U-EKSODUSI 25 - IsiNdebele 2012 Translation

Ipahla yokwakha ithaberinakeli

¹ USomnini wathi kuMosi:

² “Tjela ama-Israyeli bonyana angilethele umnikelo. Abaphathi abawuthathe komunye nomunye umuntu onehliziyo evumako.

³ Nanti ihlobo lomnikelo enizalithatha kiwo: igolide, isiliva nekoporo,

⁴ iwulu ehlaza komkayi, ebubende netlerebede, ilineni emhlophe kanye noboya beembuzi,

⁵ iinkhumba zamaqama ezifakwe umbala obovu, iinkhumba ezitjhukiweko bezazeswa ngamafutha, iingodo zomtholo,

⁶ amafutha weembani, iinungo zamafutha wokuzesa kanye namakha wetjhwalo,

⁷ amatje we-oniksi namatje wokukghabisa i-efodi neporiyana yomphristi.

⁸ “Ngenzelani indawo ecwengileko ukuze ngihlale phakathi kwama-Israyeli.

⁹ Nenze ithaberinakeli nakho koke okukilo ngendlela yomfanekiso engizakukhombisa wona.”

Umfaji wesivumelwano

¹⁰ Godu uSomnini wathi kuMosi: “Ngenzelani umfaji ngeengodo zomtholo ube limitha nesiqunjwana ubude, ube siquntu nesiqunjwana semitha ububanzi nokuphakama.

¹¹ Uwunameke ngegolidembala ngaphakathi nangaphandle bese uwuphetha ngegolide.

¹² Uwubumbele amasongo wegolide amane bese uwabethelela emajikeni wawo amane ngaphasi, amasongo amabili ngehlangothini lawo namanye amabili ngakelinye ihlangothi.

¹³ Ulungise iingodo zomuthi womtholo, uzinameke ngegolide.

¹⁴ Ufake iingodwezo ngaphakathi kwamasongo ngemahlangothini womfaji ukuze uwuthwale ngazo.

¹⁵ Iingodo azibe ngemasongweni womfaji; zingasuswa kiwo.

¹⁶ Ufake ubufakazi besivumelwano engizakunikela bona ngemfajini.

¹⁷ Wenze isisibekelo somfaji ngegolidembala sibe limitha nesiqunjwana ubude, sibe siquntu nesiqunjwana semitha ububanzi.

¹⁸ “Wenze amakerubhi amabili wegolide ngokuwakhanda ekugcineni kwemiphetho emibili yesisibekelo somfaji.

¹⁹ Ukhande ikerubhi linye ngehlangothini elinye nekerubhi elinye ngakelinye ihlangothi. Amakerubhi amabili angemaqadi wesisibekelweso akabe yinto yinye nesisibekelweso.

²⁰ Amakerubhi akathabululele amaphikwawo ngaphezulu engamele isisibekelo somfaji aqalane ngobuso, womabili aqale isisibekelo.

²¹ Ufake ubufakazi besivumelwano engizakunikela bona ngaphakathi komfaji bese uvala umfaji ngesisibekelo.

²² Ngizakuhlangana nawe lapho, ngikhulume nawe ngingehla kwesisibekelo hlangana namakerubhi amabili aphezu komfaji wobufakazi. Ngizakuyala ngalokho okumalungana nama-Israyeli.”

Itafula lesikwa sobukhona bakaZimu

²³ USomnini wabuya wathi: “Yenza itafula ngomuthi womtholo libe ngaphasana kwemitha ubude, ngaphasana kwesiquntu semitha ububanzi, libe siquntu nesiqunjwana semitha ukuphakama.

²⁴ Linameke ngegolidembala bese uliphetha ngesakhelelo segolide magegana nalo.

²⁵ Ukusuka emphethweni ukuya ngaphakathi kube bubanzi besandla bese wakha umqoqo wesakhelelo segolide.

²⁶ Lenzele amasongo amane wegolide, uwabophelele emajikenalo amane emilenzeni.

²⁷ Amasongo wokufaka iingodo zokuthwala itafula akabe ngaphasana kwesakhelelo.

²⁸ Lungisa iingodo zomuthi womtholo, uzinameke ngegolide, uthwale ngazo itafula.

²⁹ “Lenzele izitja ezahlukahlukeneko, iinkapho nemijeka yokuvubela umnikelo wewayini. Koke lokhu kwenze ngegolidembala.

³⁰ Beka izikwa ezibekwa phambi kwakaZimu etafulenapho zibe phambi kwami ngeenkhathi zoke.”

Ilithi leembani

³¹ Godu uSomnini wathi: “Yenza ilithi leembani ngegolidembala. Isikhondo, isiqu, iimpundu okutjho amaqumbe namathuthumbo walo kube msebenzi okhandwe wahlanganiswa nalo.

³² Akube namagatja asithandathu aphuma ngemaqadi wesiqu selithi leembani, kube magatja amathathu ngehlangothini linye lesiqu bese amagatja amathathu abe ngehlangothini elinye.

³³ Emagatjeni akube neempundu ezinjengama-alimondi okutjho amaqumbe namathuthumbo. Egatjeni ngalinye kilawo asithandathu kube neempundu ezintathu.

³⁴ Kuthi esiqwini selithi leembani kube neempundu ezine ezinjengama-alimondi, zibe namaqumbe namathuthumbo.

³⁵ Akube nequmbe linye esiqwini ngaphasi komsuka wamagatja akhamba ngamabili. Kube njalo kiwo woke amagatja asithandathu asuka esiqwini.

³⁶ Amaqumbe namagatja wakhona akhandwe ndawonye nesiqu ngegolidembala.

³⁷ “Lenzele iimbani ezilikhomba. Ubeke isibani phezu kwesiqu nangaphezu kwegatja negatja ukuze zikhanyise esibangeni esingaphambi kwelithi leembani.

³⁸ Iincimasibani nezitjana zalo zibe ngezegolidembala.

³⁹ “Ilithi leembani sele lihlangene nezitja zalo zoke libe makhilogremu amatjhumi amathathu nane wegolidembala.

⁴⁰ “Qinisekisa bonyana wenza koke lokhu ngomfanekiso owakhonjiswa wona entabeni.”