U-EKSODUSI 30 - IsiNdebele 2012 Translation

I-aldari lokutjhisela itjhwalo

¹ USomnini wathi kuMosi: “Yenza i-aldari lokutjhisela itjhwalo ngomuthi womtholo.

² Alibe sikwere ngaphezulu okutjho isiquntu semitha ubude nesiquntu semitha ububanzi. Libe ngaphasi kwemitha ukuphakama, iimpundu zalo zilingane nalo.

³ Ulinameke ngegolidembala ngaphezulu nemahlangothini walo kanye neempundu zalo. Umphethwalo uwenze ngegolide.

⁴ Ulenzele amasongo wegolide abe ngaphasi komphetho walo. Kube masongo amabili ngehlangothini linye namabili ngehlangothini elifulatheleko. Azakuba ziimphatho zalo lapha kufakwa khona iingodo zokulithwala.

⁵ Ulungise iingodo zomuthi womtholo bese uzinameka ngegolide.

⁶ Beka i-aldarelo ngaphambi kwesiyaya sendawo ecwenge khulu, lapha kunomfaji wobufakazi khona. Ulibeke lapha ngizakuhlangana nawe khona okutjho ngaphambi kwesisibekelo somfaji esisibekela ubufakazi.

⁷ U-Aroni uzakutjhisela kilo amakha wetjhwalo njalo ekuseni ngesikhathi sokucima iimbani abe azilungise.

⁸ Godu awatjhise ngamarhwaqela lokha nakhanyisa iimbani. Umphristi omkhulu akatjhise amakha wetjhwalo imihla ngemihla phambi kwakaSomnini iinzukulwana ngeenzukulwana.

⁹ Ungenzeli kilo itjhwalo elingakacwengi, umhlabelo wokutjhiswa nomnikelo weenthoro. Ungalingi wenzele kilo umnikelo wokuselwako.

¹⁰ U-Aroni uzakuninda iimpundu zalo ngeengazi zomhlabelo wehlambululo kanye ngomnyaka. Qobe mnyaka uzakwenza ngaleyondlela itethelelo kilo. I-aldarelo licwenge khulu kuSomnini.”

Iimfanelo zomnyaka zokulotjha ethaberinakelini

¹¹ USomnini wathi kuMosi:

¹² “Lokha nawubala ama-Israyeli bona utlolise amadoda wepi, omunye nomunye wawo uzakuhlawulela ipilwakhe kuSomnini. Enze njalo ukuze kungabi namatshwenyeko phakathi kwawo lokha natloliswako.

¹³ Omunye nomunye otlolisweko uzakunikela ngalokhu: amagremu asithandathu wesiliva ukuya ngokwesilinganiso sendawo ecwengileko kube mnikelo kaSomnini.

¹⁴ Woke umuntu otlolisweko, ukusuka koneminyaka ematjhumi amabili ukuya phezulu uzakunikela umnikelo kaSomnini.

¹⁵ Lokha naninikela umnikelo kaSomnini ukuze nizenzele itethelelo, abanesabo banganikeli ngaphezu kwamagremu asithandathu nabadududu banganikeli ngaphasi kwamagremu asithandathu.

¹⁶ Uthathe isiliva yomnikelo wetethelelo kuma-Israyeli ibe ngeyomsebenzi wetende lokuhlanganela. Isiliva leyo izakuba sikhumbuzo sama-Israyeli phambi kwakaSomnini kobana nizenzele itethelelo.”

Isitja sekoporo

¹⁷ USomnini wathi kuMosi:

¹⁸ “Godu yenza isitja sekoporo sibe nesinzinziso sekoporo kube ngesokuhlambela. Usibeke hlangana netende lokuhlanganela ne-aldari lomhlabelo. Uthele amanzi ngaphakathi kwaso

¹⁹ ukuze u-Aroni namadodanakhe bahlambele khona izandla neenyawo zabo lapho.

²⁰ Abahlambe lokha nabaya ngetendeni lokuhlanganela, namkha nabatjhidela e-aldarini kobana balotjhe nalokha nabatjhisela uSomnini umnikelo. Nakungasinjalo bazakufa.

²¹ Abahlambe izandla neenyawo zabo, nakungasinjalo bazakufa. Lokhu kuzakuba simiso sanini nanini kibo ngitjho nakuye kube ziinzukulwana ngeenzukulwana.”

Amafutha wokuzesa kanye netjhwalo

²² USomnini godu wathi kuMosi:

²³ “Zithathele iinthako eziphambili zalokhu: amakhilogremu asithandathu wemire emagiqana, isinamoni nomgaba okuzizinto ezinuka kamnandi, zibe makhilogremu amathathu ngayinye,

²⁴ amakhilogremu asithandathu wegcolo lomuthi wekhasiya ukuya ngokwesilinganiso sendawo ecwengileko kanye namalitha asithandathu nesiquntu wamafutha we-oliva.

²⁵ Uthathe koke lokhu wenze ngakho amafutha wokuzesa ahlukaniselweko kube mvango okhethekileko. Ulungise umvango lowo ube njengowomvangi weenhlahla. Uthathe amafutha wokuzesa ahlukaniselweko lawo,

²⁶ uzese ngawo itende lokuhlanganela, umfaji wobufakazi,

²⁷ itafula nezitja zakhona zoke, ilithi leembani nezitja zakhona, i-aldari letjhwalo,

²⁸ i-aldari lomhlabelo wokutjhiswa nazo zoke izitja zakhona kanye nesitja sokuhlambela nesinzinziso sakhona

²⁹ ukuze kube ngokucwengileko. Iye, kuzakuba ngokucwenge khulu kangangobana nanyana yini ekuthintako izakucwenga.

³⁰ “Uzese u-Aroni namadodanakhe, ubahlukanisele ukuze babe baphristi bami.

³¹ Bese uthi kuma-Israyeli, ‘Lokhu kuzakuba mafutha akhethekileko wokuzesa kibo boke abaphristi bangomuso.

³² Ningazesi nanyana ngubani, godu ningenzi amanye afana nawo ngeenthako. Amafutha la akhethekile, nakini akabe ngakhethekileko.

³³ Nanyana ngubani ozenzela wakhe afana nawo namkha azese ngawo nanyana ngubani ongakahlukaniselwa, uzakujutjwa ebantwini bekhabo.’ ”

³⁴ USomnini godu wathi kuMosi: “Zithathele iinthako ezilinganako zamakha alandelako: uburegu bomuthi webhalisamu, inovu enuka kamnandi ye-onikha neyegalibhanumu kanye noburegu obutsengileko bomuthi welebhona.

³⁵ Ngeenthakwezo wenze itjhwalo libe inga lenziwe muvangi weenhlahla. Ulinunge ngetswayi elihlanzekileko nelikhethekileko.

³⁶ Ukghadlhe ingcenye yazo zibe ziinquqwana bese uzibeka ngaphambi kobufakazi ngetendeni lokuhlanganela lapha ngizakuhlangana nawe khona. Itjhwalweli lizakuba ngelikhetheke khulu kini.

³⁷ Itjhwalo enizolenza ukuya ngeenthako zalo ningazenzeli nina. Ngakini lizakuba ngelikhethekileko kuSomnini.

³⁸ Nanyana ngubani owenza elifana nalo kobana alisebenzise njengamakha wakhe uzakujutjwa ebantwini bekhabo.”