U-AMOSI 8 - IsiNdebele 2012 Translation

Umbono wesine

¹ Nakhu engakuboniswa nguSomnini uSomandla: Ngabona isiqwebu sizele iinthelo ezivuthiweko.

² USomnini wangibuza wathi: “Amosi, ubonani na?” Ngaphendula ngathi: “Ngibona isiqwebu seenthelo ezivuthiweko.” USomnini wathi kimi: “Isikhathi sokubabalela isizwe sami u-Israyeli siphelile, angekhe ngisabababalela.

³ Mhlokho iingoma ezibhinwa ngethempeleni zizakuphenduka isililo. Kuzakusabalala iindumbu yoke indawo. Kuzakuthi nghwayi!”

U-Israyeli ulindelwe ziinkinga ezikulu

⁴ Lalelani lapha, nina eniqaqada phezu kwabatlhogako, nirhayile abantu abakhwahlileko benarha le,

⁵ nibe nisithi: “Kazi umnyanya ocwengileko wokuthwasa kwenyanga lowo uyokudlula nini, ukuze sikghone ukuthengisa amabele! ISabatha lona liyokuphela nini? Sele sifuna ukuthengisa ikoroyi thina!” Nitjho njalo kwabe ninciphisa iinlinganiso, nikhuphula amanani benidlelezele ngokusebenzisa iinlinganiso ngokukhohlakeleko.

⁶ Nithenga abadududu ngesiliva nabatlhogako ngepara yamapatlagwana. Nithengisa ngitjho namasalela wekoroyi eniyithanyeleko.

⁷ USomnini ufunge ngeDumo lakaJakopo wathi: “Nanyana yini abayenzileko angeze ngayikhohlwa.

⁸ Inarha ayizukusikinyeka ngebangeli na, abantu abahlala khona bazile ngomzana? Inarha yoke izakuphuphuma njengomlambo iNayili; izakuzamaziswa, ibohle njengomlambo weGibhide.”

⁹ USomnini uSomandla wathi: “Mhlokho ngizakwenza ilanga bona litjhinge emini, bese ephasini kuba mnyama, emini kwa bha.

¹⁰ Ngizaphendula imigidi yenu yekolo ibe sizilo nokubhina kwenu koke kube sililo. Ngizanembathisa iinzilo noke nje nirhune iinhloko zenu. Isikhatheso ngizasenza kube ngathi ngesokulilela indodana ebelethwe iyodwa ngakwabo, bese ukuphela kwalo kube munyu.”

¹¹ USomnini uSomandla wathi: “Isikhathi siyeza lapha ngizakuthumela khona indlala enarheni: kungabi yindlala yokugoma namkha yokomela amanzi, kodwana kube yindlala yokuzwa amezwi kaSomnini.

¹² Abantu bazokuyerayera kusukela elwandle bekube selwandle, bayemayeme kusukela etlhagwini bekube sepumalanga, babhenyegula ilizwi lakaSomnini, kodwana abazolifumana.

¹³ “Mhlokho kuzakuphuma imidzidlha emihle neentsitsirimba zakhona, zigelagele bezitsirimezeke ngebanga lomrhawu.

¹⁴ Labo abafunga ngabosingazimu beSamariya nanyana bathi, ‘Ngozimakho uDani, ngiqinisile ngithi,’ nanyana bathi, ‘Ngozimu weBheritjheba, ngiqinisile ngithi,’ abantwabo bazokuduleka phasi, ngiqinisile ngithi angekhe basavuka.”