UZEFANIYA 3 - IsiNdebele 2012 Translation

Abaphathi beJerusalema bayamangalelwa

¹ Lizazizwa idorobho eliphika ikani, elisilapheleko neligandelelako!

² Alilaleli muntu, alivumi ukusolwa; alithembeli kuSomnini, alitjhideli hlanu koZimalo.

³ Iinkhulu zalo zimabhubezi abhodlako, abagwebi balo baziimpisi ezikhwabitha ebusuku zirhiribidela zingalisi nanyana sele kusile.

⁴ Abaphorofidi balo abazisi, bababantu abangathembekiko. Abaphristi balo basilaphaza okucwengileko begodu bephula umyalo.

⁵ Nanyana uSomnini olungileko angaphakathi kwedorobheli; kunganabumbi abenzako, ngamasa angahluleki, abonakalisa ukulunga kwakhe imihla ngemihla; kodwana khonapho iinkhohlakali abe azinanhloni.

⁶ USomnini uthi: “Ngirhayile izizwe; imibhotjhongwazo ibhidliziwe. Ngitjhiye iindledlana zazo zithe nghwayi, kwangaba namuntu okhambakhamba kizo. Amadorobhazo arhayiliwe, akukho noyedwa ozakusala, ngitjho noyedwa tere.

⁷ Bengidlumbana bona: Idorobheli lizangesaba, livume ukusolwa beliyelele koke engikulindele kilo. Kodwana khonapho belisaphikelele ngobukhohlakali kikho koke elikwenzako.

⁸ “USomnini uthi: “Yeke yewungilindele, ulindele ilanga engizakujama ngalo ngifakaze, lokha mina mgwebi ngihlanganisa izizwe nemibuso bona ngiyimadlhe ngamanikelelami, iye ngetukuthelwami evuthako. Lindelani ilanga mhlana iphasi loke lizakuqothulwa ngomlilo welaka lami.”

Abantu bakaZimu bangomuso

⁹ “Yeke ngizakuhlambulula iimbhena zabantu ukuze boke babize ibizo lakaSomnini, bamlotjhe, babambisene.

¹⁰ Kusukela ngaphetjheya kwemilambo yeKutjhe abalotjhi bami, abantu bami abasabaleleko bazangilethela iminikelo.

¹¹ Mhlokho, wena Jerusalema, angekhe usasoleka ngemitjhapho ongone ngayo ngombana ngizabe ngisuse kuwe boke abantu abathokoza ngokuzitjhaya kwabo. Nje-ke angeze usazigqaja entabenami ecwengileko.

¹² Kodwana ngizakutjhiya phakathi kwenu ababubodlhana nabathobekileko, bazakufunyana isiphephelo kuSomnini.

¹³ “Imisalela yakwa-Israyeli angeze isenza ubumbi nanyana ileye amala nekulumo ekhohlisako angeze yafunyanwa emilonyenayo. Ngambala izakukarula yetjise begodu kungabi nomuntu ozayethusa.”

Isimemo sokuthakasa

¹⁴ Kwakwazela, wena ndodakazi yeZiyoni! Betha umkhulungwana, wena Israyeli! Jabula uthokoze ngehliziywakho yoke, ndodakazi yeJerusalema!

¹⁵ USomnini usisusile isigwebo sakho, waqotjha nesitha sakho. INgwenyama yakwa-Israyeli, uSomnini ungesirhodlweni sakho, akusenabumbi obuzakwehlela godu.

¹⁶ Mhlokho bazakuthi eJerusalema: “Ungesabi, wena Ziyoni, unganyefisi izandla zakho.

¹⁷ USomnini uZimakho ungesirhodlweni sakho, unamandla wokusindisa. USomnini uzakukarekela ngethabo elikhulu; akuthande ngesirhawu, akuthakasele

¹⁸ ngokuthamba.” USomnini uthi: “Ngizakubuthelela abantu bakwa-Israyeli ebe bathotjisiwe begodu baphadlhalajiwe, labo abasuka enarhenabo ngamatlhuwo.

¹⁹ Sekuseduze bona bangibone kuhle abagandeleli bakho, wena Jerusalema. Ngizakwenyela abarholopheleko bakwa-Israyeli, bengibuthelele nalabo egade baphadlhalele. Esikhundleni sokunyazwa kwabo ngizabaphakamisa babe nedumo nesithunzi kilo loke iphasi.

²⁰ Ngesikhatheso ngizanibutha; ngesikhatheso ngizaniletha ekhaya. Ngizanipha idumo nesithunzi hlangana nabantu boke bephasi lokha nangitjhugulula ubujamo benu niqalile.” Kutjho uSomnini.