U-EKSODUSI 7 - IsiNdebele 2012 Translation

¹ Yeke uSomnini wathi kuMosi: “Qala, ngikwenze waba njengoZimu kuFaro, umfowenu u-Aroni uzakuba mphorofidakho.

² Wena uzakufanela bonyana ukhulume yoke into engikuyale ngayo, umfowenu u-Aroni yena atjele uFaro bona atjhaphulule ama-Israyeli aphume enarhenakhe.

³ Mina ngizaqinisa ihliziyo kaFaro, nanyana ngingabuyelela iimbonakaliso nemikarisomraro yami eGibhide,

⁴ angeze anilalela. Kodwana ngizakubeka isandla sami phezu kweGibhide bese kuthi ngesigwebo sami esikhulu ngikhuphe abantu bami ama-Israyeli barhwante ngeengaba zabo.

⁵ Ngalokho amaGibhide azakwazi bonyana nginguSomnini lokha nangelula isandla sami ngokujamelana neGibhide ngikhuphe ama-Israyeli kiyo.”

⁶ UMosi no-Aroni benza poro njengombana uSomnini abayalile.

⁷ UMosi gade aneminyaka ematjhumi abunane, u-Aroni anamatjhumi abunane namithathu lokha nabakhuluma noFaro.

⁸ USomnini gade athe kuMosi no-Aroni:

⁹ “Lokha uFaro nathi kuwe, ‘Zibonakaliseni ngokwenza umkarisomraro’, wena uthi ku-Aroni, ‘Thatha idondolo lakho uliphosele phasi ngaphambi kwakaFaro’, yeke lizakuba yinyoka.”

¹⁰ Kwathi lokha uMosi no-Aroni nabaya kuFaro bona benze njengombana uSomnini abayalile, u-Aroni waphosela idondolo lakhe phasi ngaphambi kwakaFaro neenkhulu zakhe. Idondolwelo laphenduka inyoka.

¹¹ UFaro wabiza abosiyazi nabaloyi. Abosomlingo beGibhidabo benza soneso ngemilingwabo.

¹² Omunye nomunye wabo waphosela idondolo lakhe phasi, amadondolo lawo aphenduka iinyoka. Kodwana idondolo laka-Aroni laginya wamaGibhide.

¹³ Khonapho ihliziyo kaFaro yaqina, azange alalele uMosi no-Aroni. Kwaba njengokutjho kwakaSomnini.

Amatshwenyeko weengazi

¹⁴ USomnini wathi kuMosi: “Ihliziyo kaFaro ikhunyalele, walela abantu bonyana bakhambe.

¹⁵ Khamba uye kuFaro ekuseni ngesikhathi sokuphuma kwakhe ukuya emlanjeni. Mlinde edongeni lomlambo iNayili umhlangabeze lapho. Uphathe idondolo elaphenduka inyoka,

¹⁶ uthi kuye, ‘USomnini uZimu wamaHebheru wangithuma bona ngikutjele utjhaphulule abantu bakhe bakhambe ukuze bamlotjhe erhalawumbeni. Kodwana azange ulalele bekube gadesi.

¹⁷ Godu uSomnini ungitjele bona uzakwazi bonyana unguSomnini ngalokhu okuzakwenzeka nje: Ngedondolo elisesandleni sami ngizobetha amanzi weNayili bese aphenduka iingazi.

¹⁸ Iinhlambi eziseNayili zizakufa bese umlambo uba nesivunda, amaGibhide azakubhalelwa kusela amanzi weNayili.’ ”

¹⁹ USomnini wabuya wathi kuMosi: “Tjela u-Aroni athathe idondolo lakhe elulele isandla sakhe ngehla kwamanzi weGibhide, phezu kwemilambo yakhona, okutjho imilanjana yeNayili, iintete nazo zoke izinto eziphatha amanzi. Woke amanzi azakuba ziingazi. Kuzakuba neengazi yoke indawo eGibhide, ngitjho nangakizo zoke izitja zesigodo nezamatje.”

²⁰ UMosi no-Aroni benza poro njengombana uSomnini abayalile. Waphakamisa idondolo lakhe phambi kwakaFaro neenkhulu zakhe wabetha amanzi weNayili, nje-ke woke amanzi ajika aba ziingazi.

²¹ Iinhlambi ngeNayili zafa, umlambo waba nesivunda kangangobana amaGibhide azange akwazi ukusela amanzi wakhona. Kwazala iingazi iGibhide yoke.

²² Kodwana abosomlingo beGibhide nabo benza soneso ngemilingwabo. Ngalokho ihliziyo kaFaro yakhunyalala, azange alalele uMosi no-Aroni. Kwaba njengombana uSomnini bekatjhwile.

²³ UFaro wafulathela waziyela esigodlweni sakhe, wakubetha mthalazeni okwenzakeleko.

²⁴ AmaGibhide woke emba eqadi kweNayili bona azifunyanele amanzi wokusela ngombana bekungakghoneki ukusela amanzi wemilambo.

²⁵ Amatshwenyeko wokuthoma athatha amalanga alikhomba kusukela mhlana uSomnini amadlha iNayili.