U-EKSODUSI 17 - IsiNdebele 2012 Translation

USomnini upha ama-Israyeli amanzi wedwala

¹ Umkhambathi woke wama-Israyeli wasuka erhalawumbeni leSini wakhamba uhloma amatendawo ukuya ngomyalo kaSomnini. Kwathi lokha nawuhloma amatende eRefidimu wafumana kunganamanzi wokusela.

² Ngalokho abantu basola uMosi bathi: “Siphani amanzi sisele nina!” UMosi wathi kibo: “Kubayini nisola mina? Kuhlekuhle nizizinya uSomnini ngesenzo senwesi!”

³ Kodwana abantu bomela amanzi banghonghoyila kuMosi bathi: “Umuntu bekasikhuphelani eGibhide nazosibulalisa ngomrhawu thina nabantwabethu kanye nefuywethu na?”

⁴ Yeke uMosi walila kuSomnini wathi: “Ngizokwenzani ngabantwaba? Sekusele kancani bona bangikghadlhe ngamatje.”

⁵ USomnini wathi kuMosi: “Dlula phambi kwabantu, uthathe abanye babaphathi bakwa-Israyeli bese uphatha idondolo owabetha ngalo iNayili, ukhambe.

⁶ Qala, ngizakujama lapho phambi kwakho edwaleni elisentabeni yeRhorebe. Ubethe idwalelo bese kuphuma amanzi ukuze abantu basele.” Yeke uMosi wenza njalo phambi kwabaphathi bakwa-Israyeli.

⁷ Wathiya indawo leyo bona yiMasa neMeriba ngombana ama-Israyeli bekamsola begodu azizinya uSomnini ngokuthi: “SineKosi nasinje na?”

Ama-Amalekhi alwa nama-Israyeli

⁸ Kwavela ama-Amalekhi alwa nama-Israyeli eRefidimu.

⁹ UMosi wathi kuJotjhuwa: “Sikhethela amadoda bese uphuma nawo niyosahlela ama-Amalekhi kusasa. Mina ngizakujama esiqongolweni sentatjana ngiphethe idondolo lakaZimu.”

¹⁰ UJotjhuwa wenza njengombana uMosi amyalile, walwa nama-Amalekhi. UMosi, u-Aroni noRhuri bakhuphukela esiqongolweni sentatjana.

¹¹ Bekuthi njalo lokha uMosi naphakamisa isandla sakhe nedondolo ama-Israyeli adlondlobale, kuthi nasehlisako kudlondlobale ama-Amalekhi.

¹² Kodwana imikhono kaMosi yadinwa. Nje-ke u-Aroni noRhuri bathatha ilitje balisunduzela ngaphasi kwakhe. Wahlala phezu kwalo. U-Aroni noRhuri bamphahla baphakamisa izandla zakhe ngokuzidlheganisa. Ngaleyondlela isandla sakhe sahlala siphakeme njalo bekwatjhinga ilanga.

¹³ UJotjhuwa wahlula ama-Amalekhi ngobukhali besabula.

¹⁴ USomnini wathi kuMosi: “Tlola lokhu encwadini kube sikhumbuzo nikutjho eendlebeni zakaJotjhuwa bonyana ngizokutjhabalalisa nya ukukhunjulwa kwama-Amalekhi ngaphasi komthunzi welanga.”

¹⁵ UMosi wakha i-aldari walithiya wathi: “USomnini ulitshwayo lami.”

¹⁶ Godu wathi: “Ngambala isandla sami siphethe itshwayo lakaSomnini! Iye, uSomnini uzakulwa nama-Amalekhi iinzukulwana ngeenzukulwana.”