaro nabona bonyana sele kubetha ummoya, wakhunyalalisa ihliziywakhe, azange alalele uMosi no-Aroni. Kwaba njengokutjho kwakaSomnini.

Amatshwenyeko wemiyani

¹⁶ USomnini wathi kuMosi: “Tjela u-Aroni bonyana aphakamise idondolo lakhe bese ubetha ithuli lehlabathi. Enarheni yoke yeGibhide ithuli lizakuphenduka imiyani.”

¹⁷ Bakwenza-ke lokho. Kwathi lokha u-Aroni nakelula isandla sakhe esiphethe idondolo wabetha ithuli lehlabathi, kwavela imiyani yadumela abantu neenlwana. Loke ithuli enarheni yoke yeGibhide laphenduka imiyani.

¹⁸ Abosomlingo balinga ukuveza imiyani ngemilingwabo, kodwana babhalelwa. Ngokubona bonyana imiyani inamathele abantu neenlwana,

¹⁹ abosomlingo bathi kuFaro: “Lesi sisandla sakaZimu!” Kodwana ihliziyo kaFaro gade iqinile begodu azange alalele. Kwaba njengokutjho kwakaSomnini.

Amatshwenyeko weembawu

²⁰ Yeke uSomnini wathi kuMosi: “Vuka ekuseni ulindele uFaro lokha naya emlanjeni bese uthi kuye, ‘Nakhu okutjhiwo nguSomnini: Tjhaphulula abantu bami ukuze bangilotjhe.

²¹ Nakungasinjalo, ngizokuthumela iwoma leembawu phezu kwakho neenkhulu zakho, phezu kwabantu bakho ngitjho nangesigodlweni sakho. Iinkumba zamaGibhide zizokuzala ngeembawu ngitjho nemasiminawo.

²² “ ‘Kodwana mhlokho ngizokusebenza ngokwahlukileko enarheni yeGotjheni lapha kuhlala khona abantu bami. Angeze kwaba khona iimbawu lapho ukuze nazi bonyana mina Somnini ngisenarheni le.

²³ Ngizakwenza umahluko phakathi kwabantu bami nebakho. Isibonakaliswesi sizokwenzeka kusasa.’ ”

²⁴ Ngambala uSomnini wakwenza lokho. Kwavela iwoma elimabhombo leembawu lamumela isigodlo sakaFaro langena ngeenkumbeni zeenkhulu zakhe. Iimbawezo zabanga umonakalo esifundeni samaGibhide.

²⁵ UFaro wabiza uMosi no-Aroni wathi kibo: “Khambani niyokuhlabela uZimenu khona enarhenapha.”

²⁶ Kodwana uMosi wathi: “Angeze kwalunga lokho. Imihlabelo esiyinikela uSomnini uZimethu izakuba sikghabhudlho emaGibhideni. Nje-ke nasenza imihlabelo ewakghabhudlhako azasikhanda ngamatje!

²⁷ Kumele sikhambe ikhambo lamalanga amathathu erhalawumbeni kobana sihlabele uSomnini uZimethu njengombana asiyala.”

²⁸ UFaro wathi: “Awa yeke, mina ngiyanitjhaphulula bonyana nihlabele uSomnini uZimenu erhalawumbeni, kodwana ningayi kude. Yeningithandazeleni-ke.”

²⁹ UMosi wathi: “Ngizakuthi bona ngisuke lapha, ngithandaze kuSomnini, kuzakuthi kusasa iimbawu zisuke kuFaro neenkhulwini zakhe kanye nebantwini. Kodwana uFaro aqinisekise bonyana akenzi ubuqili godu ngokwalela abantu bonyana bayokuhlabela uSomnini.”

³⁰ UMosi wasuka kuFaro, wafese wathandaza kuSomnini.

³¹ USomnini wenza njengokwesibawo sakaMosi: Iimbawu zasuka kuFaro neenkhulwini nebantwini bakhe. Azange kusale ngitjho nasinye.

³² Kodwana nagadesi uFaro wakhunyalalisa ihliziyo, azange atjhaphulule ama-Israyeli.