U-EKSODUSI 15 - IsiNdebele 2012 Translation

Ama-Israyeli abhina ingoma yokudumisa

¹ UMosi nabantu bakwa-Israyeli babhinela uSomnini ingoma nasi: Ngizakubhinela uSomnini ngombana uphakeme khulu, wajikijela iinjomani neenkarana ngelwandle.

² USomnini umamandlami neenkhwepha zami begodu uyisindiswami. UnguZimami yeke ngizamdumisa, unguZimu kababa ngizamphakamisa.

³ USomnini uyingorho, ubongelelwa ngebizo lakaSomnini.

⁴ Ujikijele iinkarana zakaFaro nebutho lakhe ngelwandle, abalawuli beenkarana abakhethekileko bacwila ngelwandle lomGaba.

⁵ Amanzi azikileko azisibekela, zatjhinga phasi ekuzikeni njengelitje.

⁶ Isandla sakho Somnini, siyesabeka ngamandlaso; iye, isandla sakho Somnini, sibhubhisa isitha.

⁷ Ngobukhulu bobukhosi bakho uketula abajamelani bakho, uthumela itukuthelwakho, ibaqothule inga mawunguwungu.

⁸ Ngokufutha kweempumulo zakho amanzi ayabuthelelana, iinkhukhula zijame inga lidonga, amanzi azikileko akhaphuzele phakathi kwelwandle.

⁹ Isitha sathi: “Ngizabagijimisa, ngibabambe, ngihlukanise ipango. Ngizakwanelisa ivunda lami kibo nangirhwatjha isabulami, ngibarhayile ngesandla sami.”

¹⁰ Wena Somnini wavuthela ummoyakho, ilwandle lawagubuzesa, acwila njengomthofi emanzini anamandla.

¹¹ Ngubani onjengawe Somnini phakathi kwabosingazimu? Ngubani onjengawe onobukhosi obucwengileko nemisebenzi ebabazekako ngokwenza imikarisomraro?

¹² Kwathi nawelula isandla sakho, iphasi lawaginya.

¹³ Ngokwethembeka kwakho warhola abantu obahlengileko, ngamandlakho wabakhokhela endawenakho ecwengileko.

¹⁴ Izizwe zoke zezwa, zathuthumela; abahlali beFilistiya baba nevalo.

¹⁵ Nje-ke amakhosana wakwa-Edomu akakamala, abaphathi bakwaMowabi bathuthumela; zoke izakhamuzi zeKanana zahlengezela.

¹⁶ Zehlelwa kukwesaba okukhulu kanye nevalo ngebanga lobukhulu bakho obenzileko; zathula zathi du njengelitje, lokha nakudlula abantu bakho, Somnini, iye, kudlule abantu bakho obazuzileko.

¹⁷ Wena Somnini uzabangenisa, ubatjale entabeni yelifa lakho, endaweni Somnini owayilungisako kobana bahlale kiyo, iye, indawo ecwengileko wena Mninimandlawoke owayisungula ngezandla zakho.

¹⁸ USomnini uzakubusa nini nanini.

¹⁹ Lokha iinjomani neenkarana zakaFaro kanye nabakhweli bazo nazingena ngelwandle, uSomnini wabuyisa amanzi welwandle azigubuzesa kodwana ama-Israyeli akhamba phezu kwehlabathi eyomileko phakathi kwelwandle.

²⁰ Nje-ke uMiriyamu umphorofidikazi, ongudadwabo ka-Aroni waphuma aphethe abosotjherere, boke abafazi bamlandela nabo baphethe babo bagida.

²¹ UMiriyamu wakhalela wathi: “Bhinelani uSomnini ngombana uphakeme khulu, wajikijela iinjomani neenkarana ngelwandle.”

Amanzi amunyu erhalawumbeni

²² Yeke uMosi warhola u-Israyeli ukusuka elwandle lomGaba bangena erhalawumbeni leTjhuri. Bakhamba amalanga amathathu erhalawumbeni, azange bafunyane amanzi.

²³ Kuthe lokha nabafika eMara, azange bakghone ukusela amanzi wakhona ngombana gade amunyu. Ngalokho athiywa bona yiMara.

²⁴ Abantu banghonghoyila kuMosi bathi: “Uthi sisele ini nasome kangaka?”

²⁵ UMosi walila kuSomnini, uSomnini wamkhombisa umuthi. Wawuthatha wawuphosela ngemanzini, amanzi aba mnandi. Khonapho uSomnini wabenzela isimiso nomthetho godu wabazizinya.

²⁶ USomnini wathi: “Nakube nizakulalela ngokuzimisela ilizwi lami, mina Somnini uZimenu, nenze okuhle phambi kwami, niphethe imiyalwami bese nigcina zoke iimiso zami, angeze nganehlisela nasinye isifo kilezo engazehlisela amaGibhide ngombana mina Somnini ngimlaphi wenu.”

²⁷ Yeke bafika e-Elimi lapha gade kunemithombo elitjhumi nambili yamanzi kanye nemithi yesundu ematjhumi alikhomba. Bahloma amatendabo lapho eqadi kwamanzi.