U-AMOSI 2 - IsiNdebele 2012 Translation

¹ Nakhu okwatjhiwo nguSomnini: “Angizoyicolela iMowabi ngombana yone kokona: Batjhise amathambo wekosi yakwa-Edomu aba mlotha.

² Yeke ngizakuthumela umlilo eMowabi, uqothule isigodlo seKeriyothi. UMowabi uzakufela phakathi kwerawurawu enetjhada lepi nokulila kwepalapala.

³ Ngizakutjhabalalisa umbusi wakhona bengibulale neenkhulu zakhona zoke zife naye.” Kutjho uSomnini.

⁴ Nakhu okwatjhiwo nguSomnini: “Angizoyicolela iJuda ngombana yone kokona: Balahle umthetho kaSomnini begodu bangalalela imiyalwakhe. Badurhiswa bosingazimu, abosingazimu abalandelwa bokhokho babo.

⁵ Ngizakuthumela umlilo kwaJuda, uqothule isigodlo seJerusalema.”

Isigwebo sakaZimu phezu kwaka-Israyeli

⁶ Nakhu okwatjhiwo nguSomnini: “Angizomcolela u-Israyeli ngombana wone kokona: Bathengisa omsulwa ngesiliva nodududu ngamapatlagwana amabili.

⁷ Babhudabhuda iinhloko zabatlhagileko ebhudwini; bagandelela ababuthakathaka. Umuntu noyise balalana nomntazana munye basilaphaza ibizo lami elicwengileko.

⁸ Bakhamba barabhalala eqadi kwe-aldari elinye nelinye ngezambatho zesibambiso sesikolodo. Bathatha iwayini abalemuke abantu, balirhamulele ngethempeleni lakaZimabo.

⁹ “Mina ngawatjhabalalisa ama-Amori phambi kwabo, nanyana ayemade njengomsedari begodu aqine njenge-owuku. Ngawasiphula nesidindi sawo.

¹⁰ “Mina nganikhupha eGibhide, benganihlahla iminyaka ematjhumi amane erhalawumbeni bona nginiphe inarha yama-Amori.

¹¹ Godu nganivusela nabaphorofidi phakathi kwamadodanenu benganivusela nabanaziri phakathi kwamasokanenu. Akusinjalo na, bantu bakwa-Israyeli?” Kutjho uSomnini.

¹² “Kodwana nirhamulise abanaziri iwayini benatjela nabaphorofidi bonyana bangaphorofidi.

¹³ “Ngizanenza nibhajwe njengekarana nayilayitjhe intundu yeentjherefu zekoroyi.

¹⁴ Nonebelo angeze aphunyurha netsitsirimba izakutekezela nesihlabani sibhalelwe kuzisindisa.

¹⁵ Umdumuzi ngomsebe uzakubhalelwa kujama, amajoni weenyawo angeze aphunyurha nokhwele injomani uzakubhalelwa kuzisindisa.

¹⁶ Ngitjho netsitsirimba ekuthiwa sihlabani, mhlokho izakugijima ibhunubhunu.” Kutjho uSomnini.