U-EKSODUSI 2 - IsiNdebele 2012 Translation

Ukubelethwa kwakaMosi

¹ Indoda yendlu kaLevi gade ithethe umfazi omLevi.

² Umfazi loyo waba sidisi bewabeletha indodana. Kwathi angabona bonyana umntwana muhle, wamfihla iinyanga ezintathu.

³ Kodwana kuthe nangasakghoni ukumfihla, wathatha umantji wephaphirasi wawutjhatjha ngemihlobohlobo yesikontiri. Wafaka umntwana ngaphakathi komantji wawubeka hlangana nomgaba emanzini magegana nomlambo iNayili.

⁴ Udadwabo lomntwana wajamela kujanyana afuna ukubona bonyana kuzokwenzakalani ngaye.

⁵ Kwehla indodakazi kaFaro yaya emlanjeni iNayili kobana iyokuhlamba. Lokha nayisahlambako iinsebenzi zayo bezikhambakhamba magegana nomlambo. Kuthe kusesenjalo yabona umantji hlangana nomgaba, yathumela ikhobokakazi layo bonyana liwuthathe.

⁶ Yawuvula, yabona isana lilila. Yeke yalirhawukela yathi: “Leli ngelinye lamasana wamaHebheru.”

⁷ Udadwabo lesanelo wakhuluma nendodakazi kaFaro wathi: “Ngingayokufunela omunye wabafazi bamaHebheru kobana azokumunyisela isaneli na?”

⁸ Yona yathi: “Iye, gijima!” Nje-ke umntazana wakhamba wayokubiza unina.

⁹ Indodakazi kaFaro yathi kunina: “Thatha isaneli ungondlele lona, ngizakukhokhela.” Yeke umfazi wathatha isanelo walondla.

¹⁰ Kuthe umntwana loyo nasele akhulile, wamthatha wamusa endodakazini kaFaro waba yindodanayo. Yamthiya bona nguMosi ngombana yathi: “Iye, ngamthatha emanzini.”

UMosi ubalekela eMidiyani

¹¹ Ngelinye ilanga, uMosi sele akhule ngokwaneleko, waphuma waya ebantwini bekhabo, wababona basebenza kabudisi. Khonapho wabona umGibhide abetha umHebheru ongomunye wabantu bekhabo.

¹² Waqala ngapha nangapha wangabona muntu, wabulala umGibhide loyo bewamfihla ehlabathini.

¹³ Ngelanga elilandelako nakhona waphuma, wabona amaHebheru amabili asilwa. Wabuza onomlandu wathi: “Kubayini ubethe umHebheru wekhenu?”

¹⁴ Indoda leyo yathi kuye: “Ubekwe ngubani bonyana ube mbusi nomgwebi phezu kwethu? Kghani ucabanga ukungibulala nami njengomGibhide ombuleleko loya?” UMosi waba nokwesaba wadlumbana wathi: “Kutjho bona sekuyaziwa ngendabami le.”

¹⁵ Kwathi bona uFaro ezwe ngendaba le, walinga ukubulala uMosi, kodwana uMosi wabalekela eMidiyani wafika wahlala emthonjeni.

¹⁶ Umphristi weMidiyani gade anamadodakazi alikhomba. Ehla azokukha amanzi bese azalisa neenkerebhe kobana aseze ifuyo kayisawo.

¹⁷ Khonapho kwavela abelusi abanye bawaqotjha. Kodwana uMosi wasikima wawenyela bewaseza ifuywawo.

¹⁸ Lokha amadodakazi nabuyela kuyise, uRewuyeli, wawabuza wathi: “Naba msinya kangaka namhlanje kwenze njani?”

¹⁹ Aphendula athi: “Senyelwe mGibhide othize ebelusinaba. Godu usikhelele namanzi bewaseza nefuywethu.”

²⁰ Nje-ke wabuza amadodakazakhe wathi: “Alo, uphi umuntu loyo? Nimtjhiyeleni ebaleni? Khambani niyomkhombela azogoma intwanyana.”

²¹ UMosi wazimisela ukuhlala noRewuyeli. Wamupha indodakazakhe uTsiphora bonyana abe mkakhe.

²² UTsiphora wabeletha indodana, uMosi wayithiya bona nguGeritjhomu asithi: “Ngibe sikhonzi enarheni etjhili.”

UMosi ubizelwa ukusindisa ama-Israyeli

²³ Ngemva kwesikhathi eside ikosi yeGibhide yahlongakala. Kodwana ama-Israyeli bekasoloko anghunanghuna ngobukhoboka bawo. Abalabala njalo ngobukhoboka bawo isililo sawo sabe safika kuZimu.

²⁴ UZimu wezwa ukububula kwawo, wakhumbula isivumelwano sakhe no-Abrahamu, u-Isaka noJakopo.

²⁵ UZimu wayelela ama-Israyeli bewabazi ubujamo bawo.