U-EKSODUSI 28 - IsiNdebele 2012 Translation

Izambatho zomphristi omkhulu

¹ USomnini wathi kuMosi: “Umnakwenu u-Aroni namadodanakhe akaphume phakathi kwama-Israyeli. Qala ngimkhethile yena namadodanakhe uNadabi no-Abihu, u-Elazara no-Itamara kobana babe baphristi bangilotjhe.

² “Wenzele umnakwenu u-Aroni izambatho ezicwengileko kobana abe nesithunzi ahlonipheke.

³ Tjela boke abanekghono, engibaphe ukuhlakanipha, kobana benzele u-Aroni izambatho ukuze ahlukaniselwe ubuphristi bami.

⁴ “Nanzi izambatho okumele bazenze: iporiyana yomphristi, i-efodi, ijasi, iphuraphura enomphetho, ingwani yomphristi kanye nomkhungo. Abenzele namadodana womfowenu u-Aroni izambatho ezikhethekileko kobana abe baphristi bami.

⁵ “Bazakusebenzisa imicwana yegolide, iwulu ehlaza komkayi, ebubende netlerebede kanye nelineni emhlophe.

⁶ Abasebenze ngobukghoni ukwenza i-efodi ngelineni emhlophe, ethungwe ngemicwana yegolide nangewulu ehlaza komkayi, ebubende netlerebede.

⁷ I-efodi leyo ayibe nemitletle emibili yamahlombe ukuze ihlanganise ingcenye yangemuva neyangaphambili emphethwenayo.

⁸ Ibhande lokuyibopha elithungelelwe kiyo nalo alenziwe ngelineni emhlophe ethungwe ngemicwana yegolide nangewulu ehlaza komkayi, ebubende netlerebede.

⁹ “Uthathe amatje amabili abomvu naligugu utlole kiwo ngokugobhodlha amabizo wamadodana ka-Israyeli,

¹⁰ asithandathu elitjeni elinye, nasithandathu kelinye ilitje ngendlela alamana ngayo.

¹¹ Ugobhodlhe amabizo wamadodana ka-Israyeli ematjeni amabili njengombazi natlola elitjeni lokugiba. Amatje lawo uwaphethe ngemicwana yegolide

¹² bewuwathungelele phezu kwemitletle yamahlombe we-efodi, abe sikhumbuzo samadodana ka-Israyeli. U-Aroni akembathe amabizwawo emahlombakhe phambi kwakaSomnini kube sikhumbuzo.

¹³ Lokha nawuphetha amatje lawo ngemicwana yegolide

¹⁴ uthungelele iinketanyana ezimbili zegolidembala khonapho. Iinketanyanezo azilukwe njengalokha nakulukwa imicwana.

¹⁵ “Wenze ngobukghoni imbada yeporiyana yomphristi lapha kufakwa khona amatje wefumbe. Uyenze ifane nangendlela ekwenziwe ngayo i-efodi: ngelineni emhlophe, ethungwe ngemicwana yegolide nangewulu ehlaza komkayi, ebubende netlerebede.

¹⁶ Ayilingane mahlangothi woke nayibhinciweko, ibe masentimitha amatjhumi amabili nambili ubude nobubanzi.

¹⁷ Uyifake amarhemo amane wamatje aligugu: “Irhemo lokuthoma libe nerubi, ithophazi ne-emeraldi;

¹⁸ irhemo lesibili libe nesimaragidu, isafaya nedayimani;

¹⁹ irhemo lesithathu libe nehiyasinthi, i-agatha ne-ametisthi;

²⁰ irhemo lesine libe nebherili, i-oniksi nejasipere. “Woke amatje lawo uwarubele ngemicwana yegolide.

²¹ Akube mamatje alitjhumi nambili, anamabizo ukuya ngamadodana ka-Israyeli. Azakuba njengamatje wokugiba, enye nenye ikoro kezilitjhumi nambili itlolwe ngokugobhodlhwa elitjeni layo.

²² “Iinketanyana ezimbili zegolidembala ezilukwe njengemicwana uzazibophelela eporiyaneni nganasi indlela:

²³ Yenza amasongo amabili wegolide bese uwathungelela emajikenayo angehla.

²⁴ Ufake iinketanyana ezimbili zegolide ngemasongweni amabili emajikeni weporiyana.

