UZAKARIYA 7 - IsiNdebele 2012 Translation

Ukulalela kungcono kunokuzila ukudla

¹ Ngomnyaka wesine wokubusa kwekosi uDariyasi kwafika ilizwi lakaSomnini kuZakariya elangeni lesine lenyanga yethoba, okuyinyanga kaKhisilevu.

² UBhethel-Sareseri wathuma uRerhemeleki nabantu bakhe bonyana bayokutenda uSomnini,

³ bebabuze abaphristi abasethempeleni lakaSomnini uMninimandlawoke nabaphorofidi bathi: “Kufuze ngilile enyangeni yesihlanu ngokuzila ukudla njengombana ngenzile eminyakeni eminengi na?”

⁴ Yeke ilizwi lakaSomnini uMninimandlawoke lafika kimi, mina Zakariya, lathi:

⁵ “Khuluma nabo boke abantu benarha le nabaphristi ubabuze uthi, ‘Lokha nagade nizilile nilila enyangeni yesihlanu neyekhomba iminyaka ematjhumi alikhomba edlulileko, ngambala benizilele mina na?

⁶ Lokha nanidla benisele emihlatjelwenenu bekungasi ngekokuzithabisa na?’

⁷ Lawa akusiwo amezwi uSomnini awamemezela ngabaphorofidi baphambilini lokha iJerusalema isahlezwi ngokuthula, nalokha amaJuda nasahlala kiyo yoke imizi yakwaJuda na?

^8-9 Okumamezwi uSomnini awakhuluma ngabaphorofidi wathi, ‘Gcinani ukulunga okufaneleko emabandla nitjengise ukwethembeka nesirhawu omunye komunye.

¹⁰ Ningagandeleli umhlolokazi namkha intandani, isikhonzi namkha odududu. Ningazindlelani okumbi.’

¹¹ Kodwana baqinisa iinhloko bebathundubaza neendlebe zabo.

¹² Lokhu bakwenzela eswilini ukuze bangalaleli ifundiso netjumayelo uSomnini ayimemezela ngoMoyakhe ngabaphorofidi baphambilini. Ngebangelo uSomnini uMninimandlawoke wasilingeka khulu.

¹³ USomnini uMninimandlawoke uthi, ‘Lokha nangibabizako akhange balalele, yeke nami, angizukubezwa nabarhuwelelako.

¹⁴ Ngabaphephula ngesivunguvungu ngabasa hlangana nezizwe zoke abangazaziko. Inarha yasala inesizungu ngemuva kwabo kangangobana kwakungekho okhambakhamba lapho. Bayenza njalo inarha ethabisako le yaba lirhalawumba.’ ”