U-EKSODUSI 39 - IsiNdebele 2012 Translation

Ukwenziwa kwezambatho zabaphristi

¹ Abantu abanobukghoni benzela abaphristi izambatho zokulotjha endaweni ecwengileko. Izambathwezo bezithungwe ngewulu ehlaza komkayi, ebubende netlerebede. Godu benzela u-Aroni izambatho ezikhethekileko njengombana uSomnini bekayale uMosi.

² Benza i-efodi ngelineni emhlophe ethungwe ngemicwana yegolide nangewulu ehlaza komkayi, ebubende netlerebede.

³ Bebakhande igolide laba sipara balisika imicwana kobana balithungelele ngobukghoni ewulwini ehlaza komkayi, ebubende netlerebede kanye nelinenini emhlophe.

⁴ Benza imitletle yamahlombe kobana ihlanganise ingcenye ye-efodi yangemuva neyangaphambili emphethweni.

⁵ Ibhande lokuyibopha elithungelelwe kiyo nalo gade lenziwe ngelineni emhlophe ethungwe ngemicwana yegolide nangewulu ehlaza komkayi, ebubende netlerebede njengombana uSomnini ayala uMosi.

⁶ Balungisa amatje amabili we-oniksi: Batlola ngokugobhodlha amabizo wamadodana ka-Israyeli ematjeni lawo njengombazi natlola elitjeni lokugiba, bawaphetha ngemicwana yegolide.

⁷ Bawabeka phezu kwemitletle yamahlombe we-efodi kobana abe mamatje wesikhumbuzo wamadodana ka-Isayeli njengombana uSomnini bekayale uMosi.

⁸ Benza ngobukghoni iporiyana yomphristi omkhulu yafana nangendlela ekwenziwe ngayo i-efodi: ngelineni emhlophe ethungwe ngemicwana yegolide nangewulu ehlaza komkayi, ebubende netlerebede.

⁹ Gade ilingana mahlangothi woke nayibhinciweko, imasentimitha amatjhumi amabili nambili ubude nobubanzi.

¹⁰ Bafaka amarhemo amane wamatje aligugu: Irhemo lokuthoma belinerubi, ithophazi ne-emeraldi;

¹¹ irhemo lesibili belinesimaragidu, isafaya nedayimani;

¹² irhemo lesithathu belinehiyasinthi, i-agatha ne-ametisthi;

¹³ irhemo lesine belinebherili, i-oniksi nejasipere. Woke amatje lawo gade arutjelwe ngemicwana yegolide

¹⁴ anamabizo wamadodana ka-Israyeli. Bekanjengamatje wokugiba, enye nenye ikoro kezilitjhumi nambili beyitlolwe ngokugobhodlhwa elitjeni layo.

¹⁵ Benza iinketanyana ezimbili zegolidembala ezilukwe njengemicwana, bazibophelela eporiyaneni nganasi indlela:

¹⁶ Benza amasongo amabili wegolide, bawarubela ngemicwana yegolide. Bathungelela amasongo lawo emajikeni angehla weporiyana.

¹⁷ Bafaka iinketanyana ezimbili zegolide ngemasongweni amabili emajikeni weporiyana.

¹⁸ Babopha amaphelelo weenketanyana ezimbili emphethweni orutjelweko wamatje asemtletleni we-efodi emahlombeni ukuze iporiyana ibe sesifubeni.

¹⁹ Benza amasongo amanye amabili wegolide, bawathungelela emajikeni amanye angaphasi womphetho weporiyana.

²⁰ Godu benza amanye amasongo amabili wegolide, bawathungelela ngaphambili phasi emitletleni yamahlombe hlanu kwalapha ihlangana khona ne-efodi ngehla kwebhande.

²¹ Babophelela amasongo weporiyana emasongweni we-efodi ngomtiya ohlaza komkayi kobana ube ngehla kwebhande le-efodi. Benza njalo bonyana iporiyana ingatjhaphuluki isuke e-efodini. Kwaba njengombana uSomnini ayala uMosi.

