U-AMOSI 7 - IsiNdebele 2012 Translation

Imibono emithathu

¹ Nakhu engakuboniswa nguSomnini uSomandla: Ngambona alungisa iwoma lesikhonyani emva kobana ikosi seyilumile; nakuthoma ukumila amakhikhizela.

² Kuthe lokha isikhonyaneso nasiqeda ukudla sithanyele esimini, ngarabhela ngathi: “Awu, Somnini Somandla, libalela! UJakopo lo uzakusinda njani nanje? Qala bona ubogaboga kangangani!”

³ USomnini watjhugulula umkhumbulo wakhe wathi: “Lokhu okubonileko angekhe kwenzeka.”

⁴ Nakhu engakuboniswa nguSomnini uSomandla: USomnini uSomandla wabiza ukwahlulela komlilo; kwafika kwatjhisa amalwandle oma kere, bekwalumatha inarha yoke.

⁵ Ngathoma godu ngarabhela ngathi: “Awu, Somnini Somandla, ngiyakubawa, akhewujame ngamatje! UJakopo lo uzakusinda njani nanje? Qala bona ubogaboga kangangani!”

⁶ USomnini watjhugulula umkhumbulo wakhe wathi: “Lokhu nakho angeze kwenzeka.”

⁷ USomnini wangibonisa omunye umbono godu: USomini bekajame hlanu kweboda elakhiwe kuhle lanqopha, aphethe isinqophisamakho ngesandla.

⁸ Yeke uSomnini wangibuza wathi: “Amosi, ubonani na?” Ngaphendula ngathi: “Ngibona isinqophisamakho.” Yeke uSomnini wathi: “Ngibeka isinqophisamakho hlangana nabantu bami bakwa-Israyeli; angekhe ngisabababalela.

⁹ Iinduli zaka-Isaka zizakubhuruzwa neendawo ezicwengileko zaka-Israyeli zizakurhirizwa. Ngizakuvukela ikumba kaJerobhowamu ngesabulami.”

U-Amosi no-Amaziya

¹⁰ Nje-ke, u-Amaziya umphristi weBhethe-Eli, wathumela umyalezo kuJerobhowamu ikosi yakwa-Israyeli wathi: “U-Amosi uhlala isicathana ngawe esidindini sabantu bakwa-Israyeli. Yeke isizwe angeze sawanyamezelela amagamakhe.

¹¹ Ngombana ukhuluma uthi, ‘UJerobhowamu uzakufa ngesabula kanti u-Israyeli yena ngiqinisile ngithi, uzakusiwa ekuthunjweni enarheni ekude.’ ”

¹² U-Amaziya wathi ku-Amosi: “Sukela le, wena mboni ndina! Khamba ubuyele enarheni yakwaJuda, fewuphorofide bewusebenzele nesikwa sakho lapho.

¹³ Ungabusathoma uzokuphorofidela eBhethelapha godu ngombana kusesigodlweni sekosi lapha begodu kulithempeli lobukhosi.”

¹⁴ U-Amosi waphendula u-Amaziya wathi: “Zange khengibe mphorofidi namkha indodana yomphorofidi, kodwana bengingumelusi begodu bengitlhogomela imithi yamakhiwani.

¹⁵ Yeke uSomnini wangithatha ekweluseni wathi kimi, ‘Khamba uyokuphorofida ebantwini bami bakwa-Israyeli.’

¹⁶ Alo-ke, gadesi lalela ilizwi lakaSomnini. Wena uthi kimi, ‘Musa ukuphorofida kumbi ngo-Israyeli bewulise nokutjhumayela kumbi ngekumba ka-Isaka’.

¹⁷ “Nje-ke Amaziya, uSomnini uthi kuwe, ‘Umkakho uzakuba yingwadla yedorobheli; amadodana namadodakazakho azakubulawa ngesabula. Inarha yakho izakulinganiswa, yabelwe abanye. Wena uzakufela enarheni engakahlambuluki. U-Israyeli nakanjani uzakusiwa ekuthunjweni enarheni ekude neyekhabo.’ ”