U-EKSODUSI 4 - IsiNdebele 2012 Translation

Iimbonakaliso uZimu azinikela uMosi

¹ UMosi waphendula wathi: “Bahlumba ukungikholwa namkha ukungilalela bese bathi, ‘Sukapha wena! AkunaSomnini okhe waziveza kuwe.’ ”

² USomnini wathi kuye: “Uphetheni kuwapho?” UMosi wathi: “Ngiphethe idondolo.”

³ USomnini wathi: “Liphosele phasi.” UMosi waliphosela phasi laphenduka inyoka. Kuthe lokha uMosi nayibalekelako,

⁴ uSomnini wathi kuye: “Lula isandla sakho uyibambe ngomsila!” Yeke uMosi welula isandla sakhe wayibamba, yabuya yaphenduka idondolo esandleni sakhe.

⁵ USomnini wathi: “Naso-ke isibonakaliso ukuze bakholwe bonyana uSomnini uZimu waboyisemkhulu, uZimu ka-Abrahamu, u-Isaka noJakopo uziveze kuwe.”

⁶ Godu uSomnini wathi: “Faka isandla sakho esifubeni.” UMosi wenza njalo, kwathi lokha nasikhuphako sabe sikghamathele ikhwekhwe simhlophe inga sithwathwa.

⁷ USomnini wathi: “Sibuyisele esifubeni.” UMosi wasibuyisela, kwathi lokha nasikhuphako sabe sele silaphekile sifana nesinye.

⁸ USomnini waraga wathi: “Nayibe abakukholwa namkha abathatheki ngesibonakaliso sokuthoma, bazakukholwa sesibili.

⁹ Kodwana nayibe abazikholwa zombili iimbonakaliswezo namkha abakulaleli, yikha amanzi eNayili uwathele equlwanini. Amanzi owakhe emlanjeni azakuphenduka iingazi equlwanini.”

¹⁰ UMosi wathi kuSomnini: “Maye Kosami! Mina angisisikhulumi, azange khengibe ngiso nesikhathini esidlulileko, ngitjho nanje njengombana uSomnini athome ukukhuluma nencekwakhe nje. Ngiyangunguza godu ngikhuluma sidondi.”

¹¹ USomnini wathi kuye: “Ngubani owenze umuntu bona akhulume? Ngubani omenza bona abe simumu namkha angezwa? Ngubani omenza abone namkha abe siphofu? Akusimi mina Somnini na?

¹² Nje-ke ngena indlela, ngizakusiza ukukhuluma bengikufundise nalokho ozokukhuluma.”

¹³ Kodwana uMosi wathi: “Awu, Kosami! Ngiyakubawa, bengithi uSomnini akhe athume omunye.”

¹⁴ USomnini wathukuthelela uMosi wathi: “Angitjho unomfowenu u-Aroni umLevi? Ngiyazi bonyana yena ukghona ukukhuluma kuhle. Sele asendleleni uzokuhlangabeza, ihliziywakhe izokuthaba nakubonako.

¹⁵ Uzakhuluma naye umfunze ngamagama; ngizanisiza nobabili ukukhuluma benginifundise nenifanele nikwenze.

¹⁶ Nguye ozakukhuluma nabantu esikhundleni sakho. Yena uzakuba mlomakho, wena ube njengoZimu kuye.

¹⁷ Thatha idondolwelo ukuze wenze ngalo iimbonakaliso.”

UMosi ubuyela eGibhide

¹⁸ UMosi wabuyela kumkhwe wakhe uJetero wathi kuye: “Bengithi ngitjhaphulula ngiye ebantwini bekhethu eGibhide ngiyobabona bonyana basaphile kuhle na.” UJetero wathi: “Goduka, inga izinto zingakukhambela kuhle.”

¹⁹ USomnini watjela uMosi asese seMidiyani wathi: “Buyela eGibhide ngombana boke abantu ebegade bafuna ukukubulala sebafile kwanjesi.”

²⁰ Yeke uMosi wathatha umkakhe namadodanakhe, wabakhweza kudumbana wanqomba eGibhide. Waphatha nedondolo lakaZimu.

²¹ USomnini wathi kuMosi: “Lokha nawubuyela eGibhide, qinisekisa bonyana wenza phambi kwakaFaro yoke imikarisomraro engikunikele amandla bonyana uyenze. Kodwana ngizakukhunyalalisa ihliziywakhe ukuze angavumi bonyana abantu batjhaphuluke bakhambe.

²² Bese uthi kuFaro, ‘Nakhu okutjhiwo nguSomnini: U-Israyeli yindodanami elizibulo;

²³ ngikutjele ngathi utjhaphulule indodanami leyo kobana ikwazi ukungilotjha. Kodwana nawunghanghabalako, yazi bonyana ngizokubulala indodanakho elizibulo.’ ”

²⁴ Kwathi endleleni, endaweni yokulala, uSomnini weza kuye wafuna ukumbulala.

²⁵ Kodwana uTsiphora wathatha ilitje elibukhali watsepunya ijwabu lendodanakhe, wathinta uMosi ngejwabelo ebudodeni bakhe wathi: “Ngambala kimi ungovikeleke ngeengazi!”

²⁶ Watjho lokho akhomba ukusoka. Yeke uSomnini wamlisa.

²⁷ USomnini wathi ku-Aroni: “Khamba uye erhalawumbeni uyokuhlangabeza uMosi.” Yeke wahlangana noMosi entabeni kaZimu wamncwanga emhlathini.

²⁸ UMosi watjela u-Aroni koke uSomnini amthume bona akutjho, nangazo zoke iimbonakaliso amlayele bonyana azenze.

²⁹ UMosi no-Aroni bakhamba, babizela ndawonye boke abaphathi bakwa-Israyeli.

³⁰ U-Aroni wafese wabatjela koke uSomnini akukhulume kuMosi. Godu wenza neembonakaliso phambi kwabantu,

³¹ yeke bakholwa. Kuthe lokha nabezwa bonyana uSomnini utshwenyekile ngabo nokobana ubonile isizi labo, badumisa ngokuguqa bahlome iinhloko phasi.