U-EKSODUSI 1 - IsiNdebele 2012 Translation

Ukugandelelwa kwama-Israyeli

¹ U-Israyeli onguJakopo waya eGibhide. Amadodanakhe akhamba naye, enye nenye nomndenayo. Naka amabizwawo:

² uRubeni, uSimiyoni, uLevi noJuda;

³ u-Isakari, uZebuloni noBhenjamini;

⁴ uDani noNafitali; uGadi no-Atjheri.

⁵ Ngesikhatheso uJosefa bekasele aseGibhide. Yeke iinzukulwana zakaJakopo gade zimatjhumi alikhomba ngesibalo.

⁶ UJosefa nabo boke abafowabo kanye nazo zoke iinzukulwanezo bahlongakala,

⁷ kodwana ama-Israyeli abeletha, ahluma abe anda ngesibalo kangangobana azala inarha yeGibhide.

⁸ Ngokukhamba kwesikhathi eGibhide kwaba nekosi etja egade ingamazi uJosefa.

⁹ Yathi ebantwini bayo: “Qalani, ama-Israyeli kwanjesi sele andile kunathi.

¹⁰ Yeke asibeni nelisu ngawo, sikhandele bona angandi. Nakungasinjalo nakube kuyenzeka bona siqalane nepi azakuba libutho nezitha zethu bese alwa nathi, athumbe inarha.”

¹¹ Ngalokho bawabekela abatjhotjhozeli kobana bawagandelele emsebenzinawo okatelelako. Bekufuze akhe iPitomu neRamesese njengamadorobho wakaFaro wokubeka ipahla.

¹² Kodwana bathi nabarhagala ngokuwagandelela nawo arhagala ngokwanda, anaba. Ngalokho amaGibhide athoma ukukhathazeka khulu ngama-Israyeli.

¹³ Nje-ke aqinisa isandla phezu kwawo,

¹⁴ abe enza ipilo yama-Israyeli bona ibe munyu ngokuwasebenzisa umsebenzi obudisi weentina nedaka nangayo yoke imihlobo yemisebenzi yemasimini. Kiyo yoke imisebenzi ebudisi, amaGibhide asebenzisa ama-Israyeli ngesihluku.

¹⁵ Ikosi yeGibhide yakhuluma kuTjhifira noPuwa okubabelethisi bamaHebheru

¹⁶ yathi: “Lokha nanisiza abafazi bamaHebheru ukubeletha bese nanibona kumsana, mbulaleni, nakumntazana mliseni aphile.”

¹⁷ Kodwana ababelethisi besaba uZimu, azange benze lokho ikosi yeGibhide ethe bakwenze. Balisa abesana baphila.

¹⁸ Nje-ke ikosi yeGibhide yabiza ababelethisi yababuza yathi: “Nikwenzeleni lokhu? Kubayini nilise abesana baphile na?”

¹⁹ Ababelethisi baphendula uFaro bathi: “Abafazi bamaHebheru abafani nebamaGibhide, bona banamandla, kuthi umbelethisi angakafiki ibe sebabelethile.”

²⁰ Ngalokho uZimu waba nomusa ebabelethisini, nabantu banda baba banengi khulu ukudlula.

²¹ Ngebanga lokobana ababelethisi besaba uZimu, wabapha imbeleko.

²² Yeke uFaro wakhupha umyalo othi: “Boke abesana ababelethwako baphoseleni emlanjeni iNayili, kodwana abentazana bona nibalise baphile.”