U-EKSODUSI 23 - IsiNdebele 2012 Translation

¹ “Ungarhatjhi iindaba ezimamala. Ungazibandakanyi nesikhohlakali ngokuba ngufakazi wobukhohlakali.

² Ungalandeli inengi bona nenze ubumbi. Nawufakaza emlandwini ungahlanakeli ubulungiswa ngokulandela inengi.

³ Ungagwebi ochakileko ngokumzamela.

⁴ “Lokha nawuhlangana nekomo namkha udumbana olahlekileko wesitha sakho, mrage umbuyisele kiso.

⁵ Lokha nawubona udumbana waloyo okuhloyileko arabhalaliswe mthwalwakhe, ungamdluli anjalo, kodwana msize.

⁶ “Ungahlanakeli ubulungiswa nawugweba umlandu womuntu ochakileko.

⁷ Ungayengwa bufakazi bamala nawugwebako ngombana ungahle ukhuphe isigwebo sokubulawa konganamlandu nolungileko. Angeze ngamlisa umgwebi okhohlakeleko.

⁸ Ungalingi wamukele ukufunjathiswa ngombana ukufunjathiswa kuphophaza ohlolisisako, kwenze abaneqiniso babe bakhohlisi.

⁹ “Ningagandeleli isikhonzi; niyayazi ihliziyo yesikhonzi ngombana nani gade niziinkhonzi enarheni yeGibhide.

¹⁰ “Uzakutjala bewuvune amasimakho iminyaka esithandathu,

¹¹ kodwana emnyakeni wekhomba uzawaphumuza, uwalise abe mraga ukuze abadududu bekhenu bakghone ukugoma amakhikhizela. Abawatjhiyileko azakudliwa ziinlwana zommango. Wenze soneso nangesidiribe sakho nesivande sakho se-oliva.

¹² “Yenza umsebenzakho amalanga asithandathu. Elangeni lekhomba uphumule ukuze kuphumule nekomakho nodumbanakho bese indodana yekhobokakazi lakho nesikhonzi esikusebenzelako nabo bakhokhe ummoya.

¹³ “Yelelani koke engikutjho kini; ningabizi amabizo wabosingazimu; niwakhafule nemilonyenenu.

¹⁴ “Ningenzele umnyanya kathathu ngomnyaka.

¹⁵ Yenzani umnyanya wesiKwa esinganaNgumelo njengombana nginiyalile. Nizagoma isikwa esinganangumelo amalanga alikhomba ngesikhathi esibekiweko ngenyanga ka-Abibi ngombana leyo yinyanga enaphuma ngayo eGibhide. Kungabi nomuntu ozakuvela phambi kwami amkhonoze.

¹⁶ Gidingani umnyanya wesiVuno okumnyanya womkhiqizo womsebenzenu walokho enikutjele emasimini. Nigidinge umnyanya wokuButhelela ekupheleni komnyaka lokha nanibuthelela iinthelo zomsebenzenu emasimini.

¹⁷ Boke abaduna benu bazakuvela phambi kwakaSomnini uSomandla kathathu ngomnyaka.

¹⁸ “Ingumelo ingeze yabandakanywa neengazi zomhlabelo. Godu ungalisi amafutha wemihlabelo yeminyanyami ahlale bekuse ungakawatjhisi.

¹⁹ “Letha njalo imikhiqizo yokuthoma yehlabathakho endaweni ecwengileko kaSomnini uZimakho. “Ungapheki imbuzana ngebisini lakanina.”

UZimu uthembisa ukusindisa ama-Israyeli

²⁰ “Qalani, ngithumela ingilozi phambi kwenu bona ineluse endleleni beyinise endaweni enginilungiselele yona.

²¹ Ziqapheleni ngombana iphakathi kwenu; nilalele ilizwi layo, ningalwi nayo. Naningayilaleliko angeze yaqolela imitjhapho yenu ngombana ngimi okhuluma kiyo.

²² “Kodwana lokha naniyilalelisisa kuhle bese nenza koke engithi nikwenze, khona-ke ngizakuba sisitha sezitha zenu ngibe mjamelani ebajamelanini benu.

²³ “Lokha ingilozami nayikhamba phambi kwenu bese iningenisa kuma-Amori, amaRhithi, amaPerizi, amaKanana, amaRhivi namaJebusi bese ngiyawabhubhisa,

²⁴ ningakhothameli abosingazimu bawo begodu ningabalotjhi. Ningenzi izinto ngendlelabo kodwana nibaphelise nya beniphadlhe namatjabo akhethekileko.

²⁵ Lotjhani uSomnini uZimenu. Mina ngizakubusisa isikwa namanzenu bengisuse izifo phakathi kwenu.

²⁶ Akunamfazi ozakubuya endleleni namkha abe yinyumba enarhenenu; ngizanandisela ipilo.

²⁷ Ngizathumela ukwesaba kwami phambi kwenu bese ngihlangahlanganisa boke abantu eniqabene nabo ngenze zoke izitha zenu zinibaleke.

²⁸ Godu ngizakuthumela abonondovu phambi kwenu, baqotjhe amaRhivi, amaKanana namaRhithi phambi kwenu.

²⁹ Izizwezi angeze ngaziqotjha phambi kwenu ngamnyaka munye ngombana inarha izasala inganamuntu bese iinlwana zommango ziyanda zinivukele.

³⁰ Kodwana ngizaziqotjha kancani kancani phambi kwenu, kufikela lapha nanda khona benithathe inarha.

³¹ Ngizabeka imikhawulwenu ukusuka elwandle lomGaba ukuya elwandle lamaFilista nokusuka erhalawumbeni ukuya eYufrathe. Iye, ngizanikela abahlali benarha ezandleni zenu bese nina niyabagijimisa.

³² Ningenzi isivumelwano nabo namkha nabosingazimu babo.

³³ Bangahlali enarhenenu ngombana bazanenza none phambi kwami lokha nanilotjha abosingazimu babo. Lokho kuzakuba sisifu kini.”