U-EKSODUSI 3 - IsiNdebele 2012 Translation

¹ UMosi gade eluse umhlambi kaJetero, umkhwe wakhe, umphristi weMidiyani. Waragela umhlambi ngaphetjheya kwerhalawumba bewafika eRhorebe intaba kaZimu.

² Khonapho kwavela ingilozi kaZimu ngamalangabi womlilo iphakathi kwesithukghwana. UMosi wabona bonyana nanyana isithukghwaneso sisitjha kodwana besingapheli.

³ Yeke uMosi wadlumbana wathi: “Akhe ngiphambuke ngiyokuhlola isimangaliswesi. Kubayini isithukghwanesi sisitjha kodwana singapheli?”

⁴ Lokha uSomnini nabona bonyana uphambukele ukuyohlola bona kwenzakalani, uZimu wambiza asesithukghwanenapho wathi: “Mosi! Mosi!” UMosi wathi: “Ngilapha!”

⁵ USomnini wathi: “Ungatjhideli lapha, hlubula amapatlagwanakho ngombana lapha ujame khonapho yindawo ecwengileko.

⁶ NginguZimu kayihlo, uZimu ka-Abrahamu, u-Isaka noJakopo.” UMosi wagubuzesa ubuso bakhe ngombana bekesaba ukuqala uZimu.

⁷ Godu uSomnini wathi: “Ngambala ngibonile amatlhuwiso wabantu bami eGibhide. Ngisizwile isililo sabo ngebanga labatjhotjhozeli. Iye, ngiyalazi isizi labo.

⁸ Ngalokho ngehlile kobana ngibenyele esandleni samaGibhide, ngibakhuphe enarheni leyo ngibase enarheni ehle nevulekileko. Iye, inarha egeleza ibisi neliju, ikhaya lamaKanana, amaRhithi, ama-Amori, amaPerizi, amaRhivi namaJebusi.

⁹ Gadesi nje isililo sama-Israyeli sele sifike eendlebeni zami. Begodu ngibonile indlela amaGibhide awagandelele ngayo.

¹⁰ Yeke yewize, ngikuthume kuFaro kobana uyokukhupha abantu bami ama-Israyeli eGibhide.”

¹¹ Kodwana uMosi wathi kuZimu: “Bengingubani bonyana ngingaya kuFaro ngiyokukhupha ama-Israyeli eGibhide?”

¹² UZimu wathi: “Mbala ngizakuba nawe. Nasi isibonakaliso esizakuba litshwayo kuwe kobana ngimi engikuthumileko: Nasele ukhuphe abantu eGibhide, nizakudumisa uZimu entabeni le.”

¹³ UMosi wathi kuZimu: “Akhe sithi ngiya kuma-Israyeli bese ngithi, ‘UZimu waboyihlomkhulu ungithume kini’, angibuze-ke athi, ‘Ngubani ibizo lakhe uZimu loyo?’ alo, ngizakuthini kiwo?”

¹⁴ UZimu wathi kuMosi: “Nginguye enginguye. Nakhu ozakutjela ama-Israyeli, ‘UNginguye ungithume kini.’ ”

¹⁵ UZimu godu wathi kuMosi: “Yithi kuma-Israyeli, ‘USomnini uZimu waboyihlomkhulu, uZimu ka-Abrahamu, u-Isaka noJakopo ungithume kini.’ Lelo libizo lami lanini nanini, okulibizo engizakuduma ngalo iinzukulwana ngeenzukulwana.

¹⁶ “Khamba ufese uhlanganise abaphathi bakwa-Israyeli ndawonye bese uthi kibo, ‘USomnini uZimu waboyihlomkhulu, uZimu ka-Abrahamu, u-Isaka noJakopo uzibonakalise kimi wathi: Nginitjhejile bengabona lokho amaGibhide akwenze phezu kwenu.

¹⁷ Nje-ke sengithembise ukunikhupha esizini leGibhide nginise enarheni yamaKanana, amaRhithi, ama-Amori, amaPerizi, amaRhivi namaJebusi, inarha egeleza ibisi neliju.’

¹⁸ Abaphathi bakwa-Israyeli bazakulalela. Wena-ke nabaphathi nizakuya ekosini yeGibhide nithi kiyo, ‘USomnini uZimu wamaHebheru ubonene nathi. Yeke sivumela sikhambe ikhambo lamalanga amathathu erhalawumbeni kobana senzele uSomnini uZimethu imihlabelo.’

¹⁹ Kodwana mina ngiyazi bonyana ikosi yeGibhide angeze yanivumela bona nikhambe ngaphandle kokukatelelwa sisandla esinamandla.

²⁰ Ngalokho-ke ngizakwelula isandla sami ngimadlhe amaGibhide ngazo zoke iimangaliso engizazenza phakathi kwawo. Ngemva kwalapho izanitjhaphulula.

²¹ “Godu ngizakwenza bonyana amaGibhide abe nesisa ebantwinaba ukuze nithi naniphumako ningakhambi nimkhonoze.

²² Woke umfazi akakhombele umakhelwanakhe nanyana omunye nomunye umfazi ahlala ekumbenakhe kobana amuphe iintwanyana zesiliva negolide kanye nezambatho enizazembathisa amadodana namadodakazenu. Ngaleyondlela nizakuphanga amaGibhide.”