U-EKSODUSI 33 - IsiNdebele 2012 Translation

UMosi uncenga uZimu bona angatjhiyi abantu bakhe

¹ USomnini wathi kuMosi: “Thutha lapha wena nabantu owabakhupha enarheni yeGibhide uye enarheni engayifungela ku-Abrahamu, u-Isaka noJakopo ngathi ngizayinikela iinzukulwana zabo.

² Ngizathumela ingilozi phambi kwakho, ngiqotjhe amaKanana, ama-Amori, amaRhithi, amaPerizi, amaRhivi namaJebusi.

³ Khuphuka uye enarheni egeleza ibisi neliju, kodwana angizukhamba nani ngombana ngizabe nginiqothule endleleni ngebanga lokobana nineentanyana.”

⁴ Kuthe lokha abantu nabezwa iindaba ezibuhlungwezi, balila. Akakho owaziphotjhongako mhlokho.

⁵ Abantu benza njalo ngombana uSomnini bekathe kuMosi: “Tjela ama-Israyeli bona ababantu abaneentanyana. Nange kungenzeka ngikhambe phakathi kwawo, ngingabona sele ngiwaqothule wokanyana nje. Nje-ke akakhuphe imikghabiswawo leyo ngibone kuhle bona ngizokwenzani ngawo.”

⁶ Yeke ama-Israyeli ahlubula imikghabiswawo ukusukela mhla asuka entabeni yeHorebe.

⁷ UMosi wathatha itende walihloma ngaphandle kwekampa kudanyana nayo, walibiza bonyana litende lokuhlanganela. Bekuthi nanyana ngubani ofuna uSomnini eze ngetendeni lokuhlanganelelo elingaphandle kwekampa.

⁸ Bekuthi njalo lokha uMosi naya etendeni, boke abantu basikime. Woke umuntu ajame emnyango wetende lakhe bese uqala uMosi abe ayongena ngetendenelo.

⁹ Lokha uMosi nangena ngetendenelo, bekwehla isika yelifu ijame emnyango wetende bese uSomnini ukhuluma noMosi.

¹⁰ Abantu nababona isika yelifelo ijame emnyango wetende, omunye nomunye wabo gade azilungiselela asemnyango wetende lakhe kobana ahlome ihloko phasi.

¹¹ USomnini bekakhuluma noMosi ngokwakhe njengomuntu nacoca nomnganakhe. Lokha uMosi nabuyela ekampeni, incekwakhe uJotjhuwa isokana elimsa kaNuni azange iphume ngetendeni.

¹² UMosi wathi kuSomnini: “Iye, uSomnini bekanande athi kimi, ‘Khupha abantwaba’, kodwana uSomnini azange asangitjela bonyana ngubani azomthuma nami. Angithi nguSomnini ngokwakhe owathi kimi, ‘Ngikukhethile begodu ufumene umusa emehlwenami.’

¹³ Nje-ke ngiyabawa, nakube ngifumene umusa emehlweni kaSomnini, uSomnini akangikhombise iindlela zakhe, ngalokho ngizamazi bengiqiniseke bonyana uSomnini unami. USomnini akhumbule godu bonyana isizwesi ngesakhe.”

¹⁴ USomnini wathi kuye: “Ufuna ubukhona bami bukhambe nawe ukuze unethezeke na?”

¹⁵ UMosi waphendula wathi: “Iye, nakube uSomnini akakhambi nathi, khona angeze sakwazi ukutjhida lapha.

¹⁶ Kuzakwazeka njani bonyana ngifumene umusa emehlweni kaSomnini, mina nesizwe sakhesi? Angithi kuzakubonakala lokha uSomnini nakhamba nathi bonyana mina nabantu bakhe sikhethekile kibo boke abantu ephasini.”

¹⁷ USomnini wathi kuMosi: “Ngizakwenza lokho okukhulumileko ngombana ufumene umusa emehlwenami begodu ngikukhethile.”

UMosi ubawa ukubona ubuso bakaSomnini

¹⁸ UMosi wathi kuSomnini: “Ngiyabawa, Somnini akhese ungikhombise iphazimulwakho.”

¹⁹ USomnini wathi: “Ngizakwenza bona boke ubuhle bami budlule phambi kwakho bese ngibize ibizo elithi ‘Somnini’. Iye, ngizakuba nomusa kengifuna ukuba nomusa kuye, ngikhombise isirhawu kengithanda ukumkhombisa.

²⁰ Kodwana awukwazi ukubona ubuso bami ngombana akunamuntu ongangibona aphile.”

²¹ Godu uSomnini wathi: “Qala, kunendawo eduze nami phezu kwedwala lapha ungajama khona.

²² Kuzakuthi lokha iphazimulwami nayidlulako ngikufake hlangana nompharu wedwala ngikusithe ngesandla sami bengidlule.

²³ Ngizabese ngisusa isandla sami, ubone umhlana wami; kodwana nakububuso bami bona abubonwa.”