U-AMOSI 5 - IsiNdebele 2012 Translation

Isimemo sokuphenduka

¹ Lalela ilizweli wena kumba yakwa-Israyeli, ingoma yesililo ngiyikhalelela wena:

² “Liwile itlawu elingu-Israyeli, angekhe belisavuka godu, lilahliwe enarheni yekhabo, abe akunamuntu noyedwa olibuthako.”

³ Iye, nakhu okwatjhiwo nguSomnini uSomandla: “Idorobho lakwa-Israyeli elithumela amajoni ayikulungwana epini, kubuya ikhulu kwaphela; elithumela amajoni alikhulu, kubuya itjhumi kwaphela.”

⁴ Ngambala nakhu okwatjhiwo nguSomnini ekumbeni ka-Israyeli: “Ngifunani; yeke nizakuphila.

⁵ Musani ukuya eBhethe-Eli, ningayi eGiligali, ningayameli eBheritjheba. Ngiqinisile ngithi iGiligali izakuthunjwa, kuthi iBhethe-Eli yenziwe ilize lakolize.”

⁶ Funani uSomnini ukuze niphile, nakungasi njalo uzakubhebhedlha phakathi kwekumba kaJosefa njengomlilo; uzakurubha eBhethe-Eli, uqothule kutlhogeke umuntu ongawucima.

⁷ Yelelani nina eniphendula ukulunga nakwenza umhlonyani, nina enikghurumejela umthetho eqadi:

⁸ Ongumenzi wekwekwezi yesiLimela nekwekwezi yesiRuthwana; ophendula ubumnyama bube yitathakusa, kuthi imini ibe busuku; ubiza amanzi welwandle awaphalazele ebusweni benarha. Ibizo lakhe nguSomnini.

⁹ Nguye orhadla isika ngombani, agirize isisekelo sedorobho.

¹⁰ USomnini wathi: “Nizonda umuntu okhalimako ekhotho, okhuluma iqiniso niyamnyaza.

¹¹ Kungebangelo nigandelela okhwahlileko benimkatelele bona aniphe amabele. Nakhe abobhazabhazakazi beenkumba zamatje nje, kodwana anizozihlala; nitjele iindiribe, kodwana anizolisela iwayini lakhonelo.

¹² Ngombana ngikwazi koke ukona kwenu okunengi nokuthi izono zenu zikulu kangangani. Nigandelele omsulwa ngokufunjathiswa, nemuke odududu ilungelo lakhe ekhotho.

¹³ Eenkhathini ezinje umuntu ohlakaniphileko uvala phetjheya, ngombana lezi ziinkhathi ezimbi.”

¹⁴ Funani ukulunga, nilise ubukhohlakali, nizakuphila! Yeke uSomnini uZimu uMninimandlawoke uzakuba nani, njengombana nani nisitjho.

¹⁵ Zondani ubukhohlakali, nithande ukulunga, nithembeke emakhotho. Mhlamunye uSomnini uZimu uMninimandlawoke angaba nomusa kumisalela kaJosefa.

¹⁶ Nakhu-ke okwatjhiwo uSomnini uSomandla, uZimu uMninimandlawoke uthi: “Kuzakurhahlawulwa ematatawini woke, kulilwe isimayemaye kizo zoke iindledlana. Abalimi bazakubizwa bona bazokulila nabafazi besililo kuthiwe barhahlawule.

¹⁷ Kuzakurhahlawulwa eendiribeni zoke ngombanyana ngiyeza, ngizokudlula phakathi kwenu.” Kutjho uSomnini.

Ilanga lakaSomnini

¹⁸ Nizazizwa nina enihlulukela ilanga lakaSomnini! Nilihlulukelelani ilanga lakaSomnini na? Ngambala, kuzokuba lilanga elimnyama, kungabi nokukhanya.

¹⁹ Kuzakuba ngathi mumuntu othe ubaleka ingwenyama wazithela phezu kwebhere; naphunyurha ebhereni wangena kwakhe, wabeka isandla ebodeni walunywa yinyoka.

²⁰ Ilanga lakaSomnini lizokuba mnyama; kutlhogeke umkhanyo kube lilanga lamatlhuwo.

²¹ USomnini wathi: “Ngiyayizonda begodu ngiyayinyenya iminyanya yekolo yenu; imihlangano yenu ayinyamezeleleki.

²² Nanyana ningangilethela imihlabelo yokutjhiswa neminikelo yamabele, angeze ngiyamukele; iminikelo yetjhebiswano yamanoni angizoyitjheja.

²³ Sukelani le, ngetjhadakazi leengoma zenwezo! Angifuni nokuzizwa iinodo zamaharibhenu.

²⁴ Kodwana ukulunga akugeleze njengamanzi, ukwethembeka kugeleze njengomlambo ongatjhiko!

²⁵ “Ngakhe nganiyala bonyana ningilethele imihlabelo neminikelo eminyakeni ematjhumi amane eniyihlezi erhalawumbeni nina bantu bakwa-Israyeli na?

²⁶ Ngebangelo uSikuti ikosenu noKiyuni uzimenu wekwekwezi, okumifanekiso yabosingazimu benu enazenzela yona,

²⁷ nizoyithwala lokha nanginiqotjhela ekuthunjweni ngaphetjheya kweDamaseku.” Kutjho uSomnini; ibizo lakhe nguZimu uMninimandlawoke.