U-EKSODUSI 31 - IsiNdebele 2012 Translation

Abososino bokwakha ithaberinakeli

¹ uSomnini wakhuluma noMosi wathi:

² “Qala, ngikhethe uBhetsaleli umsa ka-Uri omsa kaRhuri wekoro yakwaJuda.

³ Ngimzalise ngesiphiwo esikhethekileko bona abe nekghono nokuhlakanipha, ilwazi nobuno,

⁴ kobana enze imitlamo yobukghwari, asebenze ngegolide, isiliva nekoporo,

⁵ abaze amatje aligugu wokurubela, abaze iingodo okutjho namkha ngiliphi isino.

⁶ Qala-ke, ngimbeke kanye no-Oholiyaba umsa ka-Arhisamaki, wekoro yakwaDani. Godu nginikele woke amadoda anekghono ukuhlakanipha kobana enze koke engikuyale ngakho:

⁷ itende lokuhlanganela, umfaji wokufaka ubufakazi, isisibekelo somfaji esiphezu kwawo nakho koke okukhambisana netende,

⁸ itafula nezitja zalo, ilithi leembani legolidembala nazo zoke izitja zakhona, i-aldari letjhwalo,

⁹ i-aldari lomhlabelo wokutjhiswa nazo zoke izitja zakhona, isitja sokuhlambela nesinzinziso saso,

¹⁰ izambatho ezithungiweko nezikhethekileko zaka-Aroni umphristi omkhulu kanye nezambatho zamadodanakhe kobana babe baphristi,

¹¹ amafutha wokuzesa namakha wetjhwalo malungana nendawo ecwengileko. Lokho bakwenze ngendlela engikuyale ngayo.”

Imiyalo malungana namaSabatha

¹² USomnini godu wathi kuMosi:

¹³ “Yithi kuma-Israyeli, ‘Gcinani amaSabatha wami ngombana lokhu kulitshwayo phakathi kwami nani ukudlulela eenzukulwaneni zenu ukuze nazi bonyana mina Somnini ngiyanihlukanisela.

¹⁴ Nigcine iSabatha ngombana licwengile kini; nanyana ngubani olisilaphazako akabulawe. Iye, nanyana ngubani owenza umsebenzi mhlokho, akajutjwe ebantwini bekhabo.

¹⁵ Umsebenzi awenziwe emalangeni asithandathu, kodwana ilanga lekhomba liliSabatha elihlukaniselweko nelicwengileko kuSomnini. Nanyana ngubani owenza umsebenzi ngeSabatha akabulawe.

¹⁶ Ngalokho ama-Israyeli azakugidinga iSabatha, aligcine eenzukulwaneni zawo zoke kube sivumelwano sanini nanini.

¹⁷ Kulitshwayo lanini nanini phakathi kwami nama-Israyeli kobana emalangeni asithandathu uSomnini wenza izulu nephasi kodwana waphumula ngelanga lekhomba, ngalokho waqabuleka.’ ”

¹⁸ Kwathi naqeda ukukhuluma noMosi entabeni yeSinayi wamnikela imiqebethu emibili yobufakazi, imiqebethu etlolwe ngomuno kaZimu.