U-EKSODUSI 37 - IsiNdebele 2012 Translation

Ukwenziwa komfaji wesivumelwano

¹ UBhetsaleli wenza umfaji ngomuthi womtholo, waba limitha nesiqunjwana ubude, waba siquntu nesiqunjwana semitha ububanzi nokuphakama.

² Wawunameka ngegolidembala ngaphakathi nangaphandle, wawuphetha ngegolide.

³ Wawubumbela amasongo amane wegolide, wawabethelela emajikenawo amane ngaphasi. Kwaba masongo amabili ngehlangothini lawo namanye amabili ngakelinye ihlangothi.

⁴ Wenza neengodo ngomtholo nazo wazinameka ngegolide,

⁵ wafaka iingodwezo ngaphakathi kwamasongo ngemahlangothini womfaji bonyana kuthwalwe ngazo umfaji.

⁶ Wenza isisibekelo somfaji ngegolidembala saba limitha nesiqunjwana ubude, saba siquntu nesiqunjwana semitha ububanzi.

⁷ Godu wenza amakerubhi amabili wegolide ngokuwakhanda ekugcineni kwemiphetho emibili yesisibekelo somfaji,

⁸ kwaba likerubhi linye ngehlangothini elinye nekerubhi linye ngehlangothini elinye. Amakerubhi amabili bekangemaqadi wesisibekelweso ayinto yinye naso.

⁹ Amakerubhi bekathabululele amaphikwawo ngaphezulu engamele isisibekelo somfaji aqalene ngobuso; womabili aqala isisibekelweso.

Itafula lokubeka izikwa

¹⁰ Godu wenza netafula ngomuthi womtholo laba ngaphasana kwemitha ubude, ngaphasana kwesiquntu semitha ububanzi, laba siquntu nesiqunjwana semitha ukuphakama.

¹¹ Walinameka ngegolidembala, waliphetha ngomphetho wegolide magegana nalo.

¹² Ukusuka emphethweni ukuya ngaphakathi kwaba bubanzi besandla, wakha umqoqo wesakhelelo segolide.

¹³ Wabumba amasongo amane wegolide, wawabophelela emajikeni wemilenzenalo emine.

¹⁴ Amasongo wokufaka iingodo zokuthwala itafula aba ngaphasana komphetho.

¹⁵ Walungisa iingodo zomtholo kobana kuthwalwe ngazo itafula, wazinameka ngegolide.

¹⁶ Godu wenza nezitja ngegolidembala ebekumele zibe phezu kwetafula, izitja ezihlukahlukeneko zakhona, iinkapho nemijeka yokuvubela umnikelo wewayini.

Ilithi leembani

¹⁷ Wenza ilithi leembani ngegolidembala. Isikhondo, isiqu, iimpundu okutjho amaqumbe namathuthumbalo kwaba msebenzi okhandwe wahlanganiswa nalo.

¹⁸ Gade kunamagatja asithandathu aphuma ngemaqadi wesiqu selithi leembani, kwaba magatja amathathu ngehlangothini linye lesiqu namathathu ngehlangothini elinye.

¹⁹ Emagatjeni gade kuneempundu ezinjengama-alimondi okutjho amaqumbe namathuthumbo. Egatjeni ngalinye kilawo asithandathu kwaba neempundu ezintathu.

²⁰ Esiqwini selithi leembani bekuneempundu ezine ezinjengama-alimondi, zaba namaqumbe namathuthumbo.

²¹ Bekunequmbe linye esiqwini ngaphasi komsuka wamagatja akhamba ngamabili. Kwaba njalo kiwo woke amagatja asithandathu asuka esiqwini.

²² Amaqumbe namagatja wakhona bekakhandwe ndawonye nesiqu ngegolidembala.

²³ Wenza iimbani zakhona ezilikhomba, iincimasibani nezitjana zakhona ngegolidembala.

²⁴ Ilithi leembani sele lihlangene nezitja zalo zoke, belimakhilogremu amatjhumi amathathu nane wegolidembala.

I-aldari letjhwalo

²⁵ Wenza i-aldari letjhwalo ngomuthi womtholo. Gade lisikwere ngaphezulu okutjho isiquntu semitha ubude nesiquntu semitha ububanzi, lingaphasi kwemitha ukuphakama. Iimpundu zalo gade zinamathele kilo.

²⁶ Walinameka ngegolidembala ngaphezulu nangemahlangothinalo kanye neempundu zalo, waliphetha ngegolide.

²⁷ Walenzela amasongo wegolide aba ngaphasi komphethwalo. Kwaba masongo amabili ngehlangothini linye namabili ngehlangothini elifulatheleko kobana kube ziimphatho zalo lapha kufakwa khona iingodo zokulithwala.

²⁸ Walungisa iingodo zomuthi womtholo, wazinameka ngegolide.

²⁹ Godu wenza amafutha wokuzesa ahlukaniselweko namakha wetjhwalo elihlanzekileko. Kwaba njengomsebenzi womvangi weenhlahla.