U-EKSODUSI 12 - IsiNdebele 2012 Translation

IPhasika lokuthoma

¹ USomnini wathi kuMosi no-Aroni eGibhide:

² “Inyanga le izakuba yinyanga yokuthoma kini, kube ngeyokuthoma komnyaka.

³ Tjela yoke ihlangano yakwa-Israyeli bonyana elangeni letjhumi lenyanga le akube ngileyo naleyo ndoda ithathele umndenayo imvana, kube yimvana yinye ekumbeni ngayinye.

⁴ Nakube ikumba iba yincani khulu bona ingagoma imvana, khona abayihlukaniselane nabomakhelwana babo abaseduze, baqale isibalo sabantu abalapho. Kumele bayabe ngendlela yokobana omunye nomunye anele ngokwesilinganiso sokugoma kwakhe.

⁵ Khethani iimvana eziduna ezinomnyaka, zibe msulwa. Kungaba yimvana namkha imbuzana.

⁶ Zaluseni bekufike ilanga letjhumi nane lenyanga le, lokha yoke ihlangano yakwa-Israyeli nasele kumele izihlabe ngamarhwaqela.

⁷ Yeke bazakuthatha ezinye zeengazi bazitjhatjhe ngemaqadi naphezu kweengoseni zeenkumba zabo lapha bagomela khona.

⁸ Khona ntambamokho kumele bagome inyama ebaswe emlilweni, bayitjhebe ngeenrhabelo ezibabako nesikwa esinganangumelo.

⁹ Ningagomi inyama ehlaza namkha ephekwe ngamanzi, kodwana niyibase emlilweni isitutu njalo, isese nehloko, iinqatha neenredlo.

¹⁰ Ningatjhiyi ngitjho nesiqutjana senyamayo bekuse. Nakube nibanjwe kukusa ningakayiqedi, eseleko niyitjhise.

¹¹ “Nasi-ke indlela enizayigoma ngayo: Izambatho zenu azibotjhwe edinini, nihlale nifake amapatlagwana namadondolo abe sezandleni zenu, niyigome nirhabile. KuliPhasika lakaSomnini.

¹² Khona ngobusukobo ngizakudlula eGibhide ngimadlhe phasi woke amazibulo aduna wabantu neweenlwana. Ngizogweba boke abosingazimu beGibhide ngombana nginguSomnini.

¹³ Iingazi eziseenkumbeni lapha nikhona zizakuba litshwayo lokunivikela. Kuzakuthi nangibona iingazi, ngineqe. Angeze nathintwa matshwenyeko arhayilako lokha nangimadlha iGibhide.

¹⁴ Leli lilanga okumele nilikhumbule, niligidinge njengomnyanya kaSomnini, libe simiso sanini nanini eenzukulwaneni zenu.

¹⁵ Amalanga alikhomba nizakugoma isikwa esinganangumelo. Elangeni lokuthoma nisuse ihlama enengumelo eenkumbeni zenu ngombana nanyana ngubani ogoma nanyana yini enengumelo ukusuka elangeni lokuthoma bekube ngelekhomba, uzakujutjwa kwa-Israyeli.

¹⁶ Bambani umhlangano okhethekileko elangeni lokuthoma nelekhomba. Ningathinti umsebenzi nakancani kilamalanga abaliweko, ngaphandle kokulungiselela okudliwako kwaphela.

¹⁷ Gidingani umnyanya wesiKwa esinganaNgumelo ngombana kungelangeli lapha ngakhupha khona ihlanganwenu ngeengaba zayo eGibhide. Ugidingeni ube simiso sanini nanini eenzukulwaneni zenu.

¹⁸ Ngenyanga yokuthoma kumele nigome isikwa esinganangumelo ukusuka ekuhlweni kwelanga letjhumi nane bekube kusekuhlweni kwelanga lamatjhumi amabili nalinye.

¹⁹ Kuzabe kube malanga alikhomba kuzilwa ukuba nehlama enengumelo ngeenkumbeni zenu. Nanyana ngubani ogoma nanyana yini enesibiliso uzakujutjwa ehlanganweni yakwa-Israyeli, kungaba sikhonzi namkha umuntu wendabuko.

²⁰ Ningagomi litho eliwunyelweko. Kuphi nakuphi lapha nakhe khona, gomani isikwa esinganangumelo.”

²¹ Yeke uMosi wabiza boke abaphathi bakwa-Israyeli wathi kibo: “Bambelani imindenenu imvana namkha imbuzana bese nihlaba iPhasika.

²² Thathani ihlukuzu lehisophi nilitjhebe eengazini ngesitjeni bese nitjhatjha iingazezo phezu kwegoseni nangemaqadi wayo. Kungabi nomuntu namunye wenu ozakuphumela ngaphandle komnyango wekumbakhe bekube sekuseni.

²³ Lokha uSomnini nadabula enarheni bona ehlisele amaGibhide amatshwenyeko, uzakubona iingazi phezu kwegoseni nangemaqadi wayo bese weqa umnyango lowo. Angeze avumela umrhayili bonyana angene ngeenkumbeni zenu anehlisele amatshwenyeko.

²⁴ Gcinani imiyalo le kube simiso senu sanini nanini neenzukulwana zenu.

