UZAKARIYA 6 - IsiNdebele 2012 Translation

Umbono ngeenjomani neenkarana

¹ Ngabuye ngaqala godu ngabona iinkarana ezine zepi zivela hlangana neentaba ezimbili – iintaba zedzila!

² Ikarana yokuthoma beyineenjomani ezinzotho, yesibili inezinzima,

³ yesithathu inezimhlophe, kanti yesine beyinezimabalabala – zoke njalo bezinamandla.

⁴ Ngabuza isithunywa sakaSomnini ngathi: “Kuyini lokhu, kosami?”

⁵ Isithunywa sangiphendula sathi: “Le, mimoya emine yezulwini, ephumako negade ijame phambi kwakaSomnini, umniniphasi loke.

⁶ Ikarana yeenjomani ezinzima iqale ngenarheni yangetlhagwini, eneenjomani ezimhlophe iqale ngetjingalanga bese kuthi emabalabala iqale ngenarheni yangesewula.”

⁷ Lokha iinjomani ezinamandla naziphumako, gade zitjhabatjheka zifuna ukutjharhalala nephaseli loke nje. Sabese sithi: “Tjharhalalani nephaseli loke nje!” Yeke zatjharhalala nephasi loke.

⁸ Nje-ke isithunywa sangirhuwelela sathi: “Qala, leziya eziya enarheni yangetlhagwini zizakwanelisa uMoyami lapho.”

⁹ Ilizwi lakaSomnini leza kimi ngesithunywa lathi:

¹⁰ “URheldayi, uThobiya noJedaya, ababathunjwa babuya eBhabheli baletha izipho kuJosaya umsa kaZefaniya. Lokha nabafikako, wena iya kwaJosaya,

¹¹ uthathe isiliva negolide wenze isihlohlo bese usiphathisa umphristi omkhulu uJotjhuwa umsa kaJehozadaki.

¹² Umtjele uthi, nakhu okwatjhiwo nguSomnini uMninimandlawoke, “ ‘Kunomuntu onebizo ekuthiwa nguHlumela, uzakuhluma endawenakhe bese wakha isigodlo sakaSomnini.

¹³ Nguye ozokwakha isigodlo sakaSomnini begodu uzokwembathiswa ubukhosi bese uhlala esihlalweni sakhe sobukhosi abuse. Yeke kuzakuba nomphristi esihlalweni sakhe sobukhosi, kube nokuthula phakathi kwababilaba.’

¹⁴ “Isihlohlo sizakuba sesigodlweni sakaSomnini, kube sikhumbuzo saboRheldayi, uThobiya noJedaya godu kube yinzuzo kumsa kaZefaniya.

¹⁵ Labo abakude bazakubuya bazokufaka isandla ekwakhiweni kwesigodlo sakaSomnini. Nje-ke nizakwazi bonyana uSomnini uMninimadlawoke ungithume kini. Lokhu kuzakwenzeka nange nilalela uSomnini uZimenu ngokuncamileko.”