U-EKSODUSI 6 - IsiNdebele 2012 Translation

¹ USomnini wathi kuMosi: “Uzakubukela kwanjesi bonyana ngizomenzani uFaro: Ngebanga lesandla sami esinamandla uzatjhaphulula ama-Israyeli; iye, ngesandla sami esinamandla awaqotjhe enarhenakhe le.”

² UZimu godu wakhuluma noMosi wathi: “NginguSomnini.

³ Ngaziveza ku-Abrahamu, u-Isaka nakuJakopo njengoZimu oSabekako, kodwana angizange ngibazise ibizo lami elithi Somnini.

⁴ Godu ngenza isivumelwano sami nabo kobana ngibaphe inarha yeKanana lapha bakhonza khona njengamaphandle.

⁵ Ngambala ngikuzwile ukububula kwama-Israyeli akhobongwe maGibhide, yeke ngisikhumbulile isivumelwano sami.

⁶ “Ngalokho tjela ama-Israyeli uthi, ‘NginguSomnini begodu ngizonikhupha emsebenzini okatelelako wamaGibhide. Nginitjhaphulule ekubeni makhobokawo, nginihlenge ngomkhono olulekileko nangokugweba amaGibhide ngesigwebo esikhulu.

⁷ Ngizanenza isizwe sami, mina ngibe nguZimenu. Ngalokho nizakwazi bonyana nginguSomnini uZimenu owanikhupha emsebenzini okatelelako wamaGibhide.

⁸ Ngizanisa enarheni engayifungela ngokuphakamisa isandla sami kobana ngiyiphe u-Abrahamu, u-Isaka noJakopo. Ngizanipha yona kube lilifa lenu lasafuthi. NginguSomnini.’ ”

⁹ UMosi wabikela ama-Israyeli indaba le, kodwana azange amlalele ngombana gade anyamile ngebanga lokugandelelwa kwawo.

UZimu uyala uMosi bona ayokhuluma noFaro godu

¹⁰ USomnini wakhuluma noMosi wathi:

¹¹ “Khambani niyokutjela uFaro ikosi yeGibhide bonyana atjhaphulule ama-Israyeli aphume enarheni le.”

¹² Kodwana uMosi wathi kuSomnini: “Kosami, ama-Israyeli akangilaleli, alo uFaro yena uzangilalela njani-ke? Mina angisiso isikhulumi.”

¹³ Nje-ke uSomnini wakhuluma noMosi no-Aroni babobabili, wabayala ngama-Israyeli noFaro ikosi yeGibhide bonyana kufuze bona ama-Israyeli aphume eGibhide.

Umndeni kaMosi nowaka-Aroni

¹⁴ UMosi no-Aroni gade bangebemindeni elandelako: URubeni bekalizibulo laka-Israyeli. Amadodana kaRubeni kungu-Inogo noPalu, uRhetsironi noKarimi. Bona bebaziinhloko zemindeni kaRubeni.

¹⁵ USimiyoni bekalama uRubeni. Amadodana kaSimiyoni kunguJemuweli, uJamini, u-Ohadi, uJakini, uTsorhari noSawula indodana yomfazi weKanana. Bona bebaziinhloko zemindeni kaSimiyoni.

¹⁶ ULevi bekalama uSimiyoni. Lawa bekumabizo wamadodana kaLevi ukuya ngokutloliswa kwawo: uGeritjhoni, uKhehathi noMerari. ULevi waphila iminyaka elikhulu namatjhumi amathathu namikhomba.

¹⁷ Iinzukulwana zakaGeritjhoni bekunguLibhina noTjhimeyi nemindenabo.

¹⁸ Amadodana kaKhehathi bekungu-Amramu, uJitsihari, uRhebroni no-Uziyeli. UKhehathi waphila iminyaka elikhulu namatjhumi amathathu namithathu.

¹⁹ Amadodana kaMerari bekunguMarhili noMutjhi. Bona bebamindeni edabuka kuLevi.

²⁰ U-Amramu wathatha ukghariyakhe uJokobedi bona abe mkakhe. Yena wambelethela u-Aroni noMosi. U-Amramu waphila iminyaka elikhulu namatjhumi amathathu namikhomba.

²¹ Amadodana kaJitsihari bekunguKhorarhi, uNefegi noZikiri.

²² Amadodana ka-Uziyeli bekunguMitjhayeli, u-Elitsafana noSitiri.

²³ U-Aroni wathatha u-Elitjheba indodakazi ka-Aminadaba nongudadwabo kaNarhitjhoni. Wambelethela uNadabi no-Abihu, u-Elazara no-Itamara.

²⁴ Amadodana kaKhorarhi bekungu-Asiri, u-Elikhana no-Abiyasafi. Bona bebaziinzukulwana zakaKhorarhi.

²⁵ U-Elazara indodana ka-Aroni wathatha enye yamadodakazi kaPuthiyeli. Indodakazi leyo yambelethela uFiniyasi. Bona bebaziinhloko zemindeni yamaLevi neenzukulwana zabo.

²⁶ U-Aroni noMosi okukhulunywe ngabo lapha, ngibo uSomnini athi kibo: “Khuphani ama-Israyeli eGibhide ngombana agandelelwe ngomsebenzi.”

²⁷ Ngibo abo-Aroni noMosi abakhuluma noFaro ikosi yeGibhide bona akhuphe ama-Israyeli eGibhide.

Umyalo kaZimu kuMosi

²⁸ Lokha uSomnini nakhuluma noMosi eGibhide,

²⁹ wathi kuye: “NginguSomnini. Tjela uFaro ikosi yeGibhide koke engikutjele khona.”

³⁰ Kodwana uMosi wathi kuSomnini: “Kosami, mina angisiso isikhulumi. Alo, uFaro yena uzangilalela njani?”