U-AMOSI 6 - IsiNdebele 2012 Translation

Ukubhujiswa kwaka-Israyeli

¹ Nizazizwa nina enihlezi nathabalala eZiyoni, nani enizizwela nivikelekile entabeni yeSamariya; ngitjho nina madoda, aqakathekileko esizweni esikhulu, lapha abantu bakwa-Israyeli bagijimela khona nabanemiraro.

² Ngithi khambani niye eKaline nifike niyibukele; nanisuka lapho ninqombe eHamati ekulu, nigege njalo beniyokufika enzasi eGati yeFilistiya. Fenizibuze bona iindawezi zingcono kunemibuso yenu emibili na? Kghani zinenarha edlula yenu?

³ Niphayela ilanga lekohlakalo eqadi, ngezenzo zenu nitjhideza umbuso werawurawu.

⁴ Nilala emibhedeni ekghatjiswe ngamazinyo wendlovu, nizigedle emasofeni wenu kanokutjho. Nigoma iinkhanakhana zenyama yemvu neyamathole anonisiweko.

⁵ Nitlama iingoma, nincinze amarhabhu wenu, nibhine njengoDavida.

⁶ Nisela iwayini ngomjeka, nizimonyonge ngamafutha kanokutjho; kodwana anikuzileli ukurhayilwa kwakaJosefa.

⁷ Yeke nizakuba hlangana nebokuthoma abazakuya ekuthunjweni; ukukhomba kwenu ngophakathi kuzakuphela.

U-Israyeli uzakuhlunguphazwa khulu

⁸ USomnini uSomandla wazifunga ngokwakhe, iye, uSomnini uZimu uMninimandlawoke wathi: “Ngiyakuhloya ukuzigqaja kwabantu bakaJakopo neengodlo zakhe ziyangikghabhudlha. Idorobheli ngizolinikelela ngezitha nakho koke kwalo.”

⁹ Nangabe kusele amadoda alitjhumi endlini eyodwa, nawo azokufa.

¹⁰ Kuzakuthi isihlobo sabafilekwabo nasifanele bona sikhuphe iindumbu zabo ngendlini bona sizitjhise bese sibuza nanyana ngubani esimfumana lapho sithi: “Kusese nesinye isidumbu lapho na?” Waphendula wathi: “Awa,” bese isihlobeso siyaraga sithi: “Sh! Singalingi siphathe ibizo lakaSomnini.”

¹¹ Ngambala, lokha uSomnini nakakhupha umyalo, kugirika ikumba ekulu ibe ziinquqwana, kuthi encani ibe ziintshutshurwana.

¹² Nakhe nabona iinjomani zirholobha phezu kwamadwala na? Umuntu yena wakhe walima khonapho ngeenkabi na? Kodwana nina niphendule umthetho waba sihlungu; najika isithelo sokulunga nasenza saba mhlonyani.

¹³ Nina enizigqaja ngokuthumba kwenu umuzi we Lo-Debhara, bese nithi: “IKharanayimi asikazithumbeli yona ngeenkhwepha zethu na?”

¹⁴ “Ngizoninikelela ngesizwe bona sinivukele nina bantu bakwa-Israyeli, sinigandelele ukusuka eLebo-Hamathi kuya emrhobeni we-Arabha.” Kutjho uSomnini uZimu uMninimandlawoke.