UZEFANIYA 2 - IsiNdebele 2012 Translation

Umphorofidi ubizela abantu bakwaJuda ekuphendukeni

¹ Zibuthelele wena sizwe esingananhloni ndina,

² ngaphambi kobana isikhathi sequnto lakaSomnini sizaliseke, iye, isikhatheso siza ngokurhabileko! Zikhalimele ngaphambi kobana ilaka lakaSomnini elivuthako lehlele phezu kwakho!

³ Funani uSomnini, nina noke bantu benarha enizithobileko, nina enilalela imiyalwayo. Yenzani okulungileko, nifune ukuthobeka; mhlamunye nizakuvikeleka ngelanga lelaka lakaSomnini.

Ukubhujiswa kwabantu abazombeleze uJuda

⁴ Ngambala iGaza izakutjhiywa bese i-Atjhikheloni isukelwa imarubhi. Ama-Atjhidodi azakuqotjhwa emini kwa bha bese i-Akroni iyasitjhulwa.

⁵ Nizazizwa nina enihlala magegana nelwandle, nina bantu beKerethi. Ilizwi lakaSomnini lijamelene nawe, wena Kanana, narha yamaFilista, lithi: “Ngizakubhubhisa nya, akunamuntu namunye ozakusinda.”

⁶ Isifunda seligu sizakuba miraga, indawo yabelusi; siphenduke iimbaya zezimvu.

⁷ Izakuba yinarha yemisalela yekumba yakwaJuda; izimvu zabo zidle lapho. Ebusuku bazakulala ngemarubhini we-Atjhikheloni. USomnini uZimabo uzabatjheja; atjhugulule ubujamo babo.

⁸ USomnini uthi: “Ngizizwile iinhlamba zabakwaMowabi namezwi wokuqhukuluza wabakwa-Amoni; abathuke abantu bami bebanyefula nenarhabo.”

⁹ USomnini uMninimandlawoke, uZimu wakwa-Israyeli uthi: “Ngebangelo-ke ngiyafunga ngithi, kuphila kwami: Ngambala iMowabi izakufana neSodoma, ama-Amoni afane neGomora: indawo yemitjhatjhana nemigodi yetswayi, inarha eligagadu nini nanini. Imisalela yabantu bami izabaphanga, abasindileko esizweni sami bazuze inarhabo.”

¹⁰ Ngikhokhu abazakufumana ngokuzikhukhumeza kwabo nokuthuka bebaqhukuluze abantu bakaSomnini uMninimandlawoke.

¹¹ USomnini uzabethusa lokha nabhubhisa boke abosingazimu benarha. Esinye nesinye isizwe sizamdumisa, nezikude zimdumise enarhenazo.

¹² USomnini uthi: “Nani, bantu beKutjhe, nizakubulawa ngesabulami.”

¹³ USomnini uzawelula isandla sakhe ajamelane netlhagu bese abhubhisa i-Asiriya; atjhiye iNiniva imabhudubhudu begodu yome kere kwanga lirhalawumba.

¹⁴ Imihlambi yeembandana izakulala phasi khonapho, iye, imifunda ngemifunda. Ebusuku iinrhulurhulu zizakulinda eentlhorini zeensika. Ukulila kwazo kuzakuzwakala eentunjeni zemithangala. Amagubulu azakurhwarhwaza emibunjwaneni yeminyango ngombana uSomnini ubhuruze imisedari yedorobho.

¹⁵ Lizakuba nje-ke idorobho elizikhukhumezako neliphephileko, elizitjela lithi: “Ngimi ngimi, alikho elinye gaphandle kwami.” Maye, lizakuphenduka igagadu, indawo yokulala iimbandana zommango! Boke abadlula nca ngakilo bazalenza ihlaya bebalikokomeje.