²⁵ Bopha amaphelelo weenketanyana ezimbili emphethweni orutjelweko wamatje asemtletleni we-efodi emahlombe ukuze iporiyana ibe sesifubeni.

²⁶ Wenze amasongo amanye amabili wegolide, uwathungelele emajikeni amanye angaphasi womphetho weporiyana.

²⁷ Godu wenze amanye amasongo amabili wegolide bese uwathungelela ngaphambili phasi emitletleni yamahlombe hlanu kwalapha ihlangana khona ne-efodi ngehla kwebhande.

²⁸ Bophelela amasongo weporiyana emasongweni we-efodi ngomtiya ohlaza komkayi ukuze ibe ngehla kwebhande le-efodi. Lokho kuzakwenza bonyana iporiyana ingatjhaphuluki isuke e-efodini.

²⁹ “Ngaleyondlela u-Aroni uzakuthwala amabizo wamadodana ka-Israyeli eporiyaneni enembada yamatje wefumbe. Amabizo lawo uzawathwala ehliziywenakhe lokha naya endaweni ecwengileko kube sikhumbuzo sanini nanini phambi kwakaSomnini.

³⁰ Ngembadeni yeporiyana ubeke amatje wefumbe okuyi-urimi nethumimi, abe sehliziyweni ka-Aroni lokha nayokuvela phambi kwakaSomnini. Ngaleyondlela u-Aroni uzakuhlala athwele amatje wefumbe yokuhlahla ama-Israyeli ehliziywenakhe njalo.

³¹ “Wenze ijasi ekhambisana ne-efodi ibe hlaza komkayi koke.

³² Phakathi nendawo ibe nentamo lapha kungena khona ihloko, uyithungelele umphetho olukiweko entanyeni ufane nomphetho wesambatho sepi ukuze ingadabuki.

³³ Emphethwenayo ngenzasi wenze amarharinada ngewulu ehlaza komkayi, ebubende netlerebede azombeleze umphetho abe neenkhencezo zegolide hlangana,

³⁴ kube sikhencezo segolide nerharinada, godu isikhencezo segolide nerharinada njalo njalo magegana nomphetho wejasi.

³⁵ U-Aroni akembathe ijasi leyo njalo lokha nangenako nalokha naphumako endaweni ecwengileko yokulotjha phambi kwakaSomnini ukuze kuzwakale ukukhenceza. Nangembathi njalo, uzakufa.

³⁶ “Godu wenze ithuthumbo legolidembala, uligwale ngokuligobhodlha amagama athi, ‘Ohlukaniselwe uSomnini’ njengomgobhodlho wesigibo.

³⁷ Ulibophelele engwanini ngomtiya ohlaza komkayi; libe ngaphambili engwanini

³⁸ phezu kwepandla ka-Aroni. Ithuthumbelo lizakuhlala lisepandla ka-Aroni njalo ukuze ama-Israyeli amukeleke phambi kwakaSomnini lokha naletha izipho ezikhethileko. Ngaleyondlela u-Aroni uzakwenza bonyana izono zama-Israyeli zithethelelwe lokha naphambukako ekunikeleni nanyana ngiziphi izipho.”

Izambatho zabaphristi

³⁹ Godu uSomnini wathi kuMosi: “Lokha nawuthungela u-Aroni iphuraphura ngelineni emhlophe nalokha nawumenzela ingwani ngelineni emhlophe kanye nomkhungo ngobukghoni,

⁴⁰ wenzele namadodanakhe iimphuraphura, imikhungo yokuthekeleza nemibhode. Lokhu ukwenze kobana abe nesithunzi abe ahlonipheke.

⁴¹ Wembathise umnakwenu u-Aroni namadodanakhe akanye naye, ubahlukanisele ubuphristi bami ngokubazesa nangokubajamisa.

⁴² Ubenzele iindzeredzere ngelineni kobana bafihle ububhunubhunu babo ukusuka edinini ukufika emadolweni.

⁴³ U-Aroni namadodanakhe bayembathe lokha nabangena ngetendeni lokuhlanganela ngitjho nalokha nabatjhidela e-aldarini kobana balotjhe endaweni ecwengileko. Nakungasinjalo bazazithwesa umlandu bese bayafa. Lokhu kuzakuba simiso sanini nanini ku-Aroni neenzukulwaneni zakhe ngemva kwakhe.”