²² Godu benza ijasi elukwe ngokuhlaza komkayi koke, yakhambisana ne-efodi.

²³ Phakathi nendawo beyinentamo ithungelelwe umphetho olukiweko ofana nowesambatho sepi ukuze ingadabuki.

²⁴ Emphethweni wejasi ngenzasi benza amarharinada ngokutatela iwulu ehlaza komkayi, ebubende netlerebede.

²⁵ Godu benza iinkhencezo ngegolidembala bazibeka hlangana namarharinada phezu komphetho wejasi magegana nawo phakathi kwamarharinada.

²⁶ Kwaba sikhencezo nerharinada, godu isikhencezo nerharinada njalo njalo magegana nomphetho wejasi yokulotjha, njengombana uSomnini ayala uMosi.

²⁷ Benzela u-Aroni namadodanakhe iimphuraphura ezilukwe ngelineni emhlophe,

²⁸ ingwani yomphristi omkhulu yelineni emhlophe nemibhode yabaphristi, iindzeredzere zelineni kanokutjho

²⁹ kanye nomkhungo wokuthekeleza welineni ekhethekileko ethungwe ngewulu ehlaza komkayi, ebubende netlerebede njengombana uSomnini ayala uMosi.

³⁰ Godu benza nethuthumbo legolidembala okutjho isihlohlo esahlukaniselweko, batlola phezu kwaso amagama anjengawomgobhodlho wesigibo athi, “Ohlukaniselwe uSomnini”.

³¹ Babophelela kiso umtiya ohlaza komkayi kobana basibophelele engwanini ngaphambili njengombana uSomnini ayala uMosi.

Umsebenzi wamalungiselelo wokwakhiwa kwethaberinakeli uyaphethwa

³² Ngaleyondlela woke umsebenzi mayelana nethaberinakeli okutjho itende lokuhlanganela, waphethwa. Ama-Israyeli enza ngakho koke uSomnini agade ayale uMosi ngakho.

³³ Abantu baletha kuMosi ithaberinakeli okutjho itende nazo zoke izitja zakhona, iinqobotjhelo zalo, amahlaka, iinqabo, iinsika, amanzinziso,

³⁴ isembeso esenziwe ngeenkhumba zamaqama ezifakwe umbala obovu nesinye isembeso esenziwe ngeenkhumba ezitjhukiweko bezazeswa ngamafutha, isiyaya esilitjhila lomnyango,

³⁵ umfaji wobufakazi neengodo zawo nesisibekelo,

³⁶ itafula nazo zoke izitja zakhona, izikwa ezibekwa phambi kwakaZimu,

³⁷ ilithi leembani legolidembala neembani zakhona, zoke izitja zakhona namafutha weembani,

³⁸ i-aldari legolide, amafutha wokuzesa, amakha wetjhwalo, itjhila lomnyango wetende,

³⁹ i-aldari lekoporo nomsefo walo wekoporo, iingodo zakhona, nazo zoke izitja zakhona, isitja sokuhlambela nesinzinziso sakhona,

⁴⁰ imilembelembe yamatjhila yesirhodlo, iinsika zakhona namanzinziso wakhona, itjhila lokuvala isango lesirhodlo, iintambo neenkhonkhwani ezibamba imilembelembe yesirhodlo, nazo zoke izitja zokulotjha ethaberinakelini okutjho itende lokuhlanganela,

⁴¹ izambatho ezithungiweko zokulotjha endaweni ecwengileko okutjho izambatho ezikhethekileko zaka-Aroni umphristi omkhulu kanye nezambatho zamadodanakhe kobana babe baphristi.

⁴² Ama-Israyeli enza woke umsebenzi kwaba njengombana uSomnini ayala uMosi.

⁴³ Kwathi lokha uMosi nabona bonyana mbala ama-Israyeli enze woke umsebenzi njengombana uSomnini amyalile, wawabusisa.