UZAKARIYA 9 - IsiNdebele 2012 Translation

Inarha yesithembiso

¹ Isiphorofido. Ilizwi lakaSomnini lijamelene nenarha yeHadraki nedorobho leDamaseku. Idorobho eliligugweli neenkoro zoke zakwa-Israyeli ngezakaSomnini.

² IRhamathi esemkhawulweni weDamaseku, iTirosi neTsidoni nazo zingezakaSomnini. ITirosi ngambala inekghono:

³ Izakhele irholo, yazibuthelelela isiliva njengethuli negolide njengebhudu leendledlana.

⁴ Kodwana uSomandla uzayiqubula, abhubhise iinthayamanzi zayo elwandle; iqothulwe mlilo.

⁵ I-Atjhikeloni izakubona lokho yesabe; iGaza ihlengezele ne-Ekroni iphelelwe lithemba. Ikosi izakunyelela eGaza, i-Atjhikeloni izakutjhiywa.

⁶ USomnini wathi: “Abaphalali bazakuphalala e-Atjhidodi ngombana ngizaliphelisa igugu lamaFilista leli.

⁷ Ngizabakhafulisa inyama eneengazi nokudla okusilapheleko emilonyenabo.” Iye, abantu be-Atjhidodi abazakusinda nabo bazakuba ngebakaZimethu, bazakufana nekoro kaJuda. Abantu be-Ekroni bona bazakufana namaJebusi.

⁸ Godu uSomnini wathi: “Ngizakuvikela inarhami epini erhiribidelako. Akusenamgandeleli ozazenzela ebantwini bami ngombana ngizabe ngibelusile ngesikhatheso.”

Ikosi elindelweko

⁹ Jekezela khulu wena ndodakazi yeZiyoni! Rhuwelela wena ndodakazi yeJerusalema! Qala, ikosakho iza kuwe, ilungile begodu iyahlula. Ithobekile begodu ikhwele udumbana, udumbana wamambala.

¹⁰ USomnini wathi: “Ngizakurhayila iinkarana zepi neenjomani kwa-Efrayimu neJerusalema. Imisebe yepi izakwephulwa; ikosi leyo izakumemezela ukuthula ezizweni. Umbuswayo uzakuthoma elwandle ukuya elwandle, ukusuka emlanjeni iYufrathe ukuya emaphelelweni wephasi.

¹¹ Wena-ke Jerusalema, ngebanga lamatshwenyeko wabantu enginesivumelwano nabo, ngizakutjhaphulula iimbotjhwa zakho ezisemgodini otjhingako.”

¹² Buyelani erholweni, nina mbotjhwa ngombana kunethemba! Ngambala namhlanje uSomnini umemezela uthi: “Wena Jerusalema, ngizakunikela umvuzo obuyelelweko.

¹³ Ngizakusebenzisa uJuda njengomsebe wami, u-Efrayimu abe msubela. Ngizakujokola ngamadodanakho, wena Ziyoni, abe mkhontwami wokuhlaba abantu beGirisi.”

¹⁴ USomnini uzakuvela ngehla kwabo, umsubela wakhe uzakusubela njengombani; uSomnini uSomandla uzakuvuthela ipalapala eze ngesivunguvungu sangesewula.

¹⁵ USomnini uMninimandlawoke uzabavikela, bazakumadlha bebarhiribidele izitha zabo ngamatje wesarwayi; bazipitlize. Bazakuzala iingazi inga majika we-aldari lokha nakatlipilijiweko.

¹⁶ Mhlokho uSomnini uZimabo uzabasindisa ngombana bamhlambi wakhe. Ngambala bazakuphazima enarhenakhe njengamatje aligugu asesihlohlweni.

¹⁷ Maye bazakuba bahle bebakarise kangangani! Amabele nesitjhidela sewayini kuzakwenza amasokana neentombi zibethe esimonyongwana.