UZAKARIYA 8 - IsiNdebele 2012 Translation

UZimu womusa

¹ Yeke uSomnini uMninimandlawoke wangembulela lokhu:

² Nakhu okwatjhiwo nguSomnini uMninimandlawoke: “Nginesikhwele esikhulu ngeZiyoni, ngibuhlungu khulu ngayo.”

³ Nakhu okwatjhiwo nguSomnini: “Ngizakubuyela eZiyoni, ngibe ngaphakathi kweJerusalema, ngalokho iJerusalema izakuthiwa nguThembekile nentaba kaSomnini uMninimandlawoke izakuthiwa nguNtaba-Cwengekile.”

⁴ Nakhu okwatjhiwo nguSomnini uMninimandlawoke: “Godu eentaradeni zeJerusalema kuzakuhlala amaqhegu nezalukazi, bazakuluphala kangangobana omunye nomunye uzakudondolozela.

⁵ Idorobho lizakuphithizela abesana nabentazana badlale eentaradeni zakhona.”

⁶ Nakhu okwatjhiwo nguSomnini uMninimandlawoke: “Nakube kubonakala kungakghoneki kini nina enisinde ekuthunjweni, alo, nidlumbana bonyana nakimi akuzukukghoneka ngomuso na?”

⁷ Nakhu okwatjhiwo nguSomnini uMninimandlawoke: “Ngizakusindisa abantu bami ephasini loke,

⁸ ngibabuyise bona bazokuhlala eJerusalema. Bazakuba babantu bami, mina ngibe nguZimabo ngeqiniso nangokulunga.”

Abantu babizelwa ukwethemba uSomnini

⁹ Nakhu okwatjhiwo nguSomnini uMninimandlawoke: “Lokha abantu nabathoma ukuvuselela ukwakhiwa kwethempeli lakaSomnini uMninimandlawoke, abaphorofidi bathi, ‘Ithempeleli kufanele liqedelelwe.’ Yeke nina enezwa amezwi akhulunywa baphorofidi la, qinisani izandla.

¹⁰ “Ngambala ngaphambi kokuthonywa kokwakhiwa kwethempeli begade kunganakokhelo yabantu nanyana yeembandana. Ngebanga lobujamo obumbi umuntu ozisebenzelako gade anganakuziphilisa. Ngaphendula woke umuntu bona ajamelane nomakhelwanakhe.

¹¹ Kodwana kwanjesi angeze ngisaphatha imisalela yabantwaba, njengombana ngenza phambilini,” kutjho uSomnini uMninimandlawoke.

¹² “Iye, imbewu abayitjalileko izakuhluma kuhle, iindiribe zihlome iinthelo zazo namasimu aveze isivuno sawo kuthi izulu line ngesikhathi esifaneleko. Koke lokhu ngizakwenza bonyana kuhlale kukhona njalo kumisalela yabantwaba.

¹³ “Ngizanisindisa, wena ndlu kaJuda nawe ndlu ka-Israyeli. Njengombana gade nisisiga samanikelela, nje-ke nizakuba mkariso wesibusiso. Ningesabi, qinisani izandla.”

Ukulalela kuyipendulo yomusa kaZimu

¹⁴ Ngambala, nakhu okwatjhiwo nguSomnini uMninimandlawoke: “Njengombana ngaqunta ukunehlisela ihlekelele, ngangaba nesirhawu lokha aboyihlo nabangisilingako,

¹⁵ yeke sengiqunte bona ngenze okuhle eJerusalema nendlini kaJuda. Nje-ke ningesabi.

¹⁶ Nanzi izinto enifanele nizenze: Khulumani iqiniso omunye komunye. Gcinani iqiniso nokulunga okufaneleko emabandla.

¹⁷ Ningazindlelani, nigegede ukufunga ngekohliso ngombana ngiyazizonda zoke izinto ezinjalo.

¹⁸ “Yeke uSomnini uMninimandlawoke wangembulela lokhu:

¹⁹ “Nakhu okwatjhiwo nguSomnini uMninimandlawoke: “Ukuzila ukudla kwenyanga yesine, yesihlanu, yekhomba neyetjhumi kuzakuba kukwenama neenkhathi ezihle nemigidi yokwethaba kwaJuda. Yeke thandani iqiniso nokuthula.”

²⁰ Nakhu okwatjhiwo nguSomnini uMninimandlawoke: “Ukusuka gadesi, izizwe ezinengi nabahlali bamadorobho amanengi bazakuza.

²¹ Iye, abahlali bedorobho elinye bazakusuka baye kelinye bathi, ‘Nambani siyokutenda uSomnini besifune nomusa kaSomnini uMninimandlawoke. Vele siyaya.’

²² Ngalokho-ke izizwe ezinengi nabantu abanengi bazakuza bazokufuna umusa kaSomnini uMninimandlawoke eJerusalema bebatende uSomnini.”

²³ Nakhu okwatjhiwo nguSomnini uMninimandlawoke: “Emihleni leyo amadoda alitjhumi kizo zoke izizwe ezihlukeneko azakukakarela umJuda ngomphetho wesambatho sakhe athi, ‘Sifuna ukukhamba nawe ngombana sizwile bonyana uZimu unani.’ ”