U-AMOSI 9 - IsiNdebele 2012 Translation

U-Israyeli uzakuhlunguphazwa ngebanga lezono zakhe

¹ Ngabona uSomnini ujame e-aldarini, wathi: “Betha iinqongolo zeensika ukuze kusikinyeke imibunjwana yomnyango. Arhirize ukuze awele phezu kweenhloko zabo boke abantu – abaseleko ngizababulalela epini ngesabula. Akakho namunye ozakubaleka, akakho ozakuphunyurha.

² Nanyana bangemba batjhinge phasi ekuzikeni kwethuna, isandla sami sizabadzwebula khonapho. Nanyana banganyukela phezulu emazulwini, ngizabathatha khonapho ngibehlisele phasi.

³ Nanyana bangabhaca esiqongolweni sentaba iKarameli, ngizabazuma khonapho ngibabambe. Nanyana bangabhaca ekuzikeni kwelwandle, nalapho ngizabanikelela ngenyoka bona ibalume.

⁴ Nanyana izitha zabo zingabakghurumejela ekuthunjweni, ngizakulayela bona babulawe ngesabula khonapho. Ngizabaphosa ilihlo, ngibaqale kumbi ngingabaqali kuhle.”

⁵ USomninni uSomandla uMninimandlawoke, othi nathinta iphasi lincibilike, kuthi boke abahlala kilo batlhuwe; inarha yoke iphuphume njengeNayili, ibohle njengomlambo weGibhide;

⁶ nguye owakha isigodlo sakhe esiphakamileko emazulwini bewahloma isisekelo sakhona ephasini, wabiza amanzi welwandle, wawarhatjha ebusweni benarha, ibizo lakhe nguSomnini.

⁷ USomnini wathi: “Nina ma-Israyeli, kimapha anifani namaKutjhe na? Azange ngikhuphe u-Israyeli eGibhide, namaFilista eKafitori, nama-Arami eKiri?

⁸ Ngambala, amehlo kaSomnini uSomandla aphezu kombuso okhohlakeleko. Yeke ngizawubhubhisa nya ebusweni bephasi. Kodwana ikumba kaJakopo nokho angeze ngayibhubhisa.” Kutjho uSomnini.

⁹ “Ngizakukhupha umyalo, ngihlunge ikumba ka-Israyeli hlangana nezizwe zoke, njengamabele nahlungwa esefeni; kodwana akunathorwana nayinye ezakuwela phasi.

¹⁰ Zoke izoni ezihlangana nabantu bami zizakubulawa ngesabula, boke labo abathi, ‘Abekunahlekelele ezasehlela nanyana itjhidele kithi.’ ”

Umbuso kaDavida uzakuvuselelwa ngokuzako

¹¹ “Mhlokho ngizakuvuselela itende lakaDavida eliwileko. Ngilungise iindawo zalo ezonakeleko, ngibuyisele isithunzi salo, ngilakhe libe njengombana gade linjalo phambilini;

¹² ukuze likwazi ukwamukela imisalela yakwa-Edomu nezizwe zoke ezibizwa ngebizo lami.” Kutjho uSomnini ozakwenza koke akutjhwileko.

¹³ USomnini wathi: “Isikhathi siyeza, lapha ovunako azakubhedlhwa khona ngolimako notjalako abhedlhwe ngotlhodlha amadiribe. Iwayini elitjha lizakuthonta livela eentabeni, ligeleze kiyo yoke imibundu.

¹⁴ Ngizakutjhugulula ubujamo babantu bami u-Israyeli: Bazakuvuselela amadorobho agiriziweko, bahlale kiwo. Bazakutjala amadiribe bebasele newayini lakhona; balima iimvande, bagome iinthelo zakhona.

¹⁵ U-Israyeli ngizamtjala endawenakhe, ngingabe ngisamtsomula godu endaweni engimnikele yona.” Kutjho uSomnini uZimakho.