U-EKSODUSI 35 - IsiNdebele 2012 Translation

Imiyalo malungana namaSabatha

¹ UMosi wabizela ndawonye woke umkhambathi wama-Israyeli wathi kiwo: “Nanzi izinto uSomnini aniyale bonyana nizenze:

² Umsebenzi awenziwe emalangeni asithandathu, kodwana ilanga lekhomba liliSabatha elihlukaniselweko nelicwengileko kuSomnini. Nanyana ngubani owenza umsebenzi mhlokho akabulawe.

³ Ningaphembi umlilo kiyo yoke imizenu ngelanga leSabatha.”

Ama-Israyeli alungiselela ukwakha ithaberinakeli

⁴ UMosi wathi kiwo woke umkhambathi wama-Israyeli: “Naku umyalo uSomnini awukhuphileko,

⁵ ‘Thathani phakathi kwenu umnikelo niwuse kuSomnini, nanyana ngubani onehliziyo evumako, akalethe umnikelo kaSomnini kube ligolide, isiliva nekoporo,

⁶ iwulu ehlaza komkayi, ebubende netlerebede, ilineni emhlophe kanye noboya beembuzi,

⁷ iinkhumba zamaqama ezifakwe umbala obovu, iinkhumba ezitjhukiweko bezazeswa ngamafutha, iingodo zomtholo,

⁸ amafutha weembani, iinungo zamafutha wokuzesa kanye namakha wetjhwalo,

⁹ amatje we-oniksi namatje wokukghabisa i-efodi neporiyana yomphristi.’

¹⁰ “Woke umuntu onekghono phakathi kwenu akeze azokwenza koke uSomnini ayale ngakho:

¹¹ ithaberinakeli, itende lalo nesigubuzeso salo, iinqobotjhelo namahlaka walo, iinqabo zalo, iinsika zalo namanzinziswalo,

¹² umfaji wesivumelwano neengodo zakhona, isisibekelo somfaji, kanye nesiyaya esilitjhila lomnyango,

¹³ itafula neengodo zakhona kanye nazo zoke izitja zakhona nezikwa ezibekwa phambi kwakaZimu,

¹⁴ ilithi leembani lokukhanyisa kanye nezitja neembani zakhona, amafutha weembani,

¹⁵ i-aldari letjhwalo neengodo zakhona, amafutha wokuzesa namakha wetjhwalo, itjhila lomnyango okumnyango wethaberinakeli,

¹⁶ i-aldari lomhlabelo wokutjhiswa, nomsefo walo wekoporo, iingodo zakhona, izitja zakhona, isitja sokuhlambela nesinzinziso sakhona,

¹⁷ imilembelembe yesirhodlo, iinsika zakhona kanye namanzinziso wakhona, itjhila lokuvala isango lesirhodlo,

¹⁸ iinkhonkhwani zethaberinakeli nezesirhodlo neentambo zakhona,

¹⁹ izambatho ezithungiweko zokulotjha endaweni ecwengileko, izambatho ezikhethekileko zaka-Aroni umphristi omkhulu nezambatho zamadodanakhe kobana babe baphristi.”

²⁰ Yeke umkhambathi wama-Israyeli wasuka phambi kwakaMosi.

²¹ Ngambala beza, omunye nomunye agugwa yihliziyo begodu nommoyakhe uvuma waletha umnikelo kaSomnini kobana usetjenziswe etendeni lokuhlanganela nemisebenzinalo yoke kanye nezambathweni ezikhethekileko.

²² Ngaleyondlela beza-ke kwaba madoda nabafazi. Boke ebegade banehliziyo evumako baletha iinqobotjhelo, amancina wepumulo, iindzilamnwana zokutlikitla, abonongoro nayo yoke imihlobo yezinto zegolide; kwaba ngiloyo naloyo wanikela umnikelo wegolide kuSomnini.

²³ Woke umuntu waletha lokho anakho kwaba yiwulu ehlaza komkayi, ebubende netlerebede, ilineni emhlophe, uboya beembuzi, iinkhumba zamaqama ezifakwe umbala obomvu neenkhumba ezitjhukiweko bezazeswa ngamafutha.

²⁴ Nogade akghona ukunikela ngesiliva nangekoporo wenza njalo. Abaneengodo zomtholo ebezingasetjenziselwa umsebenzi lo nabo baziletha emnikelweni kaSomnini.

²⁵ Boke abafazi ebegade banekghono lokuphotha, baletha emnikelweni abakuphothileko okutjho iwulu ehlaza komkayi, ebubende netlerebede kanye nemicu yelineni emhlophe.

²⁶ Labo-ke bekubafazi abanekghono nebebagugwa ziinhliziyo kobana baphothe uboya beembuzi.

²⁷ Abarholi baletha amatje we-oniksi namatje wokukghabisa i-efodi neporiyana yomphristi,

²⁸ iinungo, amafutha weembani newokuzesa kanye namakha wetjhwalo.

²⁹ Woke amadoda nabafazi okutjho abantu bakwa-Israyeli abagugwa ziinhliziyo kobana balethe nanyana yini emsebenzini kaSomnini ayala ngoMosi bonyana wenziwe, bakuletha lokho njengomnikelo wesihle kuSomnini.

³⁰ UMosi wathi ebantwini bakwa-Israyeli: “USomnini ukhethe uBhetsaleli umsa ka-Uri omsa kaRhuri wekoro yakwaJuda,

³¹ yamzalisa ngesiphiwo esikhethekileko bona abe nekghono nokuhlakanipha, ilwazi nobuno

³² kobana enze imitlamo yobukghwari, asebenze ngegolide, isiliva kanye nekoporo,

³³ abaze amatje aligugu wokurubela, abaze neengodo okutjho nanyana ngiliphi isino.

³⁴ USomnini wamhlohlozela bona afundise abanye abantu, yena no-Oholiyaba umsa ka-Arhisamaki wekoro yakwaDani.

³⁵ Yabazalisa ngekghono lokwenza woke umsebenzi owenziwa bososino, nabatlami, umsebenzi wokuthunga ngewulu ehlaza komkayi, ebubende etlerebede nemicu yelineni emhlophe newokuluka. Bebakwazi ukwenza nanyana ngiliphi isino nemitlamo yobukghwari.”