U-EKSODUSI 20 - IsiNdebele 2012 Translation

UZimu unikela ama-Israyeli imiyalo elitjhumi

¹ UZimu wakhuluma woke amezwi la wathi:

² “Mina Somnini nginguZimakho owakukhupha enarheni yeGibhide ekumbeni yobukhoboka.

³ Ungalotjhi abosingazimu, lotjha mina kwaphela.

⁴ Ungazenzeli isithombesibazwa namkha umfanekiso wananyana yini esezulwini phezulu namkha ephasini phasi nanyana ngemanzini ngaphasi kwephasi.

⁵ Ungazikhothameli izintwezo, ungazilotjhi ngombana mina Somnini nginguZimakho. NginguZimu onesikhwele owehlisela isibetho sezono zaboyise phezu kwabantwababo besizukulwana sesithathu nesesine salabo abangenzi intandwami.

⁶ Kodwana ukwethembeka kwami kuzakuhlala eenkulungwaneni zeenzukulwana zalabo abangikhathalelako nabalonda imiyalwami.

⁷ Ungakhulumeli butjhilweni ngebizo lakaSomnini uZimakho ngombana uSomnini uzambeka umlandu loyo ophatha ibizo lakhe butjhilweni.

⁸ Hlonipha ilanga leSabatha ngombana licwengile.

⁹ Sebenza amalanga asithandathu, wenze woke umsebenzakho,

¹⁰ kodwana ilanga lekhomba liliSabatha, lahlukaniselwe uSomnini uZimakho. Mhlokho ungasebenzi ngitjho nakancani, wena, indodanakho, indodakazakho, ikhoboka nekhobokakazi lakho, ifuywakho namkha isikhonzi esihlala nawe,

¹¹ ngombana emalangeni asithandathu uSomnini wenza izulu nephasi, ilwandle nakho koke okudaliweko, waphumula ngelanga lekhomba. Ngalokho uSomnini wabusisa ilanga leSabatha, wathi licwengile.

¹² Yazisa uyihlo nonyoko khona kuzakwanda amalangakho wokuphila endaweni oyiphiwa nguSomnini uZimakho.

¹³ Ungabulali umuntu.

¹⁴ Ungahlobongi.

¹⁵ Ungebi.

¹⁶ Ungafakazi amala ngomunye umuntu.

¹⁷ Ungafisi ikumba yomunye umuntu; ungakhanukeli umfazi womunye umuntu, ungafisi ikhoboka namkha ikhobokakazi lakhe, ikomakhe, udumbanakhe nanyana yini engeyomunye umuntu.”

¹⁸ Boke abantu bezwa imidumo netjhada lepalapala begodu babona imibani nentuthu ethunya entabeni. Kwathi nababona lokho besaba, bathuthumela. Nje-ke bajamela kujana,

¹⁹ bathi kuMosi: “Akungabi nguZimu okhuluma nathi ngombana sizakufa! Akukhulume wena, sizakulalela.”

²⁰ UMosi wathi ebantwini: “Ningesabi ngombana uZimu uze bona anizizinye nokobana nimesabe ukuze ningoni.”

Umyalo wokwakhiwa kwe-aldari

²¹ Abantu bajamela kujana, uMosi yena watjhidela eduze elifini elimabhombo nelimnyama lapha bekunoZimu khona.

²² USomnini wathi kuMosi: “Nakhu ozakutjho kuma-Israyeli, ‘Nizibonele ngokwenu bonyana ngikhulume nani ngisezulwini.

²³ “ ‘Nje-ke ningazenzeli abozinyana besiliva nebegolide bonyana nibalotjhe kanye nami.’ ”

²⁴ Godu uSomnini wathi kuMosi: “Ngenzela i-aldari lequlwani bese wenzela kilo umhlabelwakho wokutjhiswa, umnikelwakho wetjhebiswano okutjho imihlabelo yezimvu neembuzi kanye neenkomo zakho. Kuzakuthi kiyo yoke indawo lapha ngenza khona bona ibizo lami lidunyiswe, ngehlele kiyo, ngikubusise.

²⁵ “Nawungenzela i-aldari lamatje, ungalakhi ngamatje acoziweko ngombana nawuwaqoqoda ngeentlabagelo zakho, uyawangcolisa.

²⁶ Ungenzeli i-aldari lami iintepisi ngombana nawukhwela ngazo ububhunubhunu bakho buzakwembulekela kilo.”