U-AMOSI 4 - IsiNdebele 2012 Translation

Abantu abanjingileko beSamariya bazakuhlungupazwa

¹ Lalelani lapha nina bafazi beSamariya, ngokunonakazi inga niziinkomo zeBhatjhani, nina enigandelela abantu abakhwahlileko benitshidlhe nabadududu, nithi emadodenenu “Thelani sisele!”

² USomnini uSomandla uzifunge ngokwakhe wathi: “Ngiqinisile ngithi siyeza isikhathi senu lapha nizakutjathwa khona ngeenkghopholo nebamaswaphelo benu barhurhubiswe ngesikghopholahlambi.

³ Omunye nomunye wenu uzakukhutjhwa ngentunja ebodeni, alahlelwe eHarimoni.” Kutjho uSomnini.

U-Israyeli wathuwelela ngokona

⁴ “Bantu bakwa-Israyeli, khambani niye eBhethe-Eli nifike none, iyani eGiligali nithuwelele ngokona. Lethani iminikelwenu qobe kusekuseni, nokwetjhumi kwenu njalo eminyakeni emithathu.

⁵ Nikelani ngesikwa esiwunyelweko kube mnikelo wokuthokoza. Memezelani iminikelweni yesihle, nizikhakhazise ngombana vele yinto eniyithabelako leyo ma-Israyeli.” Kutjho uSomnini.

⁶ “Mina nganilethela indlala kiwo woke amadorobho; ngatswinya umuzi omunye nomunye ngesikwa. Kodwana azange niphendukele kimi.” Kutjho uSomnini.

⁷ “Ngabuya godu ngabamba izulu iinyanga ezintathu ngaphambi kokuvuna. Ngathumela izulu emzini owodwa, kodwana ngalikhandela keminye. Isimu enye yaba nezulu, kodwana enye yalitlhoga beyoma kere.

⁸ Kusukela emizini emibili kuya kemithathu abantu bayerayera batjhinga emzini owodwa, bafuna amanzi nabawatholako akhange abanele. Kodwana azange niphendukele kimi.” Kutjho uSomnini.

⁹ “Ngarhadla iimvande neendiribe zenu ngobubori nangokukghora. Kwafika isikhonyani sarhayila imithenu yamakhiwani neye-oliva. Kodwana azange niphendukele kimi.” Kutjho uSomnini.

¹⁰ “Ngathumela amatshwenyeko phakathi kwenu njengombana ngenza ebantwini beGibhide. Ngabulala amasokanenu ngesabula, iinjomani zenu zathunjwa. Ngazalisa iinkampa zenu ngesivunda seendumbu. Kodwana azange niphendukele kimi.” Kutjho uSomnini.

¹¹ “Ngabhubhisa inengi lenu njengombana ngabhubhisa iSodoma neGomora. Benifana nesikhuni esivuthako esirhwatjhwe emlilweni. Kodwana azange niphendukele kimi.” Kutjho uSomnini.

¹² “Nakhu engizakwenza khona, wena Israyeli. Ngiqinisile ngithi ngizakwenza into: Yeke zihlanganise noZimakho, wena Israyeli.”

¹³ Ngambala ngowabumba iintaba, wadala imimoya, wembula imikhumbulwakhe ebantwini; uphendula itathakusa ayenze ubumnyama, agadange iinqongo zephasi – ibizo lakhe nguSomnini uZimu uMninimandlawoke.