U-EKSODUSI 40 - IsiNdebele 2012 Translation

Ukujanyiswa kwethaberinakeli

¹ USomnini wathi kuMosi:

² “Jamisa ithaberinakeli okutjho itende lokuhlanganela ngelanga lokuthoma lenyanga yokuthoma.

³ Faka ngaphakathi kwalo umfaji wobufakazi bese uwusitha ngesiyaya.

⁴ Ungenise itafula bewuhlele koke kuhle phezu kwalo. Ngenisa nelithi leembani bese uhlela iimbani zalo.

⁵ Ubeke i-aldari legolide lokutjhisela itjhwalo phambi komfaji wobufakazi bese ulembelelisa itjhila lomnyango wethaberinakeli.

⁶ Ujamise i-aldari lomhlabelo wokutjhiswa ngaphandle komnyango wethaberinakeli okutjho itende lokuhlanganela.

⁷ Ubeke isitja sokuhlambela hlangana netende lokuhlanganela ne-aldari bese uthela amanzi ngaphakathi kwaso.

⁸ Wakhe isirhodlo magegana nethaberinakeli bese ulembelelisa itjhila esangweni lesirhodlweso.

⁹ Thatha amafutha uzese ithaberinakeli nakho koke okungaphakathi kwalo, ulihlukanisele kanye nepahlalo yoke engaphakathi; lizakuba ngelicwengileko.

¹⁰ Uzese ne-aldari lomhlabelo wokutjhiswa kanye neensetjenziswa zalo zoke, ulihlukanisele, nje-ke lizakuba ngelicwenge khulu.

¹¹ Godu uzese nesitja sokuhlambela kanye nesinzinziso sakhona, usihlukanisele.

¹² Ngemva kwalokho kuze u-Aroni namadodanakhe emnyango wetende lokuhlanganela bese ubahlambulula ngamanzi.

¹³ Wembathise u-Aroni izambatho ezikhethekileko bese uyamzesa umhlukanisele ukuze abe mphristami.

¹⁴ Utjhideze namadodanakhe, uwembathise iimphuraphura

¹⁵ bese uwazesa njengombana uzese uyisawo ukuze abe baphristi bami. Ukuzeswa kwawo kuzawenza abe baphristi nini nanini eenzukulwaneni zawo.”

¹⁶ UMosi wenza koke njengombana uSomnini bekamyalile.

¹⁷ Nje-ke kwathi ngelanga lokuthoma enyangeni yokuthoma emnyakeni wesibili, ithaberinakeli lajanyiswa.

¹⁸ UMosi wajamisa ithaberinakeli ngokuthoma ukubeka amanzinziswalo, amahlakalo, iinqabo neensika zalo.

¹⁹ Yeke wendlala itende phezu kwamahlaka wethaberinakeli waleka itendelo ngezembeso zakhona njengombana uSomnini bekamyalile.

²⁰ Wathatha imiqebethu yobufakazi wayifaka ngemfajini, wawufakela iingodo zokuwuthwala, wabeka isisibekelo somfaji ngaphezu kwawo.

²¹ Khonapho wangenisa umfaji lowo ngethaberinakelini wabese ulembelelisa isiyaya setjhila lokusitha umfaji wobufakazi njengombana uSomnini bekamyalile.

²² Wabeka itafula ngetendeni lokuhlanganela ngetlhagwini yethaberinakeli ngaphandle kwendawo esithwe ngesiyaya.

²³ Wahlela kuhle phezu kwalo izikwa ezibekwa phambi kwakaSomnini njengombana uSomnini bekamyalile.

²⁴ Wabeka nelithi leembani ngetendeni lokuhlanganela, laba malungana netafula ngesewula,

²⁵ wahlela neembani zalo phambi kwakaSomnini njengombana bekamyalile.

²⁶ Godu uMosi wabeka i-aldari legolide ngetendeni lokuhlanganela, laba ngaphambi kwesiyaya sendawo ecwenge khulu,

²⁷ watjhisela phezu kwalo amakha wetjhwalo njengombana uSomnini bekamyalile.

²⁸ Nje-ke walembelelisa itjhila lomnyango wethaberinakeli.

²⁹ Wajamisa i-aldari lomhlabelo wokutjhiswa ngaphandle komnyango wethaberinakeli okutjho itende lokuhlanganela, watjhisa phezu kwalo umhlabelo wokutjhiswa nomnikelo weenthoro njengombana uSomnini bekamyalile.

³⁰ Wabeka isitja sokuhlambela hlangana netende lokuhlanganela ne-aldari lomhlabelo wokutjhiswa, wabese uthela amanzi wokuhlambulula ngaphakathi kwaso.

³¹ Nje-ke uMosi, u-Aroni namadodanakhe bahlambulula izandla neenyawo zabo ngesitjenapho.

³² (Bekuthi njalo ngaphambi kobana bangene ngetendeni lokuhlanganela nalokha nabatjhidela e-aldarini, bazihlambulule njengombana uSomnini bekayale uMosi.)

³³ UMosi wabuye wakha isirhodlo magegana nethaberinakeli ne-aldari bewalembelelisa itjhila esangweni lesirhodlweso. Wawuqeda njalo-ke uMosi umsebenzi.

Ithaberinakeli nephazimulo kaSomnini

³⁴ Ilifu lembatha itende lokuhlanganela, iphazimulo kaSomnini yazala ithaberinakeli.

³⁵ Ngebanga lokobana ilifu belembethe itende lokuhlanganela nephazimulo kaSomnini izele ithaberinakeli, uMosi akhange akghone ukungena ngetendenapho.

³⁶ Kilo loke ikhambo lama-Israyeli erhalawumbeni, begade afuduka aragela phambili kwaphela lokha ilifu nalikhuphuka lisuka ethaberinakelini.

³⁷ Ngalokho gade ahlala bekube kumhlana ilifu likhuphukako. Ilifu lingakakhuphuki bekangakhambi.

³⁸ Iye, ilifu lakaSomnini gade liba sethaberinakelini emini, kuthi ebusuku libe mlilo ngaphakathi kwalo. Woke ama-Israyeli akubona lokho kilo loke ikhambo lawo erhalawumbeni.