UZAKARIYA 2 - IsiNdebele 2012 Translation

Umbono ngendoda ephethe isimedo

¹ Ngaqala, ngabona indoda iphethe isimedo ngesandla.

² Ngayibuza ngathi: “Uyaphi?” Yangiphendula yathi: “Ngiyokumeda iJerusalema ukuze ngibone ubude nobubanzi bayo.”

³ Yeke kwavela isithunywa sakaSomnini, godu kwavela nenye ingilozi yasihlangabeza.

⁴ Isithunywa sakaSomnini sathi kiyo: “Gijima, ufese utjele isokana lesimedo leliya bonyana uSomnini uthi, “ ‘IJerusalema izokuba lidorobho elinganamithangala ngombana inesiminyaminya sabantu nefuyo.

⁵ Mina ngokwami ngizokuba liboda lomlilo magegana nayo. Bese ngiyizalisa ngephazimulwami.’ ”

⁶ Isithunywa sakaSomnini sathi: “ ‘Arha-ke! Arha-ke! Phumani ngenarheni yangetlhagwini leyo,’ kutjho uSomnini. Begodu uSomnini wathi, ‘Ngambala ngathembisa bonyana ngizanenza nisabalale emagumbini womane.’

⁷ “Nje-ke, yenize eZiyoni! Phunyurhani nibaleke nina bantu enihlala eBhabheli!

⁸ USomnini wangithuma ezizweni ezaniphangako nina bantu beJerusalema. Wangithuma kobana ngibuyisele idumo lakhe ngombana nanyana ngubani othinta nina uhloma uSomnini ngomuno ngelihlweni.

⁹ “Ngiyatjho ngithi ngizakuphakamisa isandla sami, ngijamelane nezizwezi; zizakuphangwa makhobokazo. Nje-ke nizakulemuka bonyana uSomnini uMninimandlawoke ungithumile.

¹⁰ “Bhina begodu uthabe, wena ndodakazi yeZiyoni ngombana uSomnini wathi, ‘Ngiyeza begodu ngizokuhlala ngesirhodlweni sakho.’

¹¹ “Izizwe ezinengi zizazihlanganisa noSomnini mhlokho bese ziba sisizwe sakhe. Uzakuhlala ngesirhodlweni sakho Jerusalema, wena-ke uzakwazi bonyana uSomnini uMninimandlawoke ungithume kuwe.

¹² USomnini uzakuzuza iJuda, ilifa lakhe enarheni ecwengileko abe azikhethele neJerusalema godu.

¹³ Zithobeni phambi kwakaSomnini, noke nina bantu ngombana uSomnini selafikile uvela endawenakhe ecwengileko.”