U-EKSODUSI 36 - IsiNdebele 2012 Translation

¹ UMosi waraga wathi: “UBhetsaleli no-Oholiyaba nabo boke abantu abanekghono uSomnini abaphe ubukghoni nobuhlakani bokwazi ukwenza nanyana ngimuphi umsebenzi ekwakhiweni kwendawo ecwengileko, bazasebenza ukuya ngakho koke uSomnini akuyalileko.”

² Yeke uMosi wabiza uBhetsaleli no-Oholiyaba nabo boke abantu abanekghono, loyo naloyo uSomnini amuphe ubuhlakani okutjho boke abagugwa ziinhliziyo bonyana beze bazokusebenza.

³ Bathatha kuMosi woke umnikelo wesihle owalethwa ma-Israyeli malungana nomsebenzi wendawo ecwengileko. Abantu baragela phambili ngokuletha iminikelo yesihle kuMosi qobe kusekuseni

⁴ bekwathi labo abanekghono ebegade basebenza umsebenzi wendawo ecwengileko omunye nomunye wabo walisa ukusebenza weza kuMosi

⁵ wathi kuye: “Abantu baletha okunengi ngokudluleleko kilokho okudingeka ekwenzeni umsebenzi uSomnini asiyale bona siwenze.”

⁶ UMosi wayala bonyana kumemezelwe kiyo yoke ikampa bona kungasalethwa umnikelo wesihle malungana nendawo ecwengileko. Yeke abantu bakhawula ukuletha iminikelo.

⁷ Ipahla ebeyikhona besele yanele beyeqa kokudingeka ekwenzeni woke umsebenzi.

Ukwakhiwa kwethaberinakeli

⁸ Boke abantu abanobukghoni ebebasebenza ekwakheni ithaberinakeli benza amatjhila alitjhumi welineni emhlophe. Bathungelela nemifanekiso yamakerubhi ngobukghoni ematjhilenapho ngewulu ehlaza komkayi, ebubende netlerebede.

⁹ Ubude betjhila ngalinye gade bumamitha alitjhumi nambili nesiquntu, lingaphasana kwamamitha amabili ububanzi. Woke amatjhila lawo gade alingana.

¹⁰ Amatjhila ahlanganiswa ndawonye ngamahlanu.

¹¹ Benza iinrhobelo ezihlaza komkayi emphethweni welinye letjhila elihlanganisiweko elingeqadi. Benza soneso nakelinye itjhila elihlanganisiweko.

¹² Kwaba neenrhobelo ezimatjhumi amahlanu etjhileni lokuthoma elihlanganisiweko nezinye ezimatjhumi amahlanu emphethweni wetjhila lesibili elihlanganisiweko. Iinrhobelwezo gade ziqalene.

¹³ Benza iinqobotjhelo ezimatjhumi amahlanu zegolide bese baqobotjhela amatjhila elinye kelinye ngazo ukuze ithaberinakeli lihlangane libe linye.

¹⁴ Godu benza amatjhila ngoboya beembuzi kobana kwenziwe itende phezu kwethaberinakeli; kwaba matjhila alitjhumi nanye.

¹⁵ Ubude betjhila ngalinye gade bumamitha alitjhumi nantathu nesiquntu bese ububanzi bungaphasana kwamamitha amabili. Wolitjhumi nanye amatjhila lawo gade alingana.

¹⁶ Bahlanganisa amatjhila amahlanu ndawonye nasithandathu ndawonye.

¹⁷ Benza iinrhobelo emphethweni welinye letjhila elihlanganisiweko elingeqadi. Kwaba njalo nakelinye itjhila elihlanganisiweko.

¹⁸ Benza iinqobotjhelo ezimatjhumi amahlanu zekoporo kobana kuqobotjhelwe ngazo itende ukuze lihlangane libe linye.

¹⁹ Benzela itende isigubuzeso ngeenkhumba zamaqama ezifakwe umbala obovu begodu benza isigubuzeso esinye ngaphezu kwaso ngeenkhumba ezitjhukiweko bezazeswa ngamafutha.

²⁰ Godu benzela ithaberinakeli amahlaka ajamileko ngeengodo zomtholo.

²¹ Ihlaka ngalinye gade linobude obumamitha amane nesiquntu, lisiquntu nesiqunjwana semitha ububanzi.

²² Iingodo ezimbili ezihlanganiswe bona zenze ihlaka bekufuze zibe neentlobo ezimbili ngaphasi. Woke amahlaka wethaberinakeli bawenza ngaleyondlela.

²³ Benzela ithaberinakeli amahlaka amatjhumi amabili ngeswazini langesewula.

²⁴ Ngaphasi kwamahlaka amatjhumi amabili lawo benza amanzinziso wesiliva amatjhumi amane. Kwaba manzinziso amabili ngaphasi kwehlaka ngalinye lapha iintlobo zalo ezimbili zazingena khona. Benza njalo ehlakeni elinye nelinye.

²⁵ Godu nangeswazini elinye langetlhagwini lethaberinakeli kwaba mahlaka amatjhumi amabili

²⁶ namanzinziso wesiliva amatjhumi amane. Kwaba manzinziso amabili ngaphasi kwehlaka ngalinye.

²⁷ Ngeswazini elingetjingalanga lethaberinakeli benza amahlaka asithandathu.

²⁸ Benza amahlaka amabili ukuze enze amajika wethaberinakeli ngemuva.

²⁹ Ijika linye belenziwe ziingcenye ezimbili ezifanako. Iingcenye ezimbilezi bezihlanganiswe ukusuka phasi ukuya phezulu lapha isongo lokuthoma belizokufakwa khona. Bekunjalo emajikeni womabili.

³⁰ Gade kunamahlaka abunane ngemuva kwethaberinakeli namanzinziso wesiliva alitjhumi nasithandathu. Ihlaka ngalinye belinamanzinziso amabili.

³¹ Benza iinqabo ngeengodo zomtholo zaba ngezamahlaka wethaberinakeli. Benza zaba zihlanu ngeswazini elinye,

³² zaba zihlanu ngakelinye; godu zaba zihlanu ngeswazini langetjingalanga elingemuva kwethaberinakeli.

³³ Iinqabo ezingeziphakathi emahlakeni wamaswazi wethaberinakeli begade zithoma ekuthomeni kweswazi ukuyokutjhayisa ekugcineni.

³⁴ Banameka amahlaka neenqabo ngegolide, benza amasongo wokubamba iinqabo ngegolide.

³⁵ Benza isiyaya ngelineni emhlophe. Bathungelela phezu kwesiyayapho ngobukghoni imifanekiso yamakerubhi ngewulu ehlaza komkayi, ebubende netlerebede.

³⁶ Godu benza iinsika ezine zomtholo zokuphanyeka isiyaya, bazinameka ngegolide. Iinkhonkhwani zakhona zona kwaba ngezegolide. Babumbela iinsikezo amanzinziso amane wesiliva.

³⁷ Benza itjhila lomnyango wetende ngelineni emhlophe, balithungelela ngewulu ehlaza komkayi, ebubende netlerebede.

³⁸ Godu benzela itjhilelo iinsika ezihlanu neenkhonkhwani zakhona. Banameka iimpundu zalo nemipherho yakhona ngegolide, kodwana amanzinziso wakhona amahlanu gade angewekoporo.