U-EKSODUSI 5 - IsiNdebele 2012 Translation

UFaro walela ama-Israyeli bona alotjhe uSomnini

¹ Ngemva kwalokho uMosi no-Aroni baya kuFaro bathi: “Nakhu okutjhiwo nguSomnini uZimu wakwa-Israyeli, ‘Tjhaphulula abantu bami bakhambe ukuze bangenzele umnyanya erhalawumbeni.’ ”

² UFaro wathi: “Bekangubani uSomnini wakhona loyo bonyana ngingabeze ngimlalele ngitjhaphulule ama-Israyeli? Angimazi uSomnini loyo, ngalokho ngithi nakuma-Israyeli akayi ndawo!”

³ Yeke bathi: “UZimu wamaHebheru ubonene nathi. Nje-ke sibawa usivumele sikhambe ikhambo lamalanga amathathu erhalawumbeni siyokuhlabela uSomnini uZimethu. Nakungasinjalo uzasirhadla ngamatshwenyeko namkha ngepi.”

⁴ Kodwana ikosi yeGibhide yathi kibo: “Wena Mosi nawe Aroni, kubayini nifune ukususa abantu emsebenzinabo? Buyelani emsebenzinenu!”

⁵ UFaro waraga wathi: “Qalani bona abantu benu banengi kangangani enarhenapha, kodwana khonapho nina nifuna ukujamisa abasebenzako.”

⁶ Khona mhlokho uFaro wayala abatjhotjhozeli babantu neenduna zabo wathi:

⁷ “Ningasanikela abantu amawunguwungu wekoroyi ukwenza iintina. Abakhambe bayozifunela wona.

⁸ Kodwana nibatjele benze inani leentina elilingana nelaphambilini, ningehlisi inani abafanele balenze ngelanga. Bayadonda abantwaba, ngikho bangenana ngendlebeni nje hlebasithi, ‘Sitjhaphulula siyokuhlabela uZimethu.’

⁹ Yenzani umsebenzi ube nzima phezu kwendoda kunekuthomeni ukuze basebenze, bangalokhu balalele amala.”

¹⁰ Yeke abatjhotjhozeli neenduna zaphuma zaya ebantwini zathi kibo: “UFaro uthi angeze abe asaninikela amawunguwungu wekoroyi.

¹¹ Nizakufanela bonyana niyozifunela nanyana kukuphi lapha niwafumana khona. Kodwana umsebenzenu angeze wancitjhiswa nakancani.”

¹² Nje-ke abantu basabalala nenarha yeGibhide yoke bona babuthelele amahlengelo wotjani esikhundleni samawunguwungu wekoroyi.

¹³ Abatjhotjhozeli babahlala entanyeni balokhu basithi: “Qedani umsebenzenu wangamalanga ulingane nalokha nanisanikelwa amawunguwungu wekoroyi.”

¹⁴ Iinduna zakwa-Israyeli ezakhethwa batjhotjhozeli bakaFaro zadulwa bekwathiwa kizo: “Kubayini ningakafikeleli esibalweni esibekiweko seentina namhlanjesi njengombana benenza phambilini?”

¹⁵ Iinduna zakwa-Israyeli zakhamba zayokumangala kuFaro zathi: “Kubayini uFaro aphathe iinceku zakhe ngalendlela?

¹⁶ Iinceku zakhe azisaphiwa amawunguwungu wekoroyi kodwana khonapho kuthiwa asenze iintina; qala bona zidulwa kangangani. Into esiyenziwe babantu bakaFaro le ayisiyihle.”

¹⁷ UFaro wathi: “Arha sukanapha mavila ndina! Niphethwe buvila! Ngikho nilokhu ningifundekela nithi, ‘Sivumela siyokuhlabela uSomnini.’

¹⁸ Ayiye, buyelani emsebenzinenu! Anisazokunikelwa amawunguwungu wekoroyi kodwana kumele nenze inani elifunekako leentina.”

¹⁹ Amezwi kaFaro wokuthi, “Ninganciphisi isibalo seentina okumele nizenze ngelanga” enza iinduna zakwa-Israyeli zabona bonyana zisemrarweni.

²⁰ Kuthe lokha nazisuka kuFaro, zazithela kuMosi no-Aroni bazilindele,

²¹ zathi: “USomnini ukubonile enikwenzileko. Uzonigweba! Nisenze saba nyamanambana kuFaro neenkhulu zakhe nabeka isabula esandleni sabo bona basibulale!”

UZimu uthembisa ukusindisa ama-Israyeli

²² UMosi wabuyela kuSomnini wathi: “Maye! Kubayini uSomandla ehlisele amatshwenyeko phezu kwabantwaba? USomandla ungithumeleleni lapha?

²³ Soloko ngaya kuFaro bona ngikhulume ebizweni lakaSomnini, ngambala uFaro uwurubaja abantwaba. USomnini akazange alamulele abantu bakhe.”