UZEFANIYA 1 - IsiNdebele 2012 Translation

¹ Ilizwi lakaSomnini elafika kuZefaniya umsa kaKutjhi, omsa kaGedaliya, umsa ka-Amariya, omsa kaHezekhiya, nakusabusa uJosiya, umsa ka-Amoni ikosi yakwaJuda.

Umphorofidi umemezela ukurhayila okuzako

² “Ngizakurhurhula yoke into esebusweni bephasi.” Kutjho uSomnini.

³ “Ngizakurhayila kwasamuntu neembandana; ngisizile iinyoni zezulu neenhlambi zelwandle. Ngiketule iinkhohlakali nangiphelisa abantu ebusweni bephasi.” Kutjho uSomnini.

⁴ “UJuda ngizombeka isandla nazo zoke izakhamuzi zeJerusalema. Ngizakuphelisa yoke imisalela yakaBhali endaweni le namabizo wabaphristi ababalotjhi bakaBhali, angasakhunjulwa.

⁵ Ngizakuphelisa labo abalotjha iinkwekwezi phezu kwephahla lezindlu nabaguqa phasi bafunge uSomnini bajike godu bafunge uMilkomu.

⁶ Ngizakuphelisa nabahlanuka uSomnini bangasayifuna ngokungasabuzi kiyo.

⁷ “Thula phambi kwakaSomnini uSomandla, ngombana ilanga lakaSomnini litjhidele. USomnini ulungise umhlabelo; walungiselela labo abamemileko.”

^8-9 Ngelanga lomhlabelo lowo, uSomnini wathi: “Ngizakubeka iinkhulu namakhosana umlandu, nabo boke ababahlumisa ngenturhu nangekohliso. Ngibeke umlandu nalabo abavunule iimvunulo ezitjhili nabo boke abagegeda ukugadanga embunjwaneni womnyango.”

¹⁰ USomnini uthi: “Mhlokho kuzakuzwakala umkhosi esangweni leHlambi, kurhahlawulwe ngengcenyeni etja yeJerusalema, kuzwakale ubugidigidi obukhulu ngemibundwini.

¹¹ Rhahlawulani nina enihlala emakethe, ngombana boke abarhwebi bazokutjhabalaliswa nabathengisi barhayilwe.

¹² “Ngesikhatheso ngizakubhenyegula iJerusalema ngeenhlothi ezivuthako, bengibeke umlandu labo abazigedlileko, abazitjela bathi, ‘USomnini akenzi litho elimbi nanyana elihle.’

¹³ Umnonwabo uzakuphangwa, neenkumba zabo zigirizwe. Bazakwakha iinkumba bangazihlali; batjale iindiribe kodwana bangalirhamuli iwayini lakhona.”

¹⁴ Ilanga elikhulu lakaSomnini litjhidele; ngambala litjhidele begodu liza ngokurhabileko. Ukuzwakala komkhosi wephasi welanga lakaSomnini uzakuba munyu nonesibindi uzakulila okutlhuwisako.

¹⁵ Ilangelo lizakuba lilanga lelaka, ilanga lamahlungu namatlhuwiso, ilanga lokubhuruzwa nokurhayilwa, ilanga lokufiphala nobumnyama, ilanga lamafu anzima tshu.

¹⁶ Kuzakuba lilanga lepalapala nelokuhlaba umkhosi, wokugasela amadorobho anemithangala nemibhotjhongo yamajika.

¹⁷ USomnini uthi: “Ngizakuletha amatlhuwiso ebantwini, yeke bazakubhaduzela njengabangaboniko.” Ngebanga lokobana bonile kuSomnini, ipilwabo izakuba njengeenzibi, nemizimbabo ibe njengobulongwe.

¹⁸ Isiliva negolidabo angeze yabasindisa ngelanga lelaka lakaSomnini. Inarha yoke izakuqothulwa ngomlilo wesikhwele sayo. Ngambala uzakurhayila ngokwesabekako boke abaphila enarheni.