²⁵ “Godu lokha naningena enarheni uSomnini aninikela yona njengokwesithembiso sakhe, ragelani phambili ngokugcina umkhuba wokulotjha lo.

²⁶ Kuzakuthi abantwabenu nabanibuza bonyana umkhuba wokulotjha lo utjho ukuthini,

²⁷ nibatjele nithi mhlabelo wePhasika owenzelwa uSomnini oweqa iinkumba zama-Israyeli eGibhide wababalela imizi yethu lokha nakehlisela amaGibhide amatshwenyeko.” Nje-ke abantu baguqa bahloma iinhloko phasi.

²⁸ Ama-Israyeli akhamba enza poro njengombana uSomnini ayale uMosi no-Aroni.

Ukufa kwamazibulo

²⁹ Phakathi kobusuku uSomnini wamadlha woke amazibulo eGibhide, ukusuka ezibulweni lakaFaro esihlalweni sobukhosi ukuya ezibulweni lesibotjhwa ngejele kanye namazibulo wayo yoke ifuyo.

³⁰ UFaro nazo zoke iinkhulu zakhe namaGibhide woke bavuka phakathi kobusuku. Kwaqubuka ukurhahlawula okukhulu eGibhide ngombana kwakunganandlu nayinye eyayinganasidumbu.

³¹ UFaro wabiza uMosi no-Aroni ngobusukobo wathi kibo: “Ayigubhe! Hlukanani nabantu bami nina nama-Israyelenu la! Khambani niyokulotjha uSomnini njengombana nikhombele.

³² Thathani izimvu neembuzi zenu kanye neenkomo zenu njengombana nitjhwile bese ningena indlela. Nami ningibeke.”

³³ AmaGibhide akatelela abantu bonyana barhabe baphume enarheni ngombana athi: “Soke sizokufa nya!”

Ukufuduka kwama-Israyeli

³⁴ Ama-Israyeli athatha ihlamawo enganangumelo ayithwala emahlombe ngezitjeni zokudubela aziphuthela ngamatjhila.

³⁵ Godu enza njengombana uMosi awayala abe akhombela amaGibhide kobana awaphe amagugu wesiliva newegolide kanye nezambatho.

³⁶ USomnini gade enze amaGibhide bonyana abe nomusa khulu kuma-Israyeli. Nje-ke awapha lokho akukhombeleko, ngaleyondlela aphanga amaGibhide.

³⁷ Ama-Israyeli akhamba asuka eRamesese anqomba eSukothi. Kwakungaba ziinkulungwana ezimakhulu asithandathu zamadoda akhamba ngeenyawo ngaphandle kwabafazi, abantwana nababuthakathaka.

³⁸ Akhamba nezimvu neembuzi kanye neenkomo, kwaba mihlambi eminengi khulu. Godu kwaba nesiqubuthu sabantu bezinye izizwe esakhamba nawo.

³⁹ Abhaga iimphaphatha ezinganangumelo ngehlama aphume nayo eGibhide. Ngebanga lokobana bekaqotjhiwe eGibhide, azange abe nesikhathi sokuzilungiselela imiphako nokuwumela ihlama.

⁴⁰ Ama-Israyeli ahlala eGibhide isikhathi esiminyaka emakhulu amane namatjhumi amathathu.

⁴¹ Kwathi ngelanga lokugcina lokuhlangana kweminyaka emakhulu amane namatjhumi amathathu, yoke ihlangano kaSomnini yaphuma enarheni yeGibhide ngeengaba zayo.

⁴² Ngobusukobo uSomnini wabeka ilihlo phezu kwama-Israyeli kobana awakhuphe eGibhide. Ngebangelo woke ama-Israyeli, iinzukulwana ngeenzukulwana, ayalindela ngobusukobo ukuze ahloniphe uSomnini.

Iimiso zePhasika

⁴³ USomnini wathi kuMosi no-Aroni: “Nanzi iimiso zePhasika: Kungabi nomqhamuka oligomako.

⁴⁴ Nakunekhoboka olithengileko lona lingaligoma ngemva kobana ulisokile.

⁴⁵ Umhlali oqubileko nesisebenzi esiqatjhiweko bona bangaligomi.

⁴⁶ Kumele ligonyelwe ngekumbeni yinye, kungabi nenyama ekhutjhelwa ngaphandle kwekumba. Ningephuli nalinye lamathambo.

⁴⁷ Yoke ihlangano yakwa-Israyeli kumele iligidinge.

⁴⁸ Lokha nakunesikhonzi phakathi kwenu esifuna ukugidinga iPhasika lakaSomnini, kumele sisoke boke abaduna esinabo, ngemva kwalokho-ke singaba nesabelo njengomuntu woke wendabuko kwa-Israyeli. Omduna ongakasoki angaligomi.

⁴⁹ Umthetho lo wembatha nomuntu wendabuko kwa-Israyeli ngitjho nesikhonzi phakathi kwenu.”

⁵⁰ Woke ama-Israyeli enza poro njengombana uSomnini ayale uMosi no-Aroni.

⁵¹ Khona mhlokho uSomnini wakhupha ama-Israyeli eGibhide ngeengaba zawo.