U-EKSODUSI 27 - IsiNdebele 2012 Translation

I-aldari

¹ USomnini wathi kuMosi: “Wenze i-aldari ngeengodo zomtholo libe sikwere ngaphezulu. Ubude nobubanzi libe mamitha amabili nesiqunjwana. Libe limitha nesiqunjwana ukuphakama.

² Ulenzele iimpundu emajikenalo amane; zinamathele kilo bese ulinameka ngekoporo.

³ “Ulenzele izitja zokufaka umlotha, iintjhefula, izitja zokunyenyeza, iimforogo nezitja zokutjhisela itjhwalo. Zoke izitja zalo uzenze ngekoporo.

⁴ “Godu ulenzele umsefo wekoporo njengenede ngemaqadi walo. Wenze amasongo amane wekoporo emajikenalo amane.

⁵ Ubeke umsefo ngaphasi komqoqo we-aldari ukuze ulembelele uphelele phakathi e-aldarini.

⁶ Wenzele i-aldari iingodo, kube ziingodo zomtholo bese uzinameka ngekoporo.

⁷ Iingodwezo zifakwe emasongweni ukuze zibe ngemaqadi we-aldari lokha naligugwako.

⁸ Ulenze ngamaplanka libe nomkghotho ngaphakathi njengombana wakhonjiswa lona entabeni.”

Isirhodlo sethaberinakeli

⁹ Godu uSomnini wathi kuMosi: “Wenze isirhodlo sethaberinakeli ngalendlela: Ngeswazini langesewula lethaberinakeli ulembelelise umlembelembe wamatjhila welineni emhlophe anomthungo abe mamitha amatjhumi amane nahlanu.

¹⁰ Ihlangothi lesirhodlwelo alibe neensika ezimatjhumi amabili namanzinziso wakhona amatjhumi amabili kwenziwe ngekoporo, kodwana iinkhonkhwani zeensika kanye nemipherho yakhona kwenziwe ngesiliva.

¹¹ “Ngokunjalo ngeswazini langetlhagwini lethaberinakeli kube nomlembelembe wamatjhila omamitha amatjhumi amane nahlanu ubude. Akube neensika ezimatjhumi amabili namanzinziso wakhona amatjhumi amabili kwenziwe ngekoporo, kodwana iinkhonkhwani zeensika kanye nemipherho yakhona kwenziwe ngesiliva.

¹² “Ububanzi besirhodlo, ngeswazini langetjingalanga lethaberinakeli, bube nomlembelembe wamatjhila omamitha amatjhumi amabili nambili nesiquntu. Godu bube neensika ezilitjhumi kanye namanzinziso wakhona alitjhumi.

¹³ “Ububanzi besirhodlo ngeswazini langaphambili lethaberinakeli ngepumalanga bube mamitha amatjhumi amabili nambili nesiquntu.

^14-15 Ihlangothi lesirhodlo langaphambili libe nemilembelembe emibili yamatjhila ephahle isango. Ubude bomlembelembe ngamunye bube mamitha asithandathu nesiquntu nesiqunjwana. Yomibili imilembelembe leyo ibe neensika ezintathu namanzinziso amathathu.

¹⁶ Esangweni lesirhodlo akube nesivalo esimamitha alithoba ububanzi, senziwe ngelineni emhlophe ethungwe ngewulu ehlaza komkayi, ebubende netlerebede. Asibe neensika ezine ezinamanzinziso amane.

¹⁷ “Zoke iinsika magegana nesirhodlo zibe nemipherho yesiliva, iinkhonkhwani zesiliva namanzinziso wekoporo.

¹⁸ Ubude besirhodlo bube mamitha amatjhumi amane nahlanu, ububanzi bube mamitha amatjhumi amabili nambili nesiquntu. Ukuphakama komlembelembe kube mamitha amabili nesiqunjwana. Umlembelembe lowo ube ngewelineni emhlophe enomthungo; amanzinziso wakhona enziwe ngekoporo.

¹⁹ Zoke izitja zethaberinakeli zananyana ngimuphi umsebenzi, nazo zoke iinkhonkhwani ezibamba itende nesirhodlo zizakuba ngezekoporo.”

Amafutha we-oliva wokukhanyisa ilithi leembani

²⁰ USomnini wathi: “Wena-ke Mosi utjele ama-Israyeli bonyana alethe kuwe amafutha we-oliva atsengileko nacwebileko wokukhanyisa ilithi leembani. Iimbani azihlale zivutha

²¹ ngetendeni lokuhlanganela ngaphandle kwesiyaya esingaphambi kobufakazi. U-Aroni namadodanakhe kumele bahlale babona bonyana iimbani ziyakhanya phambi kwakaSomnini ukusukela ntambama bekuse. Lokhu kuzakuba simiso esijame nini nanini sama-Israyeli iinzukulwana ngeenzukulwana.”