U-AMOSI 1 - IsiNdebele 2012 Translation

Isingeniso

¹ La mamezwi waka-Amosi ogade angumelusi wezimvu eTekhowa. Wembulelwa iimphorofidezwi ngo-Israyeli eminyakeni emibili ngaphambi kokuhlengezela kwephasi, lokha u-Uziya asese yikosi yakwaJuda begodu noJerobhowamu umsa kaJowatjhi asese yikosi kwa-Israyeli.

Isigwebo sakaZimu phezu kwabomakhelwana baka-Israyeli

² U-Amosi wathi: “USomnini ubhodla aseZiyoni; uzwakalisa ilizwi lakhe aseJerusalema. Amasiso wabelusi ayatjhwaba; kuthi isiqongolo seKarameli somelele.”

³ Nakhu okwatjhiwo nguSomnini: “Angizolicolela iDamaseku ngombana yone kokona: Batshidlha iGiliyadi ngesileyi esinamazinyo wesimbi.

⁴ Yeke ngizakuthumela umlilo ngaphakathi kwekumba kaRhazayeli, uqothule isigodlo sakaBheni-Hadadi.

⁵ Ngizakwephula isiqabo seDamaseku; ngibhubhise ikosi yeBikhadi-Aveni ephethe intonga yobukhosi eBhethe-Edeni. Abantu beSiriya bazakusiwa ekuthunjweni eKiri.”

⁶ Nakhu okwatjhiwo nguSomnini: “Angizolicolela iGaza ngombana yone kokona. Bathethe woke umuzi bawusa ekuthunjweni bebawuthengisela u-Edomu.

⁷ Yeke ngizakuthumela umlilo ngaphakathi kwemithangala yeGaza, uqothule isigodlo sakhona.

⁸ Ngizakubhubhisa ikosi ye-Atjhidodi begodu nophethe intonga yobukhosi be-Atjhikheloni. Ngizakuphendukela abantu be-Ekroni, imisalela yamaFilisti izakubhubha.” Kutjho uSomnini uSomandla.

⁹ Nakhu okwatjhiwo nguSomnini: “Angizolicolela iTirosi ngombana yone kokona: Bathumba bebathengisa woke umuzi ku-Edomu. Azange bayelele isivumelwano nabafowabo.

¹⁰ Yeke ngizakuthumela umlilo ngaphakathi kwemithangala yeTirosi, uqothule isigodlo sayo.”

¹¹ Nakhu okwatjhiwo nguSomnini: “Angizoyicolela i-Edomu ngombana yone kokona: Bagijimisa umfowabo ngesabula, balahla isisa sabo; babilelwa ziingazi, baba nezondo engapheliko.

¹² Yeke ngizakuthumela umlilo ngaphakathi kweTemani, uqothule isigodlo seBhozira.”

¹³ Nakhu okwatjhiwo nguSomnini: “Angizoyicolela i-Amoni, ngombana yone kokona: Bakghakghamulula izisu zabesifazana beGiliyadi abasidisi ukuze bangezelele imikhawulwabo.

¹⁴ Yeke ngizakuvuthisa umlilo ngaphakathi kwemithangala yeRabha, uqothule isigodlo sakhona. Umkhosi wepi uzakuzwakala njengesiwuruwuru;

¹⁵ ikosabo izakuthunjwa, yona nababusi bayo.” Kutjho uSomnini.