U-EKSODUSI 14 - IsiNdebele 2012 Translation

¹ Yeke uSomnini wathi kuMosi:

² “Tjela ama-Israyeli bonyana abuyele emuva ayokuhloma amatendawo ngaphambi kwePi-Harhirothi hlangana neMigidoli nelwandle, malungana neBhali-Tsefoni esebeni lelwandle.

³ UFaro uzadlumbana bona ama-Israyeli ararejeke enarheni nokobana avaleleke erhalawumbeni.

⁴ Yeke ngizakhunyalalisa ihliziyo kaFaro ukuze agijimise ama-Israyeli. Ngalokho ngizakubonakalisa idumo lami ngoFaro nalo loke ibutho lakhe. Nje-ke amaGibhide azakwazi bona nginguSomnini.” Ngambala kwenzeka njalo.

⁵ Lokha ikosi yeGibhide nayitjelwa bonyana ama-Israyeli athuthile, uFaro neenkhulu zakhe watjhugulula umkhumbulo ngawo wathi: “Yintobani esiyenzileko le? Madekhethu, sathukulula ama-Israyeli bona angasasisebenzeli!”

⁶ Yeke wabophela ikaranakhe wathatha ibutho lakhe,

⁷ okutjho iinkarana ezikhethekileko ezimakhulu asithandathu nazo zoke ezinye iinkarana zeGibhide, enye nenye inomlawuli.

⁸ USomnini wakhunyalalisa ihliziyo kaFaro ikosi yeGibhide, walandela ama-Israyeli njengombana gade ahlabela phambili ajekezela.

⁹ AmaGibhide alandela ama-Israyeli ngazo zoke iinjomani zeenkarana zakaFaro nabakhweli bazo okutjho amabutho wakhona. Awafunyana ahlome amatende elwandle ngePi-Harhirothi malungana neBhali-Tsefoni.

¹⁰ UFaro nebutho lakhe watjhidela. Kwathi lokha ama-Israyeli naphakamisa amehlo, qala nako amaGibhide eza ngemva kwawo! Angenelwa kukwesaba okukhulu abe arhuwelela akhombela isizo kuSomnini.

¹¹ Godu athi kuMosi: “Kungebanga lokobana kunganamathuna eGibhide bonyana usisuse khona sizokufela erhalawumbenapha na? Yintobani osenze yona ngokusikhupha eGibhide le?

¹² Angithi sakutjela nasiseGibhide sathi kuwe, ‘Sisusela thina! Sifuna ukusebenzela amaGibhide ngombana kungcono ukusebenzela amaGibhide kunokufela erhalawumbeni!’ ”

¹³ UMosi wathi ebantwini: “Ningesabi benidlhamazele. Lindani nibone isindiso kaSomnini azanenzela yona namhlanjesi. Ngiyanitjela ngithi amaGibhide eniwabona namhlanjesi la, angeze benisawabona godu.

¹⁴ USomnini uzanilwela, nina kwenu sekuthula nibukele.”

¹⁵ USomnini wathi kuMosi: “Ungangilileli; tjela ama-Israyeli bonyana aragele phambili.

¹⁶ Phakamisa idondolo lakho, ululele isandla sakho ngehla kwelwandle, ulihlukanise phakathi kobana ama-Israyeli akghone ukukhamba phezu kwehlabathi eyomileko ayame ilwandle.

¹⁷ Ngizakhunyalalisa iinhliziyo zamaGibhide bese awalandele abe angene ngelwandle. Ngalokho ngizakubonakalisa idumo lami ngoFaro nalo loke ibutho lakhe, okutjho iinkarana nabakhweli bazo.

¹⁸ AmaGibhide azakwazi bonyana nginguSomnini nasele ngibonakalise idumo lami ngoFaro, iinkarana zakhe nabakhweli bazo.”

¹⁹ Nje-ke ingilozi kaZimu ebegade ingaphambi komkhambathi wakwa-Israyeli yatjhida yaya ngemva kwawo, kwathi isika yelifu yatjhida ngaphambi kwawo yaya ngemva kwawo

²⁰ kobana ibe phakathi kwebutho leGibhide nomkhambathi wakwa-Israyeli. Ngobusukobo ilifelo laletha ubumnyama ngehlangothini lamaGibhide kodwana ngehlangothini lama-Israyeli lakhanyisa. Kwaba njalo ukuze iinqhema ezimbilezi zingakwazi ukuhlangana ubusuku boke.

²¹ UMosi welulela isandla sakhe ngehla kwelwandle. USomnini wahlehlisa ilwandle ngokulivuthela ngommoya wepumalanga nonamandla ubusuku boke. Amanzi ahlukana phakathi kwaba nehlabathi eyomileko.

²² Ama-Israyeli akhamba phakathi kwelwandle ehlabathini eyomileko, khibe amanzi aliboda ngapha nangapha kwawo.

²³ AmaGibhide athoma ukulandela ama-Israyeli ngelwandlapho. Zoke iinjomani neenkarana zakaFaro kanye nabakhweli bazo zangena ngelwandle.

²⁴ Kwathi ekuseni ngovivi uSomnini asesikeni yomlilo neyelifu waqalela ibutho lamaGibhide phasi. USomnini wafakela ibutho lamaGibhide ivalo

²⁵ ngokwenza bona amavili weenkarana zalo abhajwe ukuze atjhitjhirize. AmaGibhide athi: “Asibalekeni ema-Israyelenapha ngombana uSomnini uwalwela ngokujamelana nathi.”

²⁶ USomnini wathi kuMosi: “Lulela isandla sakho ngehla kwelwandle bonyana amanzi agubuzese amaGibhide, okutjho iinkarana zawo nabakhweli bazo.”

²⁷ Yeke uMosi welulela isandla sakhe phezu kwelwandle. Ekuseni ilwandle labuyela esigeni. AmaGibhide athi ayabaleka, ahlangana namanzi. USomnini wawadlhunya ngaphakathi kwelwandle.

²⁸ Amanzi agubuzesa bunjalo-ke iinkarana nabakhweli bazo, okutjho loke ibutho lakaFaro elalilandele ama-Israyeli ngelwandle. Azange kusinde namunye.

²⁹ Kodwana ama-Israyeli akhamba ehlabathini eyomileko phakathi kwelwandle, khibe amanzi aliboda ngapha nangapha kwawo.

³⁰ Ngaleyondlela uSomnini wasindisa ama-Israyeli mhlokho esandleni samaGibhide. Ama-Israyeli abona iindumbu zamaGibhide zitutumele magegana nelwandle.

³¹ Kwathi lokha ama-Israyeli nabona umsebenzi omkhulu owenziwe nguSomnini ngokujamelana namaGibhide, amesaba abe akholwa kuye nencekwinakhe uMosi.