U-EKSODUSI 32 - IsiNdebele 2012 Translation

Ikunzana yegolide

¹ Kwathi lokha abantu nababona bonyana uMosi uyariyada ukubuya entabeni, babungelela u-Aroni bathi kuye: “Sikima usenzele isithombe sakaZimu ozasikhokhela ngombana nakhu uMosi okunguye owasikhupha enarheni yeGibhide asazi bonyana kwenzakeleni ngaye.”

² U-Aroni wathi kibo: “Ncomulani amancina wegolide aseendlebeni zabomkenu, zamadodanenu nezamadodakazenu niwalethapha.”

³ Nje-ke boke abantu bancomula amancina wegolide eendlebeni zabo bawaletha ku-Aroni.

⁴ Wathatha amancina wegolide lawo kibo wenza isithombe esibunjiweko wasibaza ngebhedlhela saba yikunzana. Abantu bathi: “Israyeli, nangu-ke uZimenu owanikhupha enarheni yeGibhide!”

⁵ Kwathi lokha u-Aroni nabona lokhu, wakha i-aldari phambi kwekunzana leyo bewenza isimemezelo wathi: “Kusasa kuzakuba mnyanya kaSomnini.”

⁶ Bavuka ekuseni, benza imihlabelo yokutjhiswa bebaletha nemihlabelo yetjhebiswano. Abantu bahlala phasi bagoma, basela iwayini, basikima, bathoma ukukhwatjhana.

⁷ USomnini wakhuluma noMosi wathi: “Yehla ngombana nakhu abantu owabakhupha enarheni yeGibhide barhubutjhe isivumelwano!

⁸ Baphambuke msinyana endleleni engabayala ngayo. Bazenzele ikunzana ebunjiweko bebayikhothamela, bazenzela imihlabelo kiyo bathi, ‘Israyeli, nangu-ke uZimenu owanikhupha enarheni yeGibhide!’ ”

⁹ USomnini godu wathi kuMosi: “Ngiyababona abantwaba bonyana baneentanyana!

¹⁰ Nje-ke ngilisa ukuze ilaka lami livuthe bhe phezu kwabo belibaqothule. Wena ngizakwenza ube sisizwe esikhulu.”

¹¹ Kodwana uMosi wancancabeza kuSomnini uZimakhe wathi: “Maye Somnini, kuzakuba njani nasele ilaka lakaSomnini livutha phezu kwabantu bakhe abakhupha enarheni yeGibhide ngamandla amakhulu nangesandla sakhe esiqinileko na?

¹² AmaGibhide azakuthi, ‘Iye, uZimabo wabakhuphela zonezi eGibhide bonyana abehlisele ihlekelele abe abarhayilele eentabeni abaqede nya ebusweni bomhlaba.’ Bengithi uSomnini akaphenduke elakeni lakhe elivuthako, azisole ngokuhlosa ubumbi ebantwini bakhe.

¹³ USomnini akakhumbule u-Abrahamu, u-Isaka no-Israyeli iinceku zakhe afunga kizo ngebizo lakhe wathi, ‘Ngizakwandisa iinzukulwana zenu zibe njengeenkwekwezi zomkayi, nginikele iinzukulwana zenu yoke inarha enginithembise yona le kobana ibe lilifa lazo isiphelani.’ ”

¹⁴ Ngambala uSomnini wazisola ngobumbi egade ithi izobehlisela phezu kwabantu bakhe.

¹⁵ UMosi waphenduka, wehla entabeni aphethe imiqebethu emibili yobufakazi. Imiqebethu leyo beyitlolwe ngapha nangapha.

¹⁶ Imiqebethu leyo beyenziwe nguZimu begodu itlolwe nguye ngesandla sakhe. Gade itlolwe ngokugobhodlhwa.

¹⁷ Kwathi lokha uJotjhuwa nezwa itjhada labantu nabalokhu barhuwelela, wathi kuMosi: “Baba-ke! Kunetjhada lepi ekampeni!”

¹⁸ Kodwana uMosi wathi: “Awa, engilizwakweli akusilo itjhada lokuthabela ukuhlula namkha lokulilela ukuhlulwa. Litjhada lokudumisa leli.”

¹⁹ Kwathi bona atjhidele eduze nekampa wabona ikunzana nabantu babetha isikhalanga, uMosi wavutha ngelaka. Waphosa imiqebethu phasi wayephula emsukeni wentaba.

²⁰ Wathatha ikunzana leyo wayiphosa emlilweni. Wayitshidlha yaba yiputjhana, wayirhatjha emanzini bewaseza ama-Israyeli amanzi lawo ngekani.

²¹ UMosi wathi ku-Aroni: “Bakwenzeni abantwaba kobana ungabeze ubehlisele isonokazi esingaka na?”

²² U-Aroni wathi: “Umphathami akangavuthi ngelaka. Angitjho umphathami uyabazi abantu bonyana bonakele kangangani.

²³ Ngibo abathe kimi, ‘Senzela uZimu ozasikhokhela ngombana nakhu uMosi loyo owasikhupha eGibhide unyamalele; asazi bonyana kwenzakeleni ngaye.’

²⁴ Mina ngathi kibo, ‘Woke onegolide akalikhuphe.’ Mbala banginikela-ke. Ngaliphosela emlilweni kwase kuphuma ikunzana leyo.”

²⁵ UMosi wabona bonyana abantu abasalawuleki ngombana u-Aroni wahluleka ukubalawula. Ngokwenza lokho abantu bazirhubutjha phambi kwabajamelani babo.

²⁶ Nje-ke uMosi wajama esangweni lekampa wathi: “Boke abangehlangothini lakaSomnini abeze kimapha.” Woke amadodana kaLevi abuthanela kuye.

²⁷ Wathi kiwo: “Nakhu okutjhiwo nguSomnini uZimu wakwa-Israyeli, ‘Omunye nomunye wenu akahlome ngesabulakhe, athome emasangweni wekampa abulale nanyana ngubani, kungaba ngumfowabo, umnganakhe nanyana umakhelwanakhe.’ ”

²⁸ Amadodana kaLevi aphetha ilizwi lakaMosi; mhlokho kwafa abantu abangaba ziinkulungwana ezintathu.

²⁹ UMosi wathi: “Namhlanje nizahlukanisele ngokwenu kobana nibe baphristi bakaSomnini ngombana omunye nomunye wenu ujike wajamelana ngitjho nomndenakhe. Ngalokho nizifumanele isibusiso.”

³⁰ Ngakusasa ekuseni uMosi wathi ebantwini: “Nenze isono esikhulu. Nje-ke ngizakhuphukela kuSomnini, mhlambe nginganenzela itethelelo ngesonokazi senwesi.”

³¹ Nje-ke uMosi wabuyela kuSomnini wathi: “Awu Kosami! Abantwaba benze isono esikhulu ngokwenza usingazimu wegolide.

³² Nokho bengithi uSomnini akalibalele isono sabesi. Nakube kuyabhala, ngiyarabhela, uSomnini akangisule encwadinakhe ayitlolileko.”

³³ Kodwana uSomnini wathi kuMosi: “Awa, ngizakusula kwaphela loyo owonileko kimi encwadinami.

³⁴ Gadesi-ke khamba uyokhokhela abantu ubase endaweni engikutjele ngayo. Qala, ingilozami izakhamba phambi kwakho. Kuzakuba nesikhathi lapha ngizabahlunguphaza khona ngezono zabo.”

³⁵ USomnini wehlisela abantu amatshwenyeko ngebanga lokobana benza ikunzana leyo eyabazwa ngu-Aroni.